އިންޑިޔާގެ ވެރިކަންކުރާ ޕާޓީ ބީޖޭޕީގެ މެމްބަރަކު އިންޑިޔާގެ ފަގީރެއްގެ ގަޔަށް ކުޑަ ކަމުދާ މަންޒަރު ދައްކުވައިދޭ ވީޑިއޯ އެއް ޢާންމުވެއްޖެއެވެ.

މިކަން ހިނގާފައިވަނީ އިންޑިޔާގެ މަދްޔަ ޕްރަދޭޝްގެ ސިއްދީ ޑިސްޓްރިކް ގައެވެ. މި ވީޑިއޯގައި ފެންނަ ބީޖޭޕީގެ މެމްބަރަކީ ބީޖޭޕީގެ ލީޑަރެއް ކަމަށްވާ ޕްރަވޭޝް ޝުކްލާ ކަމަށް އިންޑިޔާގެ ނޫހެއް ކަމަށްވާ ޓައިމްސް ނައު ގައި ބުނެފައިވެއެވެ.

އެނޫހުގައި އިތުރަށް ބުނެފައިވަނީ މި ހާދިސާ ހިނގާފައިވަނީ މީގެ ނުވަ ދުވަސްކުރިން ކަމަށެވެ. އަދި ވީޑިއޯ މިހާރު ވައިރަލް ވަމުންދަނީ ކަމަށެވެ. އަދި އެކަން ކުރި އިރު ޕްރަވޭޝް ޝުކްލާ ހުރީ ރާބޮއެގެން މަސްތުގެ ޙާލަތުގައި ކަމަށެވެ.

Advertisement

މި ކަމާއި ގުޅިގެން ކޮންގްރެސް އިން ދަނީ ބީޖޭޕީއަށް ބަހުގެ ހަމަލާތައް ދެމުންނެވެ. އެގޮތުން ކޮންގްރެސްގެ ސްޕޯކްސްޕާސަން އައްބާސް ހަފީޒް ކޮށްފައިވާ ޓްވީޓެއްގައި ބުނެފައިވަނީ އިންޑިޔާގެ ގަބީލާތަކުގެ މީހުންގެ ކުރިއެރުމާއި ގުޅޭ ގޮތުން ވާހަކަ ދައްކާ ބީޖޭޕީގެ ލީޑަރު މިފެންނަނީ ގަބީލާއެއްގެ ފަގީރު ކުއްޖެއްގެ ގަޔަށް ކުޑަކަމުދާ މަންޒަރުކަމަށެވެ.

އިންޑިޔާގެ އެމްއެލްއޭ އެއް ކަމަށްވާ ކޭދަރް ނާތް ޝުކްލާ ބުނެފައިވަނީ މި ޢަމަލު ކުށްވެރިކުރާ ކަމަށާއި މިއީ ބަލައިގަނެވޭނެ ކަމެއް ނޫން ކަމަށެވެ. އަދި ގަބީލާތަކުގެ މީހުންނަށް އޭނާގެ ހިތުގައި އޮތް ލޯތްބަކީ އެއީ ތޯ ވަނީ ސުވާލުކޮށްފައެވެ. އޭނާ ބުނެފައިވަނީ މިއީ ޖަންގަލީގެ އުސޫލު ކަމަށެވެ. އަދި އެކަން ކުރި ބީޖޭޕީ ލީޑަރު ހައްޔަރު ނުކުރަނީ ކީއްވެގެންތޯ ވެސް ވަނީ ސުވާލުކޮށްފައެވެ.

މި ވީޑިއޯ ޢާންމު ވުމަށްފަހު މަދްޔަ ޕްރަދޭޝްގެ ޗީފް މިނިސްޓަރ ޝިވްރާޖް ސިންހް ޗައުހާން ބުނެފައިވަނީ މިކަން ކުރި މީހާއަށް ފިޔަވަޅު އަޅާނެ ކަމަށެވެ. އޭނާ ކޮށްފައިވާ ޓްވީޓުގައި ބުނެފައިވަނީ އެކަން އޭނާގެ ސަމާލުކަމަށް އައިސްފައިވާ ކަމަށާއި، އެޢަމަލު ކުރި މީހާ ހައްޔަރުކުރަން ކަމާއިބެހޭ ފަރާތްތަކަށް އަންގައިފައިވާނެ ކަމަށްވެސް އޭނާ ވަނީ ބުނެފައެވެ.