ކުރިއަށް އޮތް ރިޔާސީ އިންތިޚާބުގައި ޕީޕީއެމްގެ ރިޔާސީ ކެންޑިޑޭޓަކީ އެ ޕާޓީގެ ލީޑަރު ރައީސް އަބްދުالله ޔާމީން އަބްދުލްގައްޔޫމު ކަމަށާއި، ކޮމަން ކެންޑިޑޭޓަކާއި ދޭތެރޭ އެ ޕާޓީން ވިސްނުން ނުގެންގުޅޭކަމަށް ޕީޕީއެމުން ބުނެފި އެވެ. 

ޕީޕިއެމުން ރިޔާސީ އިންތިޚާބަށް ވަމުންދާ ތައްޔާރީތަކާއި ގުޅޭގޮތުން މައުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި ނޫސްވެރިން ވަނީ ޕީޕީއެމުން ދަ ޑިމޮކްރެޓްސްއާއި އެކު މަޝްވަރާތައް ކުރިއަށް ގެންދާއިރު، ދެ ޕާޓީއަށް ވެސް ޤަބޫލުކުރެވޭ ކޮމަން ކެންޑިޑޭޓެއް ނެރުމާއި ދޭތެރޭ ޕީޕީއެމްގެ ޚިޔާލަކީ ކޮބައިތޯ ސުވާލުކޮށްފަ އެވެ. އަދި އެފަދައިން އަމަލުކުރުމާއި ދޭތެރޭ ރައީސް ޔާމީން ދެކެވަޑައިގަންނަވާ ގޮތަކީ ކޮބައިތޯ ސުވާލުކޮށްފަ އެވެ. 

އެ ސުވާލަށް ޖަވާބުދެއްވަމުން އިދިކޮޅު ކޯލިޝަން ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުالله ވިދާޅުވީ ޕީޕީއެމުން ވާނީ ޕާޓީގެ ރިޔާސީ ކެންޑިޑޭޓަކީ ރައީސް ޔާމިން ކަމުގައި ކަނޑައަޅައި އެމަނިކުފާނަށް ޓިކެޓު ވެސް ހަވާލުކޮށްފައި ކަމަށެވެ. 

Advertisement

ރައީސް ޔާމީން މި އިންތިޚާބުގައި ވާދަކުރައްވާ އެއްބުރުން އިންތިޚާބު ކާމިޔާބު ވެސް ކުރައްވާނެކަމުގެ ފުރިހަމަ ޔަގީންކަން އޮތްކަމަށާއި، މި ހާލަތުގައި އެމަނިކުފާނު ނޫން ކޮމަން ކެންޑިޑޭޓެއް ނެރުމުގެ ވިސްނުން ޕީޕީއެމްގެ ވެސް އަދި ރައީސް ޔާމިނުގެ ވެސް ނެތްކަމަށް އަބްދުއްރަހީމް ވިދާޅުވި އެވެ. 

އަބްދުއްރަހީމް ވިދާޅުވީ މިވެރިކަން ބަދަލުކުރަން ޖެހޭކަމަށް ގިނަ ސިޔާސީ ޕާޓީތަކުން ޤަބޫލުކުރައްވާ ކަމަށެވެ. 

އެ ޕާޓީތަކާއެކު ބޭއްވުނު މަޝްވަރާ ބައްދަލުވުންތަކުގައި އެކަން ސާފުވެގެން ގޮސްފައިވާ ކަމަށާއި، އެ މަގްސަދު ހާސިލްކުރުމަށް އެންމެ ރަނގަޅު ގޮތަކީ ޕީޕީއެމްގެ ފަހަތަށް އަރާ ވަޑައިގެން ރައީސް ޔާމީން އަނބުރާ ވެރިކަމަށް ގެނައުންކަމަށް އަބްދުއްރަހީމް ވިދާޅުވި އެވެ. 

ރައީސް ޔާމީން އަނބުރާ ވެރިކަމަށް ގެނައުމަކީ ގައުމާއި ރައްޔިތުންނަށް އެންމެ ފައިދާ ބޮޑު ގޮތްކަމަށް އަބްދުއްރަހީމް ވަނީ ވިދާޅުވެފަ އެވެ.