އަވައްޓެރި އިންޑިޔާގެ މަހާރަޝްތްރާގައި ދުއްވާފައިދިޔަ ބަހެއްގެ ފުރޮޅެއް ފަޅައިގެން ގޮސް ނުރައްކާތެރި އެކްސިޑެންޓެއްވެ 25 މީހަކު މަރުވެއްޖެއެވެ.  

މިހާދިސާ ހިނގާފައިވަނީ ދުއްވާފައިދިޔަ ބަހުގެ ފުރޮޅު ފަޅައިގެންގޮސް ބަހުގެ ކޮންޓްރޯލް ނެއްޓި  ބަސް ދުއްވާފައިދިޔަ މަގުގެ ޑިވައިޑަރުގައި ޖެހި ބަހުގައި އަލިފާން ރޯވެގެންނެވެ. މި ހާދިސާގައި 25 މީހަކު މަރުވެފައިވެއެވެ. މިހާދިސާގައި 25 މީހުން މަރުވިއިރު އޭގެ ތެރޭގައި ތިން ކުޑަކުއްޖަކުވެސް ހިމެނެއެވެ.

މި ހާދިސާ ހިނގި ބަހުގައި 33 މީހަކު ދަތުރު ކުރަމުންދިޔައެވެ. ނާގްޕޫރުން ޕޫނޭ އަށް ދަތުރު ކުރަމުންދިޔަ ބަހުން ދަތުރު ކުރަމުން ދިޔަ 8 މީހަކަށްވަނީ އަލިފާނުގެ ސަބަބުން އެކިވަރުގެ އަނިޔާލިބިފައެވެ.

Advertisement

އިންޑިޔާ ޕޮލިހުން ބުނެފައިވަނީ ބަސް ދަތުރުކުރަމުން ދިޔަ އެކްސްޕްރެސްވޭގައި ހުރި ދަނޑިއެއްގައި ޖެހި ބަސް އޯވާޓޭކްކޮށްފައިވާ ކަމަށެވެ. ނަމަވެސް ހާދިސާއިން ސަލާމަތްވި ބަހުގެ ޑްރައިވަރު ބުނެފައިވަނީ ދަނޑީގައި ޖެހިފައިވަނީ ބަހުގެ ފުރޮޅު ފަޅައިގެން ދިޔުމުގެ ސަބަބުންކަމަށެވެ.

ޕޮލިހުން ބުނެފައިވަނީ ހާދިސާ ހިނގި ވަގުތު ބަހުގައި ދަތުރުކުރަމުންދިޔަ މީހުން ތިބީ ނިދާފައި ކަމަށެވެ. އަދި ހާދިސާގައި މަރުވި 25 މީހުން ތިބީ އަނދައިފައި ކަމަށެވެ.

ހާދިސާގައި މަރުވި ފަރާތްތަކުގެ އާއިލަތަކަށް އިންޑިޔާގެ ބޮޑުވަޒީރު ނަރެންދްރަ މޮޑީ ވަނީ ތައުޒިޔާ ފޮނުވައިފައެވެ.