އިދިކޮޅު ރިޔާސީ ކެންޑިޑޭޓް، ރައީސް އަބްދުالله ޔާމީން އަބްދުލްގައްޔޫމް ނޫން ލީޑަރަކަށް މި ގައުމު ސަލާމަތް ކުރެވޭނެ ކަމަށް ރައްޔިތުން މިއަދު ގަބޫލު ނުކުރާ ކަމަށް އިދިކޮޅު ކޯލިޝަން ހިންގުމާއި ހަވާލުވެ ވަޑައިގެން ހުންނެވި އަބްދުއްރަހީމް އަބްދުالله ވިދާޅުވެއްޖެ އެވެ.
ދަ ޑިމޮކްރެޓްސް އުފެއްދުމަށް ޣިޔާސުއްދީން ސްކޫލްގައި ރޭ ބޭއްވި ޖަލްސާގައި ވާހަކަ ދައްކަވަމުން މަޖިލީހުގެ ރައީސް މުހައްމަދު ނަޝީދު ވަނީ، ސެޕްޓެމްބަރުގައި އޮންނަ ރިޔާސީ އިންތިހާބުގައި އެމަނިކުފާނާއި ޔާމީން ކުރިމަތިނުލައްވައި ދެ ބޭފުޅުން އެކުގައި ބާރަށް މަސައްކަތް ކުރައްވައިގެން ރައްޔިތުން އެދޭ ގޮތް ހޯދައިދޭން ޖެހޭ ކަމަށް ވިދާޅުވެފައެވެ.
އެކަމަށް ރައްދު ދެއްވައި، އަދުރޭ ކުރެއްވި ޓްވީޓެއްގައި ވިދާޅުވީ، މިއަހަރުގެ ރިޔާސީ އިންތިޚާބުގައި ރައީސް ޔާމީން ވާދަ ކުރައްވާނެ ކަމަށެވެ.
އަދި ރައްޔިތުން ބޭނުންވާ ރަނގަޅުގޮތް ހޯދައި ދެވޭނެކަމަށް ރައްޔިތުން ގަބޫލުކުރަނީ ރައީސް ޔާމީން ރާއްޖޭގެ ޒަޢާމަތާ ޙަވާލުވެގެން ކަމަށާ، އެ ނޫން ލީޑަރަކަށް މި ގައުމު ސަލާމަތް ކުރެވޭނެ ކަމަށް ރައްޔިތުން މިއަދު ގަބޫލު ނުކުރާ ކަމަށް އަދުރޭ ވިދާޅުވިއެެވެ.
އަދުރޭގެ އިތުރުން، ޕީޕީއެމްގެ ހަރަކާތު ކޮމިޓީގެ ޗެއާރ މުހައްމަދު އިސްމާއިލް ވެސް ވަނީ، ނަޝީދުގެ ވާހަކަތަކާއި ނުރުހުން ފާޅުކުރައްވާފައެވެ.
އެގޮތުން މުހައްމަދު އިސްމާއިލް ކުރެއްވި ޓްވީޓެއްގައި އޭނާ ވިދާޅުވީ, ޕީޕީއެމް / ޕީއެންސީގެ 2023 ގެ ރިޔާސީ ޓިކެޓް ވަނީ ރައީސް ޔާމީން އަބްދުލް ގައްޔޫމާ ހަވާލްކުރެވިފައި ކަމަށެވެ.
އަދި ނަޝީދު ރިޔާސީ އިންތިހާބުގައި ވާދަކުރުން، ނުވަތަ ނުކުރުން އެއީ އެމަނިކުފާނުގެ އަމިއްލަ ނިންމުން ކަމަށާ، ރައީސް ޔާމީން ކަންކުރަންވާ ގޮތް ނަޝީދު ކިޔައިދެއްވުމަކީ ހަޑި ކަމެއް ކަމަށް އޭނާ ވިދާޅުވި އެވެ.
"ނަޝީދުއާ ޔާމީން އަކީ ދެފިކުރެއް. ގައުމީ ލީޑަރަކާ ލާހޫރޭ ލީޑަރެއްގެ ތަފާތު ވަަރަށް ބޮޑުވާނެ" މުހައްމަދު އިސްމާއިލް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
