ސްވިޑެން އިން ބޭއްވި ކީރިތި ޤުރުއާން އެންދުމުގެ ހަރަކާތާއި ރައްދުދީ، އިރާގުގެ ފުޓުބޯޅަ ޓީމަކާއި، ސަޕޯޓަރުން، ގުރުއާން އަށް އޮތް ލޯބި ދައްކާލައިފިއެވެ. 

އެގޮތުން، ވެރިރަށް ބަގުދާދުގައި، އަލް ޝޯޓާއި، އަލް ޤަސިމް ޓީމާއި ދެމެދު ކުޅެވުނު މެޗު ފެށުމުގެ ކުރިން، ކުޅުންތެރިންނާއި އޮފިޝަލުން ކީރިތި ޤުރުއާން މުސްޙަފެއް ހިފައިގެން ފޮޓޯ ނަަގައި، މުސްހަފަށް ބޮސްދޭ މަންޒަރު ފެންނަ ވީޑިއޯއެއް މިހާރު މީސްމީޑިއާގައި ވަނީ ވައިގައި ހިފާފައެވެ. 

ކުޅުންތެރިންގެ އިތުރުން މެޗަށް ސަޕޯޓް ކުރުމަށް ދަނޑަށް ވަދެ ތިބި މީހުން ވަނީ "ގުރުއާނަކީ ނިމުމެއް ނުވާ ގާނޫނެއް ކަމަށާ، އެ ގުރުއާން ރައްކާކޮށް، ގުރުއާނުގެ ދިފާއުގައި ނުކުތުމަކީ މުސްލިމުންނަށް ވާޖިބެއް" ކަމަށް ލިޔެފައިވާ ބެނާ ދަމާފައެވެ. 

އަޟުހާ ޢީދު ދުވަހު، ޢިރާޤުން ސްވިޑެން އަށް ހިޖުރަ ކޮށް ސްވިޑެންގައި ދިރިއުޅެމުންދާ ސަލްވާން މޮމިކާ ނަމަކަށް ކިޔާ މީހަކު ވަނީ ސްޓޮކްހަމްގެ އެންމެ ބޮޑު މިސްކިތުގެ ކުރިމަތީގައި ކީރިތި ޤުރުއާން މުސްޙަފެއްގެ ތެރެއަށް އޫރުމަސް އަޅައި, ގުރުއާންއަށް އިހްތިރާމް ކުޑަކޮށް މުސްހަފުގައި އަލިފާން ރޯކޮށްލައިފައެވެ.

އެކަން އޭނާ ކުރި އިރު، ސްވިޑެން ގެ ސަރުކާރުގެ ފުލުހުން ތިބީ އޭނާ އަށް ހިމާޔަތް ދިނުމަށް އޭނާ ހުރި ސަރަހައްދު ބަންދު ކޮށްގެން، އެތަނުގެ ސެކިޔުރިޓީންގެ ގޮތުގައެވެ. އަދި މުސްހަފު ރޯކުރުން ހުއްޓުވަން ދިޔަ މީހުންނަށް ހުރަސް އަޅައި އެކަކު ފުލުހުން ހައްޔަރުވެސް ކުރިއެވެ.

އެކަމާއި ދެކޮޅަށް ގިނަ ގައުމުތަކުން އަޑު އުފުލާފައި ވާއިރު އެންމެ ބޮޑަށް ދެކޮޅު ހަދައި، އިހުތިޖާޖު ކޮށްފައިވަނީ، އިރާގުންކަން ފާހަގަކޮށްލަންޖެހެއެވެ.