ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) ގެ ރިޔާސީ ކެންޑިޑޭޓަކީ ރައީސް އަބްދުالله ޔާމީން އަބްދުލްގައްޔޫމުކަމަށް އޮތީ ކަނޑައަޅާފައި ކަމަށާއި، އެކަމާއި ގުޅިގެން އިތުރު ފަރާތްތަކަށް ބަހެއް ނުކިޔޭނެކަމަށް ޕްރޮގްރެސިވް ކޮންގްރެސް ކޯލިޝަންގެ އެޑްވައިޒަރު އަދި ކުރީގެ ނައިބު ރައީސް ޑރ މުޙައްމަދު ޖަމީލު އަހުމަދު ވިދާޅުވެއްޖެ އެވެ. 

ޑރ ޖަމީލު މިފަދައިން ވިދާޅުވެފައިވަނީ ދަ ޑިމޮކްރެޓްސް އުފައްދާ ބޭއްވި ފުރަތަމަ ގައުމީ ޖަލްސާގައި ވާހަކަދައްކަވަމުން އެމްޑީޕީގެ ރައީސްގެ މަޤާމުގައި ހުންނަވާ ޕާޓީން ވަކިވެ ވަޑައިގެން މަޖިލީހުގެ ރައީސް މުޙައްމަދު ނަޝީދު ދެއްކެވި ވާހަކަތަކަށް ރައްދުދެއްވަމުން ނެވެ. 

ނަޝީދު ވިދާޅުވީ ރިޔާސީ އިންތިޚާބުން ރައީސް ޞާލިހު ބަލިކުރުމަށް އެންމެ ރަނގަޅު ގޮތެއްކަމަށް ދެކިވަޑައިގަންނަވަނީ ރައީސް ޔާމީން އިންތިޚާބުގައި ވާދަނުކުރެއްވުން ކަމަށެވެ. އަދި އެމަނިކުފާނާއެކު މަސައްކަތްޕުޅު ކުރެއްވުން ކަމަށެވެ. 

ރައީސް ޔާމިނަކީ ޕީޕީއެމްގެ ރިޔާސީ ކެންޑިޑޭޓުކަމަށް ކަނޑައަޅާފައިވަނީ ޕީޕީއެމް-ޕީއެންސީ ކޯލިޝަންގެ ޖޮއިންޓު ސެނެޓުގެ އިއްތިފާގުންނެވެ. އެފަހުން އެ ކޯލިޝަނުން ވަނީ ރަސްމީކޮށް ރައީސް ޔާމިނަށް ޓިކެޓު އަރުވާފައެވެ. އަދި އެމަނިކުފާނު ވަނީ ޓިކެޓު ޤަބޫލުފުޅުވެސް ކުރައްވާފަ އެވެ. 

އެކަމަށް އިޝާރާތްކުރައްވާ، ނަޝީދުގެ އެ ވާހަކަތަކަށް ރައްދުދެއްވަމުން ޑރ ޖަމީލު ވިދާޅުވީ ޕީޕީއެމްގެ ރިޔާސީ ކެންޑިޑޭޓު ކަނޑައަޅާފައި ވަނިކޮށް، އެކަމާއި ގުޅިގެން އެހެން ފަރާތްތަކަށް ބަސް ވިދާޅުނުވެވޭނެ ކަމަށެވެ.

ޑރ ޖަމީލު އިތުރަށް ވިދާޅުވީ ރައީސް ޔާމިނު ރާއްޖޭގައި ވެރިކަން ކުރެއްވި ފަސް އަހަރަކީ ދިވެހިރާއްޖެއަށް ތަރައްގީއާއި ކުރިއެރުން ގެނެސްދެއްވި ފަސް އަހަރުކަމަށެވެ. އަދި ރާއްޖޭގެ މިނިވަންކަމާއި އިސްތިގުލާލަށް ބުރޫއަރާނެފަދަ ކަންކަމަށް ފުރުސަތު ނުދެއްވާ ވެރިކަން ކުރެއްވި ކާމިޔާބު ފަސް އަހަރުކަމަށެވެ. 

ޕީޕިއެމް އަކީ ރާއްޖޭގައި އޮތް އެންމެ ބޮޑު ސިޔާސީ ޕާޓީއަށް ވެފައި، އެ ޕާޓީން ކެންޑިޑޭޓެއް ނެރުމުން، އެހެން ފަރާތްތަކަށް އެކަމަށް ބަސްކިޔުމުގެ ހައްގު ލިބިގެން ނުވާކަމަށް ޑރ ޖަމީލު ވިދާޅުވި އެވެ.