ފަލަސްޠީނުގެ ޖެނީންއަށް އަރައި އިޒްރާއިލްގެ ސިފައިން ދިން ހަމަލާތަކާއި ގެއްލުން ތަކުގައި އެހީއަށް ބޭނުންވެފައި ތިބި ފަރާތްތަކަށް އިންޓަރނޭޝަނަލް އެއިޑްސް ކެމްޕޭނުން މިއަދު އެހީތެރިކަން ފޯރުކޮށްދިނުމަށް ރާވައިފައިވާކަމަށް އައިއޭސީގެ އިންޓަރނޭޝަނަލް ރިލޭޝަންސް ޑިރެކްޓަރ މުޙައްމަދު ޢަލީ ވިދާޅުވެއްޖެއެވެ.

"ވޮއިސް" އަށް މައުލޫމާތު ދެއްވަމުން މުޙައްމަދު ޢަލީ ވިދާޅުވީ ޖެނީން އަށް އެރި އިޒްރާއިލް ސިފައިން މިހާރު ވަނީ ޖެނީން އިން ފައިބައިފައި ކަމަށާއި، އިޒްރާއިލުން ދިން ހަމަލާތަކުގައި ދެދުވަސް ތެރޭގައި ޖެނީން އިން 12 މީހަކު ޝަހީދު ވެފައިވާ ކަމަށެވެ.

މުޙައްމަދު ޢަލީ ވިދާޅުވީ އިޒްރާއިލް ސިފައިން ޖެނީންއިން ފައިބައިގެން ދިޔައީ އެމީހުންގެ ސިފައިންގެ މީހެއް މަރުވުމުން ކަމަށެވެ.

Advertisement

އޭނާ އިތުރަށް ވިދާޅުވެފައިވަނީ އިޒްރާއިލް ސިފައިންގެ ހަމަލާތަކުގެ ސަބަބުން ޖެނީންގެ ޢިމާރާތްތަކަށް ވަރަށް ބޮޑެތި ގެއްލުންތަކެއް ލިބިފައިވާ ކަމަށެވެ. އަދި ހަމަލާތައް ދެމުންދިޔައިރު ރައްކާތެރިކަން ހޯދުމުގެ ގޮތުން ގެތައް ދޫކޮށް ދިޔަ މީހުން އަނބުރައި ގެތަކަށް ދިޔައިރު ގިނަ ގެތައް ވަނީ ހަލާކުވެފައި ކަމަށެވެ.

"އައިއޭސީ އިން މަސައްކަތް ކުރަމުން މިދަނީ ކޮންމެ ކާރިސާއެއް ދިމާވީމަވެސް އާންމުކޮށް އެންމެ ފުރަތަމަ އެހީތެރިކަން ދެވޭ ކަންކަމަށް އަމާޒުކޮށްގެން، އެއީ ކާބޯތަކެއްޗާއި، ފަސްޓްއެއިޑްގެ އެހީއާއި ފެނާއި، މިކަހަލަ އެހީތެރިކަން ފޯރުކޮށްދޭން މިބަލަނީ، އިންޝާالله މިރޭގެ ވަގުތެއްގައި ކުރެވޭނެ ކަންކަން ނިންމޭނެ، މާދަމާ އެހީ ޖެނީންގެ ތެރޭގައި ބަހާލެވޭނެ ކަމަށް މިބަލަނީ" މުޙައްމަދު ޢަލީ ވިދާޅުވެފައިވެއެވެ.

ހޯމަ ދުވަހު އިޒްރާއިލް ސިފައިންގެ 1000 އަށް ވުރެ ގިނަ ސިފައިނާއި ފުލިހުން ވަނީ ޖެނީން އަށް ވަދެގަނެފައެވެ. އަދި ފަލަސްޠީނުގެ އެތައް ބަޔަކު ވަނީ ހައްޔަރުވެސް ކޮށްފައެވެ. މިހަމަލާތަކުގައި ޝަހީދުވި މީހުންގެ ތެރޭގައި ކުޑަކުދިންވެސް ހިމެނެއެވެ.