ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ވެރިކަން ބަދަލުކުރުމަށް ގުޅިގެން މަސައްކަތް ކުރާނެ ގޮތްތަކެއް ހޯދުމުގެ މަޝްވަރާތައް ދަ ޑިމޮކްރެޓްސްއިން ޕީޕީއެމް އާއެކު ފެށިއިރުވެސް އެ ޕާޓީން ގެންދަނީ ގަވައިދާއި ޚިލާފަށް ރާއްޖޭގެ އެކި ކަންކޮޅުތަކުގައި ތިބި އިންޑިއާ ސިފައިން އަނބުރާ ފޮނުވާލުމަށް އެ ޕާޓީން އިސް ނަގައިގެން ކުރިއަށް ގެންދާ "އިންޑިއާ އައުޓު" ހަރަކާތް ހިންގަމުން ކަމަށް އިދިކޮޅު ކޯލިޝަންގެ އެކްޝަން ޑިޕާޓުމަންޓުގެ ޗެއާ އަދި މަޖިލީހުގެ ހޯރަފުށީ ދާއިރާގެ ކުރީގެ މެމްބަރު މުޙައްމަދު އިސްމާއިލް ވިދާޅުވެއްޖެ އެވެ. 

މުޙައްމަދު އިސްމާއިލް މިފަދައިން ވިދާޅުވެފައި ވަނީ އިންޑިއާ އާއި ދިވެހިރާއްޖެއާއި ދެމެދުގައި އޮންނަ ގުޅުމަށް ބުރޫއަރާގޮތަށް ކުރިއަށް ގެންދާ އިންޑިއާ އައުޓު ހަރަކާތްތަކުގައި ބައިވެރިވާ ޕާޓީތަކާއެކު މަސައްކަތް ކުރުމަށް ދަ ޑިމޮކްރެޓްސްއަށް ދަތިވާނެކަމަށް، އެ ޕާޓީގައި އެންމެ އިސްކޮށް ހަރަކާތްތެރިވާ ރައްޔިތުންގެ ޖިލީހުގެ ހެންވޭރު ހުޅަނގު ދާއިރާގެ މެމްބަރު ހަސަން ލަތީފު ވިދާޅުވުމާއި ގުޅިގެން ކުރެއްވި ޓްވީޓެއްގަ އެވެ. 

މި ސަރުކާރު ބަދަލުކުރުމަށް އެކުގައި މަސައްކަތް ކުރެވިދާނެ ގޮތްތަކެއް ހޯދުމަށް ޕީޕީއެމާއި ދަ ޑިމޮކްރެޓްސް ބައްދަލުވުންތަކެއް ބާއްވަމުންދާއިރު، ހަސަން ލަތީފު ވިދާޅުވީ ދޭދޭ ގައުމުތަކާއި އޮންނަ ގުޅުމަށް ބުރޫއަރާގޮތަށް ހިންގާ އެއްވެސް ހަރަކާތަކަށް އެ ޕާޓީން ތަރުހީބު ނުދޭނެ ކަމަށެވެ. އަދި އެފަދަ ހަރަކާތެއް ހިންގާ ޕާޓީއަކާއެކު މަސައްކަތް ކުރުމަކީ ވެސް ދަތިކަމަކަށް ވާނެ ކަމަށެވެ. 

Advertisement

ޕީޕީއެމާއެކު މިހާރު ކުރިއަށްދާ މަޝްވަރާތަކުގެ ތެރެއިން އިންޑިއާ އައުޓު ހަރަކާތައް ވެސް ކޮންމެވެސް ވަރެއްގެ ޙައްލެއް ލިބިގެންދާނެކަމަށް ޤަބޫލުކުރައްވާކަމަށް ހަސަން ލަތީފު ވިދާޅުވި އެވެ. 

ހަސަން ލަތީފުގެ އެ ވާހަކަތަކަށް ރައްދުދެއްވާ މުހައްމަދު އިސްމާއިލް ކުރެއްވި ޓްވީޓެއްގައި ވިދާޅުވީ ސިޔާސީ މަސައްކަތް އެކުގައި ކުރުމަށް ޕީޕީއެމުން އެއްބަސްވާނީ ޕީޕީއެމްގެ އުސޫލުތަކާއި އެއްގޮތަށް ހަރަކާތްތެރިވުމަށް ކަމަށެވެ. 

އެގޮތުން ޕީޕީއެމް އިސްވެ އޮވެ ހިންގާ "އިންޑިއާ އައުޓު" ހަރަކާތަކީ ދިވެހިރާއްޖޭގެ މިނިވަންކަމާއި އިސްތިގުލާލު ގެއްލުމުގެ ބިރު އޮތުމުން ކުރިއަށް ގެންދާ ހަރަކާތެއް ކަމަށާއި، އެ ހަރަކާތް ހަމަ އެގޮތުގައި ޕާޓީން ކުރިއަށް ގެންދާނެކަމަށް މުޙައްމަދު އިސްމާއިލް ވިދާޅުވި އެވެ. 

އެއާއެކު އޭނާ ވިދާޅުވީ ދަ ޑިމޮކްރެޓްސްއިން ޕީޕީއެމާއެކު މަޝްވަރާކުރުމަށް އެއް މޭޒަކަށް އައިރުވެސް އެ ޕާޓީން ގެންދަނީ ހުއްޓާނުލާ އިންޑިއާ އައުޓު ހަރަކާތް ކުރިއަށް ގެންދަމުން ކަމަށެވެ. 

ރައީސް ޔާމީން އިސްވެހުންނަވާ އިންޑިއާ އައުޓު ހަރަކާތެއް ހިންގަނީ 

އޭގެ އިތުރުން، އިންޑިއާގެ އަޅުވެތިކަމުން މި ގައުމު ސަލާމަތް ވަންދެން އެ ހަރަކާތް ހުއްޓާނުލާ ކުރިއަށް ގެންދާނެކަމުގެ ޔަގީންކަން ދޭ ކަމަށް މުޙައްމަދު އިސްމާއިލް ވަނީ ވިދާޅުވެފަ އެވެ.