މާލޭ ސިޓީ ކައުންސިލްގެ މޭޔަރު ޑރ މުހައްމަދު މުއިއްޒު ނޫން އެހެން އެއްވެސް ބޭފުޅަކަށް މާލޭ ރައްޔިތުންނަށް ގޯތި ދިނުމުގެ ގާނޫނީ ހައިސިއްޔަތު ނެތް ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ނަޝީދު މިފަދައިން ވިދާޅުވީ، އެމަނިކުފާނަށް ތާއީދު ކުރައްވާ މެމްބަރުން އިސްވެ ހުންނަވައި އަލަށް އުފައްދަން އުޅުއްވާ "ދަ ޑިމޮކްރެޓްސް" ޕާޓީ އުފެއްދުމަށް ރޭ ބޭއްވި ޖަލްސާގައި ވާހަކަދައްކަވަމުންނެވެ.
އެގޮތުން ނަޝީދު ވިދާޅުވީ، ރާއްޖޭގެ ރައްޔިތުން އެދި ގޮވަމުންދާ ގިނަ ކަންކަން ހުރި ކަމަށެވެ. އެގޮތުން، ރަށްރަށާއި ސިޓީ ތަކުގެ ކައުންސިލަރުންނާއި މޭޔަރުން އެދެމުންދިޔައީ ލާ މަރުކަޒީ ނިޒާމުގެ ދަށުން ސަރުކާރުން ކަންކަން ނިންމުމަށް ކައުންސިލް ތަކަށް ބާރު ދިނުން ކަމަށް ކަން ނަޝީދު ފާހަގަކުރެއްވިއެވެ.
"ލާ މަރުކަޒީ ނިޒާމުގެ އަސާސަކީ، ތިމަންނާގެ ރަށުގައި، ތިމަންނަގެ އިހްތިސާސްގައިވާ ތަކެއްޗަކީ ތިމަންނަގެ މިލްކިއްޔާތެކޭ. ތިމަންނަގެ މުދަލޭ. އެ މުދާ އެހެން މީހަކު އައިސް ދިނުން، އެ މުދާ ވިއްކާން އެހެން މީހަކު އުޅުން އެއީ، އަޅުގަނޑުމެން ބައްޓަންކުރި، ބިނާ ކުރި, ލާ މަރުކަޒީ ނިޒާމް ބުނާ ގޮތެއް ނޫން."
ރައީސް މުހައްމަދު ނަޝީދު
ރައީސް މުހައްމަދު ނަޝީދު-- ފޮޓޯ/ ވޮއިސް
"އަޅުގަނޑުމެން މިރޭ ހިތްހަމަ ޖެހުނަސް ނުޖެހުނަސް މާލޭގެ މޭޔަރު މުއިއްޒު ނޫން ބޭފުޅަކު މާލޭގެ ރައްޔިތުންނަށް ގޯތި ދިނުމުގެ ގާނޫނީ ހައިސިއްޔަތެއް ނެތް. މާލޭގެ ރައްޔިތުންނަކީ ރާއްޖޭގެ ހުރިހާ ރައްޔިތުންގެ ތެރެއިން އެންމެ ގިނަ ނިކަމެތި ރައްޔިތުން އުޅޭ ތަން. ވަންނާނެ ތަނެއް ނެތް. ބޯހިޔާވަހިކަމެއް ނެތް. ހަމައަށް ތިން އިރު ނުކައި ގެވެހި އަނިޔާއާއި ޑްރަގްސްގެ ވަބާއާއި ގޭންގް މާރާމާރީ އެ މީހުންގެ ގެތައް އެތިބީ ދަންތުރައަކަށް ވެފައި"
ރައީސް މުހައްމަދު ނަޝީދު
ރައީސް ނަޝީދު ވިދާޅުވީ މާލޭގެ ރައްޔިތުންނަށާއި، އެހެން އެންމެނަށްވެސް ހަމަހަމަވާ ގޮތުގައި ގޯތި ދޭންޖެހޭ ކަމަށެވެ. އަދި މާލޭގައި ދިރިއުޅެމުންދަނީ ނުހަނު ނިކަމެތި ބައެއް ކަން ފާހަގަކުރައްވައި އެމަނިކުފާނު ވަނީ، އެއްވެސް ވެރިއެއްގެ ސިޔާސީ ބޭނުމަށްޓަކައި ރައްޔިތުންނަށް އޮޅުވާލުމަކީ ހިތާމަ ކުރައްވާ ކަމެއް ކަމަށް ވިދާޅުވެފައެވެ.
"ވަންނާނެ ތަނެއް ނެތް. ދަރިންނާ އަޅާލެވޭނެ ގޮތެއް ނެތް. ދެން ކެވޭނެ ގޮތެއް ނެތް. މެދަށް ހުރި ދަރި ގޭންގަކަށް ވަދެއްޖެ. ދޮށީ ދަރި ގޭންގްގެ ވަބާގައި. އަންހެން ދަރި ގެވެށި އަނިޔާގައި. ދެން އޭނާގެ ވޯޓު ގަނެލުމަށްޓަކައި ގޯއްޗެއް ދޭނަމާ ކިޔާ ދޮގު ހެދުމަކީ އަޅުގަނޑު ދެކޭ ގޮތުގައި އެއްވެސް މީހަކު ކޮށްގެންވާނެ ކަމެއް ނޫން. އަދި އެކަން ކުރާ މީހަކަށް އެއްވެސް ހާލެއްގައި މާފެއް ވެސް ނުދެވޭނެ."
ރައީސް މުހައްމަދު ނަޝީދު
ނަޝީދު އިތުރަށް ވިދާޅުވީ މާލޭގަ ރައްޔިތުން އިންތިހާއަށް ބޭނުންވެފައިވާ ކަންކަން ހުރި ކަމަށެވެ. އެގޮތުން، ބޯހިޔާވަހިކަމުގެ މައްސަލަ ހައްލުކޮށް ދިނުމަށް ތަކުރާރުކޮށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ގެ އަރިހުން އެމަނިކުފާނު ދެންނެވި ކަމަށާ، އެހެން ނަމަވެސް، ވެރިކަން ކުރައްވާތާ 5 އަހަރު ވެގެންދިޔައިރުވެސް، އެންމެ ރައްޔިތަކަށްވެސް ބޯހިޔާވަހިކަން ފޯރުކޮށްނުދެއްވާ ކަމަށް ނަޝީދު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
