ކޭ-ޕާރކް ޕާޓްމެންޓްތަކެއް ވިއްކުމުގެ ނަމުގައި މަކަރާއި ހީލަތްހަދައި، ބޮޑެތި ޢަދަދުތަކުން ގިނަ ބައެއްގެ އަތުން ފައިސާ ނެގި މައްސަލައާއި ގުޅިގެން ރާއްޖެ އިން ބޭރަށް ނުދެވޭ ގޮތަށް ޕާސްޕޯޓް ހިފަހައްޓާފައިވާ ހަސަން މަމްދޫހް (މަންޑޭ)ގެ ޕާސްޕޯޓު ދޫކޮށްލުމަަށް ކްރިމިނަލް ކޯޓުން މިއަދު އަމުރު ނެރެފިއެވެ.
ފުލުހުންގެ މީޑިއާ އޮފިޝަލް ވިދާޅުވީ ލ ކޭ ޕާކް މައްސަލައިގައި ތުހުމަތު ކުރެވޭ މަމްދޫހް ފުރުން މަނާ ކުރުމަށް ނެރެފައިވާ އަމުރު މިއަދު ކްރިމިނަލް ކޯޓުން ބާތިލްކޮށްފައިވާ ކަމަށެވެ.
އަދި މި ނިންމުން ހައި ކޯޓުގައި އިސްތިއުނާފްކޮށް ދިނުމަށް ޕްރޮސެކިއުޓާ ޖެނެރަލް (ޕީޖީ) އޮފީހުގައި އެދޭނެ ކަމަށް ވެސް ފުލުހުން ބުނެފައިވެއެވެ.
ހަންބޯ ކުންފުންޏާއި އާބަންކޯއާއިއެކު ހަދާފައިވާ އެއްބަސްވުމުގެ ދަށުން ހުޅުމާލޭގައި ޢިމާރާތްކޮށްކުރަމުންދާ ކޭ-ޕާކް ރެސިޑެންސްގެ އެޕާޓްމަންޓްތައް ހަންބޯ ކުންފުނީގެ ނަމުގައި ހަދާފައިވާ ފޯޖު ލިޔުންތައް ބޭނުންކޮށްގެން އެޕާޓްމަންޓްތައް އާންމުނަށް ވިއްކަމުންދާކަމަށް ތުހުމަތުކުރެވޭ މައްސަލަ ފުލުހަށް ހުށައެޅީ އާބަންކޯއިންނެވެ.
އެ މައްސަލާގައި މަމްދޫހުގެ ޕާސްޕޯޓް ހިފެހެއްޓީ މެއި މަހުގެ ކުރީ ކޮޅުގައެވެ. މަމްދޫހަކީ ހަންބޯ މޯލްޑިވްސް ކުންފުނި ދިވެހި ހިއްސާދާރެކެވެ. އެ މައްސަލާގައި މަމްދޫހުގެ އިތުރުން، އިތުރު ދެމީހެއްގެ ޕާސްޕޯޓް ވެސް ވަނީ ހިފަހައްޓާފައެވެ.
Advertisement
This content is created and paid for by advertisers and does not involve Voice Journalists
