ފަލަސްޠީނުގެ ޖެނީން ސިޓީއަށް އިޒްރާއިލްގެ ސިފައިން ވައިގެ މަގުންނާއި ބަޑިން ދިން ހަމަލާތަކުގެ ސަބަބުން މިހާތަނަށް 10 މީހަކު ޝަހީދުވެފައިވާއިރު ރައްކާތެރި ކަމުގެ ފިޔަވަޅެއްގެ ގޮތުން 3000 އެއްހާ މީހުން އެހެން ސަރަހައްދުތަކަށް ގެންގޮސްފިއެވެ.

ޖެނީންގައި އިޒްރާއިލުން ހިންގި ޖަރީމާގައި 10 މީހަކު ޝަހީދުވެފައިވާއިރު، ރާމައްﷲގައި ވެސް ވަނީ މީހަކު ޝަހީދު ކޮށްލައިފައެވެ. ޖެނީން ސިޓީގައި ޝަހީދުވި 10 މީހުންގެ ތެރޭގައި ކުޑަ ތިން ކުއްޖަކުވެސް ހިމެނެއެވެ.

ފަލަސްޠީނުގެ ރެޑް ކްރޮސެންޓުން ބުނެފައިވަނީ 14000ހާ މީހުން ދިރިއުޅޭ ޖެނީން ސިޓީ އިން 3000 މީހުން ރައްކާތެރި ކަން ހޯދައި ދިނުމުގެ ގޮތުން އެ ސިޓީ އިން ބޭރަށް ގެންގޮސްފައިވާ ކަމަށެވެ.

Advertisement

ޢުމުރުން ދުވަސްވީ މީހުންނާއި ކުޑަކުދިންނަށް ރައްކާތެރިކަމާއި ސަލާމަތްތެރިކަން ހޯދައި ދިނުމަށް ޖެނީން ގެ ހޮސްޕިޓަލްތަކަށް ގެންދިޔުމުން އިޒްރާއިލްގެ ސިފައިންވަނީ ހޮސްޕިޓަލުތަކަސް ކަރުނަ ގޭސް ޖަހައި ފައި ކަމަށް އަލްޖަޒީރާގައި ބުނެފައިވެއެވެ.

ޖެނީންގެ ޙާލަތާއި ގުޅޭ ގޮތުން މަޢުލޫމާތު ދެއްވަމުން ފަލަސްޠީނުގެ ހެލްތް މިނިސްޓަރ މައި އަލް ކައިލާ ވިދާޅުވެފައިވަނީ ޖެނީންގެ ހާލަތު ވަރަށް ގޯސް ކަމަށެވެ. ދިމަވެފައި ވަނީ ދަތި އަދި އުނދަގޫ ހާލަތެއް ކަމަށެވެ.

އެގޮތުން  ފަލަސްޠީނުގެ ރައްޔިތުންނާއި ދެކޮޅަށް އިޒްރާއިލް ސިފައިން ދިން ހަމަލާ ތަކުގެ ސަބަބުން ފެނާއި ކަރަންޓު ފަދަ އަސާސި ޚިދްމަތްދޭ އިމާރާތްތަކަށް ގެއްލުންވުމުގެ ސަބަބުން އެ ޚިދުމަތްތައް ދިނުމަސް ދަތިވެފައިވާ ކަމަށެވެ. އަދި މިކަން ޚާއްސަ ކޮށް ދިމަވެފައިވަނީ ޖެނީންގެ ރެފިޔުޖީ ކޭމްޕުގައި ކަމަށް މައި އަލް ކައިލާ ވިދާޅުވެފައިވެއެވެ.

އަލް ޖަޒީރާއަށް މައުލޫމާތު ދެއްވަމުން ކައިލާ ވިދާޅުވެފައިވަނީ އެކި ވަރުގެ ޒަޚަމްތައް ލިބިފައިވާ މީހުން ހޮސްޕިޓަލުތަކިގައި ތޮއް ޖެހިފައިވާ ކަމަށާއި، މަގުތައް ބަންދުކުރުމާއި އާމާންކަން ނެތުމުގެ ސަބަބުން ސިއްޚީޚިދްމަތް ތެރިންނަށް ހޮސްޕިޓަލްތަކަށް އާދެވޭނެ ގޮތް ނެތިފައިވާކަމަށެވެ.

ޖެނީންއަށް ދެމުންދާ ހަމަލާތަކާއި ޖެނީންގައި ހިންގަމުންދާ ލާއިންސާނީ ޢަމަލުތަކާއި ދެކޮޅަށް އަޑު އުފުލުމަށް ފަލަސްޠީނުގެ ރައްޔިތުންދަނީ މުޒާހަރާ ކުރަމުންނެވެ.

މިމުޒާހަރާތަކުގައި ފަލަސްޠީނުގެ ޒުވާނުން ދަނީ އިޒްރާއިލްގެ ސިފައިންނާއި ކުރުމަތިލަމުންނެވެ. އެގޮތުން ފަލަސްޠީނުގެ ޒުވާނުންދަނީ އޮއްގަލުންނާއި އަލިފާނުން ބޮންހަދައި އިޒްރާއިލްގެ ސިފައިންނަށް ހަމަލާދެމުންނެވެ. އޭގެ ރައްދުގައި އިޒްރާއިލް ސިފައިން ރަބަރު އުންޑަޔާއި ކަރުނަ ގޭހުން ދަނީ ފަލަސްޠީނުގެ ޒުވާނުންނަށް ހަމަލާދެމުންނެވެ.

ފަލަސްޠީނުގެ ހުޅަނގު އައްސޭރީގެ ގިނަ އަވައްތަކަކުން ވަނީ ޖެނީންގެ ޙާލަތާއި މެދު ކަންބޮޑުވުން ފާޅުކޮށް މުޒާހަރާއަށް ނުކުމެފައެވެ. މުޒާހަރާއަށް ނުކުމެ އިޒްރާއިލް ސިފައިންނާއި ކުރިމަތިލަމުންދާ ޒުވާނުންގެ ތެރެއިން އެކަކު ވަނީ ވަރަށް ބޮޑަށް ޒަޙަމްވެފައި ކަމަށް އަލްޖަޒީރާގައި ވަނީ ބުނެފައެވެ. އަދި އޭނާ އަށް ހޮސްޕިޓަލުގައި ފަރުވަ ދެމުންދާއިރު އެތައް ބަޔަކަށް ކަރުނަ ގޭހުގެ އަސަރުކޮށްފައި ވާކަމަށްވެސް ވަނީ ބުނެފައެވެ.

ހޯމަދުވަހުގެ ރޭ އިޒްރާއިލް ސިފައިން މިލިޓަރީ ރެއިޑްގެ ނަމުގައި 1000 ވުރެ ގިނަ ސިފައިންނާއި ފުލުހުން އަދި ޒަމާނީ ހަތިޔާރުތަކާއި އެކު ފެށި ރެއިޑު އަދިވެސް ނިންމައިލައި ފައެއް ނުވެއެވެ. މި ރެއިޑުގައި 100 އަށް ވުރެ ގިނަ މީހުން ޒަޚަމްވެފައިވެއެވެ.

އަދި އިޒްރާއިލް ސިފައިންވަނީ ފަލަސްޠީނުގެ އެތައް ބަޔަކު ހައްޔަރުވެސް ކޮށްފައެވެ.