ކުރިއަށް އޮތް ރިޔާސީ އިންތިޚާބުގައި މި ވެރިކަން ބަދަލުކުރުމާއި ގުޅޭގޮތުން ޕްރޮގްރެސިވް ޕާޓީ އޮފް މޯލްޑިވަސް (ޕީޕީއެމް) އިން މޯލްޑިވްސް ނެޝަނަލް ޕާޓީ (އެމްއެންޕީ) އާއެކު މަޝްވަރާތައް ފަށައިފި އެވެ. 

އެގޮތުން ދެ ޕާޓީން ބާއްވާ ފުރަތަމަ މަޝްވަރާ ބައްދަލުވުން ވަނީ ބުރާސްފަތި ދުވަހުގެރޭ ބާއްވާފަ އެވެ. 

މި ބައްދަލުވުމުގައި ޕީޕީއެމްގެ ފަރާތުން އިދިކޮޅު ކޯލިޝަން ވަގުތީގޮތުން ހިންގެވުމާއި ހަވާލުވެވަޑއިގެން ހުންނެވި ޕީއެންސީގެ ރައީސް އަބްދުއްރަހީމްގެ އިތުރުން ޕީޕީއެމްގެ ނައިބުރައީސް އަހުމަދު ޝިޔާމާއި، ޕީއެންސީގެ ނައިބު ރައީސް އިބްރާހިމް ޝުޖާއު، ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތާރިގު އަދި ފަރެސްމާތޮޑާ ދާއިރާގެ މެމްބަރު ހުސެއިން މުޙައްމަދު ލަތީފު ބައިވެރިވެވަޑައިގެންނެވި އެވެ. 

ޕީޕީއެމް އާއި އެމްއެންޕީ ކުރިއަށް ގެންދިޔަ ބައްދަލުވުމުގެ ތެރެއިން 

އެމްއެންޕީގެ ފަރާތުން ޕާޓީގެ ނައިބުރައީސް އަދި މަޖިލީހުގެ ތިމަރަފުށީ ދާއިރާގެ މެމްބަރު އަބްދުﷲ ރިޔާޒު އަދި މަޖިލީހުގެ ވިލިމާލެ ދާއިރާގެ މެމްބަރު އަހުމަދު އުޝާމާއެކު އިތުރު ދެ މަންދޫބުން ވަނީ ބައިވެރިވެވަޑައިގެންފަ އެވެ. 

ޕީޕީއެމް އާއި އެމްއެންޕީ ކުރިއަށް ގެންދިޔަ ބައްދަލުވުމުގެ ތެރެއިން 

މި ބައްދަލުވުމާއި ގުޅޭ އިތުރު ތަފްސީލެއް އަދި މިހާތަނަށް ޕީޕީއެމުން ހާމަކޮށްފައެއް ނުވެއެވެ. 

އެހެން ނަމަވެސް އެ ޕާޓީން ބުނެފައިވަނީ މި ވެރިކަން ބަދަލުކުރަން ޖެހޭކަމަށް ގިނަ ސިޔާސީ ޕާޓީތަކުން ޤަބޫލުކުރާކަމަށެވެ. އަދި އެއީ ސިޔާސީ ޕާޓީތަކާއެކު ގުޅިގެން މަސައްކަތް ކުރެވޭނެ ކަމެއް ކަމަށެވެ. 

މި ސަރުކާރު ބަދަލުކުރުމަށް ގުޅެން ޖެހުނު ކޮންމެ ބަޔަކާއި ގުޅިގެން މަސައްކަތް ކުރާނެކަމަށް ޕީޕީއެމުން ވަނީ ބުނެފައެވެ. އަދި ކޯލިޝަން ހަދާނަމަ އެ ހިސާބަށް ދިއުމުން އެކަން ވެސް ކުރާނެކަމަށް އެ ޕާޓީން ވަނީ ބުނެފައެވެ. 

ރިޔާސީ އިންތިޚާބާއި ގުޅޭގޮތުން ޕީޕީއެމުން އެމްއެންޕީއާއެކު މަޝްވަރާކުރަން ފަށާފައިވާއިރު، މި ވެރިކަން ބަދަލުކުރުމށް ގުޅިގެން ކުރެވެން ހުރި މަސައްކަތްތައް ދެނެގަތުމަށްޓަކައި، އެ ޕާޓީން ގެންދަނީ ދަ ޑިމޮކްރެޓްސް އާއި އެކުވެސް ސިލްސިލާ ބައްދަލުވުންތަކެއް ކުރިއަށް ގެންދަމުންނެވެ.