ފަލަސްޠީނުގެ ޖެނީން އަށް އިޒްރާއިލް ސިފައިން ދިން ހަމަލާތަކުގެ ސަބަބުން މީހުން ދިރިއުޅޭ ގެތަކުގެ %80 ހަލާކުވެފައި ކަމަށް ޖެނީންގެ ގަވަރުނަރުގެ ނައިބު އަބޫ އަލް ރަބް ވިދާޅުވެއްޖެއެވެ.

ޖެނީން ސިޓީގެ ގަވަރުނަރުގެ ނައިބު ވިދާޅުވެފައި ވަނީ އިޒްރާއިލް ސިފައިން މެދުކެނޑުމެއްނެތި ހިންގި މިލިޓަރީ ރެއިޑުގެ ސަބަބުން އެ ސިޓީގެ 80 ޕަސެންޓް ގެތައް ވަނީ ހަލާކުވެފައި ކަމަށެވެ.

ހޯމަ ދުވަހު އިޒްރާއިލް ސިފައިން ފަށައި ބުދަ ދުވަހު ނިންމާލި މި މިލިޓަރީ ރެއިޑަކީ ފާއިތުވި 20 އަހަރުތެރޭ ހިންގި އެންމެ ބޮޑު މިލިޓަރީ ރެއިޑެވެ.

ފަލަސްޠީނުގެ ހެލްތް މިނިސްޓްރީ އިން ހާމަކޮށްފައިވާ ގޮތުން އިޒްރާއިލްގެ މި ރެއިޑުގެ ސަބަބުން ފަލަސްޠީނުގެ 12 މީހަކު ވަނީ ޝަހީދުވެފައެވެ. އަދި 100 އަށް ވުރެ ގިނަ މީހުނަށް ވަނީ އެކި ވަރުގެ ޒަހަމްތައް ލިބިފައެވެ.

އިޒްރާއިލްގެ މިހަމަލާތަކުގެ ސަބަބުން ޖެނީންގެ މަގުތަކާއި ޢިމާރާތްތަކަށް ބޮޑެތި ގެއްލުންތަކެއް ވަނީ ލިބިފައެވެ. އަދި ޖެނީންގެ ރެފިޔުޖީ ކޭމްޕުގެ 80 ޕަސެންޓް ވަނީ އަލިފާން ރޯވުމާއި އިމާރާތައް ލިބުނު އެހެން ގެއްލުން ތަކުގެ ސަބަބުން ހަލާކުވެފައި ކަމަށް އަބޫ އަލް ރަބް ވަނީ ވިދާޅުވެފައެވެ.

އަދި ޒަރޫރީ ޚިދުމަތްތައް ކަމަށްވާ ކަރަންޓުގެ ޚިދުމަތާއި ފެނުގެ ޚިދުމަތް ފޯރުކޮށްދޭ ލައިންތަކަށް ގެއްލުން ލިބިފައިވާ ކަމަށާއި، އެ ސިޓީގެ ވެހިކަލް ތަކަށްވެސް ބޮޑެތި ގެއްލުން ތަކެއް ލިބިފައިވާ ކަމަށް އަބޫ އަލް ރަބް ވަނީ ބުނެފައެވެ.