ރަޝިޔާގައި، ކީރިތި ގުރުއާނަށް ފުރައްސާރަ ކުރުމަކީ ޤާނޫނީ ކުށެއް ކަމަށާއި، އެ ކަމަށް އަދަބު ދޭނެ ކަމަށް އެ ގައުމުގެ ރައީސް ލަޑީމިއާ ޕުޓިން ވިދާޅުވެއްޖެ އެވެ.

ދާގެސްތާނުގެ ތާރީހީ މިސްކިތް ކަމަށްވާ ޑާބެންޓަށް ކުރެއްވި ޒިޔާރަތުގައި މުސްލިމް މަންދޫބުންނާ ބައްދަލުކުރައްވައި، ވާހަކަދައްކަވަމުން ޕުޓިން ވިދާޅުވީ، ބައެއް ގައުމު ތަކުން ޤުރުއާނުގެ މާތްކަމަށް އިހުތިރާމް ނުކުރި ނަމަވެސް ރަޝިޔާގައި އަބަދުވެސް އެކަމަށް އިހުތިރާމް ކުރާނެ ކަމަށެވެ.

ކީރިތި ޤުރުއާނަށް އިހްތިރާމް ކުޑަ ކުރުމަކީ ރަޝިޔާގެ ގާނޫނު އަސާސީ އާއި ގާނޫނުލް އުގޫބާތުގައިވާ ގޮތުން ވެސް ކުށެއް، ކަމަށް، ޕުޓިން ވިދާޅުވިއެވެ. 

"ކީރިތި ޤުރުއާނަކީ މުސްލިމުންނަށް މާތް ވެގެންވާ އަދި އެހެން މީހުންނަށް ވެސް މާތް ވެގެންވާ އެއްޗަކަށް ވާންޖެހޭނެ، އަޅުގަނޑުމެން އަބަދުވެސް އަމަލުކުރާނީ މި އުޞޫލުތަކަށް" ޕުޓިން ވިދާޅުވިއެވެ. 

ދާގެސްތާނަކީ މުސްލިމުންގެ އަގުލަބިއްޔަތު އޮންނަ ތަނެކެވެ. ދާގެސްތާނުގެ މިސްކިތުން ވަނީ ޕުޓިން އަށް މުސްހަފެއް ހަދިޔާ ކޮށްފައެވެ. 

ޕުޓިން މިފަދައިން ވިދާޅުވެފައި މިވަނީ، ބަރަކާތްތެރިވެގެންވާ އަޟުހާ ޢީދު ދުވަހުވެސް ސްވިޑެންގެ މިސްކިތެއްގެ ބޭރުގައި ހަތިމުގެ ތެރެއަށް އޫރު މަސް އަޅައި، ހަތިމް އިރައި އަންދާލުމުގެ ހަރަކާތެއް ބާއްވާފައިވާ ދަނޑިވަޅެއްގައެވެ. 

އީރާނުގެ ސަލްވާން މޮމިކާ ނަމަކަށް ކިޔާ، މީހަކު އިސްވެ ހުރެ އެކަން ކޮށްފައި ވަނީ، ސްވިޑެންގެ ކޯޓަކުން އެކަމަށް ހުއްދަވެސް ނަގައިގެންނެވެ. އެގޮތުން، އެ ހުއްދައަށް އޭނާ ފުރަތަމަ އެދުމުން، ސްވިޑެންގެ ކޯޓުން އެކަމަށް ހުއްދަ ނުދިނުމުން ފަހުންވެސް އަލުން އެދިގެން އޭނާ ވަނީ، މިސްކިތުގެ ބޭރުގައި މާތް ވެގެންވާ ކީރިތި ޤުރުއާން އެންދުމުގެ ހަރަކާތެއް ހިންގުމުގެ ހުއްދަ ހޯދާފައެވެ. އަދި އޭނާ އެކަން ކުރީ ފުލުހުންގެ ފުރިހަމަ ހިމާޔަތާއިވެސް އެކުގައެވެ. 

ސްވިޑެން ގައި ހިނގި މި ޢަމަލު ކުށްވެރިކޮށް މުސްލިމު ގިނަ ގައުމުތަކުން އަންނަނީ ނުރުހުން ފާޅުކޮށް ބަޔާން ނެރެމުންނެވެ.