ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު މިއަދު ހުންނެވީ ވަރަށް ބޮޑަށް އެކަނިވެ ނިކަމެތިވެފައިކަމަށް އިދިކޮޅު ކޯލިޝަނުން ބުނެފި އެވެ. 

ޕީޕީއެމުން ރިޔާސީ އިންތިޚާބަށް ވަމުންދާ ތައްޔާރީތަކާއި ގުޅޭގޮތުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އިދިކޮޅު ކޯލިޝަން ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުالله ވިދާޅުވީ މި ވެރިކަން ބަދަލުކުރުމަށް ގިނަ ސިޔާސީ ޕާޓީތަކުން ބޭނުންވާ ކަމަށެވެ. 

ރައީސް ޞާލިހަކީ ގިނަ ސިޔާސީ ޕާޓީތަކެއް ގުޅިގެން އުފެއްދި ކޯލިޝަނެއްގެ ތެރެއިން ވެރިކަމަށް ވަޑައިގެންނެވި ބޭފުޅެއް ނަމަވެސް މިހާރު އެމަނިކުފާނު ހުންނެވީ ވަރަށް ބޮޑަށް އެކަނިވެ ބަލިކަށިވެފައިކަމަށް އަބްދުއްރަހީމް ވިދާޅުވި އެވެ. އަދި ރައީސް ޞާލިހު އެހާބޮޑަށް ނިކަމެތިވީ އެމަނިކުފާނު ގައުމަށް ގައްދާރުވުމުންކަމަށް އަބްދުއްރަހީމް ވިދާޅުވި އެވެ. 

Advertisement

އެކަން ފާހަގަކުރައްވާ އަބްދުއްރަހީމް ވިދާޅުވީ މިހާލަތުގައި ޕީޕީއެމްގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމާއެކި އެކު ނިކުމެ ވަޑައިގެން މި ވެރިކަން ބަދަލުކުރުމަކީ ވަރަށް ފަސޭހަފުޅު ކަމެއް ކަމަށެވެ. 

ރައީސް ޔާމިނު ރިޔާސީ އިންތިޚާބުގައި ވާދަކުރައްވާ އެއްބުރުން އިންތިޚާބު ކާމިޔާބު ކުރައްވާނެ ކަމަށާއި، އެމަނިކުފާނުގެ ފަހަތްޕުޅަށް އަރާވަޑައިގެން އިންތިޚާބު ކާމިޔާބު ކުރުމުގެ މަސައްކަތް ކުރުމަކީ އެންމެ ފައިދާ ބޮޑު ގޮތްކަމަށް އަބްދުއްރަހީމް ވިދާޅުވި އެވެ. 

ރައީސް ޞާލިހު މިއަދު ހުންނެވީ ވަރަށް ބޮޑަށް ނިކަމެތިވެފައިކަމަށް އަބްދުއްރަހީމް ވިދާޅުވެފައިވާއިރު، އެމަނިކުފާނާއެކު މިހާތަނަށް ކޯލިޝަން އަދާލަތު ޕާޓީއާއި އެމްޑީއޭއިން ނެވެ.