އިޒްރާއިލުން ހުއްޓުމެއްނެތި ފަލަސްޠީނުގެ ޖެނީންއަށް ވައިގެ މަގުން މިސައިލް ހަމަލާތައް ދެމުން އެބަގެންދެއެވެ.

ޖެނީންގެ ޢާންމުންނާއި ސަރުކާރުގެ އޮފިޝަލުންގެ ވާހަކަތަކުން އެނގޭގޮތުގައި ރެއިން ފެށިގެން އިޒްރާއިލުން ދަނީ ޖެނީންއަށް ހަމަލާތައް ދެމުންކަމަށް އަލްޖަޒީރާގައި ބުނެފައިވެއެވެ.

މިހަމަލާތަކުގެ ސަބަބުން މިހާތަނަށް ފަސް މީހަކު ޝަހީދުވެފައިވާ ކަމަށާއި، 27 މީހުން މިހާތަނަށް ޒަޚަމް ވެފައިވާއިރު އޭގެ ތެރެއިން 8 މީހެއްގެ ހާލު ނާޒުކު ކަމަށް އަލްޖަޒީރާގައި ބުނެފައިވެއެވެ.

Advertisement

ރެއިން ފެށިގެން މިހާތަނަށް އިޒްރާއިލް ސިފައިން ޖެނީން އަށް 10 މިސައިލެއް ފޮނުވައިލައިފައިވާ ކަމަށް ޖެނީންގެ ޢާންމުން ވަނީ ބުނެފައެވެ. އެހަމަލާތަކުގެ ސަބަބުން މުޅި ސަރަހައްދު ދުމުން ފުރި އެކި ޢިމާރާތްތަކަށް ވަނީ ބޮޑެތި ގެއްލުންތައް ލިބިފައެވެ.

ވައިގެ ހަމަލާތަކުގެ އިތުރުން އިޒްރާއިލް ސިފައިން ވަނީ ޖެނީންގެ ވަށައިގެން މިލިޓަރީ ވެހިކަލްތައް ޖައްސައި ޖެނީން ބަންދު ކޮށްފައެވެ. އަދި ޖެނީންގައި ވަރުގަދަ މިލިޓަރީ ރެއިޑެއް ވަނީ ފަށައިފައެވެ. މިލިޓަރީ ވެހިކަލް ތަކުގެ ސަބަބުން ޖެނީންގެ ޢިމާރަތް ތަކާއި މަގުތައް ވަރަށް ބޮޑަށް ހަލާކުވެފެއި ވާކަމަށް އަލްޖަޒީރާގައި ވަނީ ބުނެފައެވެ.

އިޒްރާއިލްގެ ސިފައިން މިލިޓަރީ ވެހިކަލްތަކާއި އެކު ގޮސް ޖެނީން ސިޓީ އެއްކޮށް ވަނީ ބަންދުކޮށްފައެވެ. ސިޓީ އިން ނުކުމެވޭނެ ގޮތެއް އަދ ސިޓީ އަށް ވަދެވޭނެ މަގެއްވެސް ނެތެވެ.

ޖާރުއްސަލަމްގައި ހުންނަ އަލްޖަޒީރާގެ ނޫސްވެރިޔާ ބުނެފައިވަނީ 150 މިލިޓަރީ ވެހިކަލާއި، 1000 ސިފައިން، އިންޓެލިޖެންސް، ބޯޑަރ ޕޮލިސް،، ޕޮލިސް އަދި ސިފައިންނާއި ފުލުހުންގެ ޚާއްސަ އޮފިސަރުން ހިމެނޭހެން އިޒްރާއިލްގެ ޔަހޫދީން މިލިޓަރީ ރެއިޑް ހިންގުމުގެ ނަމުގައި ވަދެފައިވާ ކަމަށެވެ.

އޭނާ އިތުރަށް ބުނެފައިވަނީ ޖެނީންގެ ގޭގެއަށް ވަދެ ބަލާ ފާސްކުރުމާއި ގިނަ ޢަދަދެއްގެ ބަޔަކު އިޒްރާއިލް ސިފައިން ހައްޔަރުކުރަމުންދާ ކަމަށެވެ.

ޖެނީންއިން ވާހަކަ ދެއްކި މީހަކު އަލްޖަޒީރާއަށް ބުނެފައިވަނީ އިޒްރާއިލުން މަގުތައް ބަންދު ކުރުމުގެ ސަބަބުން ސިއްޚީ އަވަސް ފަރުވާ ދޭ ފަރާތްތަކަށް ޒަޚަމްވެފައިވާ ފަރާތްތަކާއި ހަމައަށް ފޯރުމަށް ދަތިވެފައިވާ ކަމަށެވެ.