މިއަދު މިއޮތީ މީގެ އަހަރުތަކެއް ކުރިން ކުރިފަދަ އިސްލާހީ މަސައްކަތްތަކެއް ކުރަން ޖެހިފައި ކަމަށް ކުރީގެ ނައިބުރައީސް ޑރ މުޙައްމަދު ޖަމީލު އަހުމަދު ވިދާޅުވެއްޖެ އެވެ.
ޑރ ޖަމީލު މިފަދައިން ވިދާޅުވެފައިވަނީ ރާއްޖޭގެ މިއަދުގެ ހާލަތަށް ރިއާޔަތްކޮށް ކުރެއްވި ޓްވީޓެއްގަ އެވެ.
އެގޮތުން ޑރ ޖަމީލު ވިދާޅުވީ މިއަދު ފެންނަމުންދާ މަންޒަރަކީ ސަރުކާރު ހިންގާ މައި ޕާޓީ އެމްޑީޕީން ބޯދާ ޒަމާނުގެ 30 އަހަރުގެ ކުރީކޮޅުގައި ކަންކަން ކުރަމުން ގެންދިޔަ އުސޫލަށްވުރެ ވެސް ގޯސްކޮށް ކަންކަން ކުރަމުންދާ މަންޒަރުކަމަށެވެ.
އަދި މިއަދު ވެރިކަން ކުރަމުންދާ ގޮތުގެ ބައެއް މިސާލުތައްވެސް ޑރ ޖަމީލުގެ ޓްވީޓުގައި ވަނީ ފާހަގަކުރައްވާފަ އެވެ.
"ގޭތެރޭ މީހުންގެ ބަދިގޭގެ ވެރިކަމެއް. މުދަލާއި ފައިސާ، މަގާމުތައް ހިތުހުރިގޮތަކަށް. އިންސާފަކީ ބިރުދައްކަން ގެންގުޅޭ ހަތިޔާރު"
ކުރީގެ ނައިބު ރައީސް ޑރ ޖަމީލު
ޑރ ޖަމީލު އިތުރަށް ވިދާޅުވީ މިއަދަކީ ހަޤީގީ މާނައިގައި ފަނޑިޔާރު ގެތަށް އިސްލާހުކުރަން ޖެހިފައިވާ ދުވަސް ކަމަށެވެ. އެއީ ފަހުގެ ތާރީޚެއްގައި ފަނޑިޔާރު ގެއަށް ނުފޫޒު ނުފޯރުވާ މިންވަރަށް މިހާރު ސަރުކާރުން ނުފޫޒު ފޯރުވަމުންދާތީކަމަށް ޑރ ޖަމީލު ވިދާޅުވި އެވެ.
އެކަން ފާހަގަކުރައްވާ ޑރ ޖަމީލު ވިދާޅުވީ ކޮންމެ ސިޔާސީ ޕާޓީއަކަށް ވެސް ރިޔާސީ އިންތިޚާބާއި ގުޅުންހުރި މަސައްކަތްތައް ކުރެވެން ޖެހޭނެ ކަމަށެވެ. އަދި އެފަދަ މާހައުލެއް ފަހިކޮށްދޭން ޖެހޭނެ ކަމަށެވެ.
އެމަނިކުފާނު އެފަދައިން ވިދާޅުވެފައިވާއިރު މިނިވަން އިންތިޚާބެއް ބޭއްވިދާނެ ކަމާމެދުވެސް ގިނަ ސިޔާސީ ޕާޓީތަކުން ދަނީ ސުވާލު އުފައްދަމުންނެވެ.
ރާއްޖޭގައި މަޝްރަހުގައި މިހާރު ހިނގަމުންދާ ޑިމޮކްރަސީއާއި ބީރައްޓެހި ކަންކަން ފާހަގަކުރައްވާ ޑރ ޖަމީލު ވިދާޅުވީ މީ އިސްލާހީ މަސައްކަތް ކުރަންވީ ވަގުތު ކަމަށެވެ.
ޑރ ޖަމީލުގެ އެ ޓްވީޓުގައި ވަނީ ޕީޕީއެމްގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމާއި، ކުރީގެ ރައީސް މުޙައްމަދު ނަޝީދުގެ ފޮޓޯފުޅެއް ހިއްސާ ކުރައްވާފަ އެވެ.
ނަޝީދު އިސްކޮށް ހުންނަވާ އުފައްދަވާފައިވާ ސިޔާސީ ޕާޓީ ދަ ޑިމޮކްރެޓްސްއާއި، ޕީޕީއެމުން ވަނީ މި ސަރުކާރު ބަދަލުކުރުމަށް ގުޅިގެން ކުރެވޭނެ ކަންކަމަކީ ކޮބައިތޯ ދެނެގަތުމަށް މަޝްވަރާކުރަން ފަށާފައެވެ.
Advertisement
This content is created and paid for by advertisers and does not involve Voice Journalists
