ދިވެހިރާއްޖޭގައި އިންޑިޔާ ސިފައިން ތިބުމާއި ދެކޮޅަށް އިދިކޮޅު ޕީޕީއެމް/ޕީއެންސީން ކުރިއަށް ގެންދާ "އިންޑިއާ އައުޓް" ހަރަކާތަކީ އެއްވެސް ވަރަކަށް ތާއީދުކުރާ ހަރަކާތެއް ނޫން ކަމަށް، ރައީސް މުހައްމަދު ނަޝީދުގެ އަރިސް ބޭފުޅުން އުފައްދަވާފައިވާ ދަ ޑިމޮކްރެޓްސް ޕާޓީން ބުނެފި އެވެ.
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ވެރިކަން ނިމުމަކަށް ގެނައުމަށް، އިދިކޮޅު ޕީޕީއެމް/ޕީއެންސީ އާއި ޑިމޮކްރެޓްސް ވަނީ އެކުގައި މަސައްކަތް ކުރަން ފަށާފައެވެ. އެގޮތުން، ދެ ޕާޓީ އެކުގައި މަސައްކަތް ކޮށްގެންވެސް ރައީސް ޞާލިހު ވެރިކަމުން ބޭލުމަށް ކުރަން ހުރި ހުރިހާ ކަމެއް ކުރާނެ ކަމަށް ދެ ޕާޓީން ވަނީ ބުނެފައެވެ.
އެކަމާއި ގުޅޭ މަޝްވަރާ ބައްދަލުވުންތައްވެސް މިހާރު ފަށާފައިވާއިރު، މިއަދު ވަނީ ދެ ފަރާތުން ގުޅިގެން ބާއްވާ ތިން ވަނަ މަޝްވަރާ ބައްދަލުވުން ކުރިއަށް ގެންގޮސްފައެވެ. އެއަށްފަހު ބޭއްްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން، ޑިމޮކްރެޓްސް ގެ ފަރާތުން، އެސްޓީއޯގެ ކުރީގެ އެމްޑީ ހުސައިން އަމްރު ވަނީ ޕީޕީއެމް/ޕީއެންސީ އާއި އެކުގައި މަސައްކަތް ކުރި ނަމަވެސް އިންޑިއާ އައުޓް ހަރަކާތަށް ޑިމޮކްރެޓްސް އިން ތާއީދު ނުކުރާނެ ކަމަށް ވިދާޅުވެފައެވެ.
އެކަމާއި ގުޅިގެން، އިތުރު މައުލޫމާތު "ވޮއިސް" އަށް ދެއްވަމުން އަމްރު ވިދާޅުވީ، ދަ ޑިމޮކްރެޓްސް ގެ ޚާރިޖީ ސިޔާސަތު، އެއްވެސް ގައުމަކާއި ދެކޮޅު ހަރަކާތެއް ހިންގުމަށް ތަން ނުދޭ ކަމަށެވެ. އަދި ޚާއްސަކޮށް އަވަށްޓެރި ގައުމަކާއި "ޖައްސާލައިގެން" ނޫޅެވޭނެ ކަމަށް އޭނާ ވިދާޅުވި އެވެ.
އެހެންކަމުން، އިދިކޮޅާއި އެކު މަސައްކަތް ކުރި ނަމަވެސް، އިންޑިއާ އައުޓް ހަރަކާތަށް އެއްގޮތަކަށް ވެސް ތާއީދެއް ނުކުރައްވާނެ ކަމަށާ، އެ ކޯލިޝަނާއި އެކު ޚިޔާލު ތަފާތުވާ ކަންކަމުގައި ދެ ފަރާތުން ވާހަކަ ދައްކައިގެން ދޫ ދެވެން ހުރި ތަންތަނުގައި ދޫ ދެއްވި ނަމަވެސް، އިންޑިޔާ އައުޓް ހަރަކާތާއި ގުޅިގެން އެއްވެސް ދުލެއް ނުދެއްވާނެ ކަމަށް އަމްރު ވަނީ ތަކުރާރުކޮށް ވިދާޅުވެފަ އެވެ.
"އިންޑިއާ އައުޓް ހަރަކާތަކީ އަޅުގަނޑުމެން އެއްކޮށްވެސް ދެކޮޅު ހަރަކާތެއް. އެކަމަށް ތާއިދެއް ނުކުރަން. އެއްވެސް ގައުމަކާއި ދެކޮޅަށް ހިންގާ ހަރަކާތެއްގައި ބައިވެރި ނުވާނަން. އަދި ތާއީދެއްވެސް ނުކުރާނަން. ޕީޕީއެމް/ޕީއެންސީ ކޯލިޝަނާއި އެކުގައި، ދެ ފަރާތުންވެސް ދޫ ދެވެން ހުރި ކަންކަމުގައި ދޫ ދީ މަޝްވަރާތައް ދަނީ ކުރިއަށް. އެކަމަކު އިންޑިޔާ އައުޓް ހަރަކާތާއި ގުޅިގެން ދުލެއް ނުދެވޭނެ. އެކަމުގައި ދެން އެކޮޅުން (ޕީޕީއެމް/ޕީއެންސީ) އިން ގޮތެއް ނިންމުން އިންނާނީ. އަޅުގަނޑުމެންނަށް އެކަމަށް ތާއީދެއް ނުކުރެވޭނެ."
ހުސެއިން އަމްރު
އަމްރު މިފަދައިން ވިދާޅުވެފައި ވާއިރު، އިދިކޮޅުުން ކުރިއަށް ގެންދާ އިންޑިއާ އައުޓް ހަރަކާތް އެއްގޮތަކަށްވެސް ހުއްޓާ ނުލާނެ ކަމަށް އެ ކޯލިޝަނުން އަންނަނީ ބުނަމުންނެވެ.
އެގޮތުން އިދިކޮޅު ޕީޕީއެމްގެ ހަރަކާތު ކޮމިޓީގެ ޗެއާރ މުޙައްމަދު އިސްމާއިލް ވަނީ، ރާއްޖޭގައި ޤަވައިދާއި ޚިލާފަށް ތިބި އިންޑިއާ ސިފައިން އަނބުރާ ފޮނުވާލުމަށް ކުރިއަށް ގެންދާ ހަރަކާތަކީ އިދިކޮޅު ކޯލިޝަންގެ ލީޑަޝިޕްގެ ފުރިހަމަ ތާއީދާއެކު ހިންގާ ހަރަކާތްތަކެއް ކަމަށާ، އަދި އެ ހަރަކާތް ހުއްޓުވުމަށް ކިތަންމެ މަސައްކަތެއް ކުރި ނަމަވެސް ހަރަކާތް ހުއްޓުވޭނެ ގޮތެއް ވެސް ނޯންނާނެކަމަށް ވިދާޅުވެފައެވެ.
Advertisement
This content is created and paid for by advertisers and does not involve Voice Journalists
