ކުރީގެ ރައީސް އަދި ޕީޕީއެމް ޕީއެންސީގެ ރިޔާސީ ކެނޑިޑޭޓަށް ތާއީދު ހޯދުމަށް ދޮރުން ދޮރަށް ހަރަކާތެއް ބޭއްވުމަށް ހަމަޖެހިފައިވާކަމަށް ޕީޕީއެމް އިން ބުނެފިއެވެ.
ޕީޕީއެމް އިން ހާމަކޮށްފައިވާ ގޮތުގައި ރައީސް ޔާމިން ޢަބްދުالله ޤައްޔޫމަށް ތާއީދު ހޯދުމަށް ބާއްވާ މި ދޮރުން ދޮރަށް ހަރަކާތް އޮންނާނީ މިއަދުއެވެ. އަދި އެ ހަރަކާތް ފެށުމަށް ހަމަޖެހިފައިވަނީ މިއަދު 3:45 ގައެވެ.
މި ހަރަކާތް ފެށުމަށް ހަމަޖެހިފައިވަނީ ދޮންމަނިކު ސްކައި ވިއު ގައެވެ.
ޕީޕިއެމް ޕީއެންސީ ކޯލިޝަނުން ރައީސް ޔާމިންގެ ރިޔާސީ ކެމްޕެއިން މިއަދު ފަށާއިރު، އާރަށް ކުއްޔަށް ދިން ކަމަށް ބުނާ މައްސަލަ އާއި އަދި ދައުލަތުން އުފުލާފައިވާ ރިޝްވަތާއި މަނީ ލޯންޑަރިންގެ ދައުވާ ސާބިތުވާ ކަމަށް ކަނޑައަޅައި، 11 އަހަރުގެ މުއްދަތަކަށް ރައީސް ޔާމީން ވަނީ ޖަލަށްލައިފައެވެ.
މީގެ އިތުރުންވެސް އެމްއެމްޕީއާރްސީގެ ހިޔާނާތުގެ ތެރެއިން ރ. ފުއްގިރި ކުއްޔަށް ދޫކުރި މުއާމަލާތާ ގުޅިގެން އުފުލާފައިވާ މަނީލޯންޑަރިންގެ ދައުވާއާއި ރިޝްވަތުގެ ދައުވާގެ އަޑުއެހުންތައް މިހާރު ކްރިމިނަލް ކޯޓުގައި ދަނީ ކުރިއަށެވެ.
މިފަދަ ދައުވާތަކާއި އެކު ރައީސް ޔާމިން ޖަލަށް ލައި އަދި އިތުރަށްވެސް މިފަދަ ދައުވާ ތައް ކުރެވެމުން ދާއިރު ޕީޕީއެމް ޕީއެންސީ ކޯލިޝަނުން ބުނަމުންދަނީ އެ ކޯލިޝަންގެ ރިޔާސީ ކެނޑިޑޭޓަކީ ރައީސް ޔާމިން ކަމަށެވެ. އަދި އެކަމަށް ބަދަލެއް ނާންނާނެ ކަމަށް އެ ކޯލިޝަނުން ދަނީ ބުނަމުންނެވެ.
Advertisement
This content is created and paid for by advertisers and does not involve Voice Journalists
