ގައުމީ ލީޑަރަކާ "ލާހޫރޭ" ލީޑަރެއްގެ ތަފާތު ވަަރަށް ބޮޑުވާނެ ކަމަށް ބުނެ ޕީޕީއެމްގެ ހަރަކާތު ކޮމިޓީގެ ޗެއާރ މުހައްމަދު އިސްމާއިލް ބަހުގެ ހަމަލާތަކެއް މަޖިލީހުގެ ރައީސް މުހައްމަދު ނަޝީދަށް އަމާޒުކުރައްވައިފިއެވެ.

ދަ ޑިމޮކްރެޓްސް އުފެއްދުމަށް ޣިޔާސުއްދީން ސްކޫލްގައި ރޭ ބޭއްވި ޖަލްސާގައި ވާހަކަ ދައްކަވަމުން މަޖިލީހުގެ ރައީސް މުހައްމަދު ނަޝީދު ވަނީ، ސެޕްޓެމްބަރުގައި އޮންނަ ރިޔާސީ އިންތިހާބުގައި އެމަނިކުފާނާއި ޔާމީން ކުރިމަތިނުލައްވައި ދެ ބޭފުޅުން އެކުގައި ބާރަށް މަސައްކަތް ކުރައްވައިގެން ރައްޔިތުން އެދޭ ގޮތް ހޯދައިދޭން ޖެހޭ ކަމަށް ވިދާޅުވެފައެވެ. 

އެކަމާއި ނުރުހުން ފާޅުކުރައްވައި، މުހައްމަދު އިސްމާއިލް ކުރެއްވި ޓްވީޓެއްގައި އޭނާ ވިދާޅުވީ, ޕީޕީއެމް / ޕީއެންސީގެ 2023 ގެ ރިޔާސީ ޓިކެޓް ވަނީ ރައީސް ޔާމީން އަބްދުލްގައްޔޫމާ ހަވާލުކުރެވިފައި ކަމަށެވެ.

Advertisement

އަދި ނަޝީދު ރިޔާސީ އިންތިހާބުގައި ވާދަކުރުން، ނުވަތަ ނުކުރުން އެއީ އެމަނިކުފާނުގެ އަމިއްލަ ނިންމުން ކަމަށާ، ރައީސް ޔާމީން ކަންކުރަންވާ ގޮތް ނަޝީދު ކިޔައިދެއްވުމަކީ ހަޑި ކަމެއް ކަމަށް އޭނާ ވިދާޅުވި އެވެ. 

"ނަޝީދުއާ ޔާމީން އަކީ ދެފިކުރެއް. ގައުމީ ލީޑަރަކާ ލާހޫރޭ ލީޑަރެއްގެ ތަފާތު ވަަރަށް ބޮޑުވާނެ" މުހައްމަދު އިސްމާއިލް ވިދާޅުވިއެވެ. 

ރޭ ޑިމޮކްރެޓްސް އިން ބޭއްވި ޖަލްސާގައި ރައީސް ޔާމީންއަށް ތައުރީފް ކުރައްވައި ރައީސް ނަޝީދު ވިދާޅުވީ ޔާމީންއަކީ ހަމައެކަނި ފަސް އަހަރު ވެރިކަން ކުރެއްވި ބޭފުޅެއް ނޫން ކަމަށާއި ވަޒީރު ކަމާއި މަޖިލިސް މެމްބަރުކަމާއި އަދި އެތައް ހިދުމަތްތަކެއް ގައުމަަށް ކޮށްދެއްވާފައިވާ ބޭފުޅެއް ކަމަށެވެ.

"އަޅުގަނޑަށް ފެންނަ ފެނުމުގައި މި އިންތިހާބަށް އަޅުގަނޑުމެން ދެ މީހުން ވެސް ކުރިމަތިނުލާންވީ، އަޅުގަނޑުމެން ދެ މީހުން އެކުގައި ބާރަށް މަސައްކަތްކޮށްގެން ރާއްޖޭގެ ރައްޔިތުން އެދޭ ގޮތެއް ހޯދައިދޭންވީ،" ނަޝީދު ވިދާޅުވިއެވެ.

ނަޝީދުގެ މި ވާހަކަ އާއި ގުޅިގެން ޕީޕީއެމް/ ޕީއެންސީގެ ގިނަ ބޭފުޅުން އަންނަނީ ނުރުހުން ފާޅުކުރަމުންނެވެ.