މެޓާއިން އަލަށް އުފެއްދި، ޓުވިޓާ އާއި ދާދި އެއްގޮތް "ތްރެޑްސް" އެޕްލިކޭޝަނާއި ގުޅިގެން ޓުވިޓާއިން މެޓާއާއި ދެކޮޅަށް ދައުވާ ކުރާނެ ކަމުގެ އިންޒާރެއް ދީފައިވާ ކަމަށް ރިޕޯޓްތަކުން ބުނެފިއެވެ.
އެގޮތުން، ފާއިތުވި ބުދަ ދުވަހު، މެޓާގެ ސީއީއޯ، މާކް ޒުކަބާގަށް، ޓުވިޓާގެ ލޯޔަރު ކަމަށްވާ އެލެކްސް ސްޕިރޯ ފޮނުވި ސިޓީއެއްގައި ބުނެފައިވާ ގޮތުގައި، ޓުވިޓާގެ ކުރީގެ މުވައްޒަފުންގެ އެހީގައި، އެ ކުންފުނީގެ ވިޔަފާރީގެ ސިއްރު ތަކާއި އެހެނިހެން އިންޓެލެކްޗުއަލް ޕްރޮޕަޓީ ތަކުގެ އަލީގައި، ޓުވިޓާގެ "ކޮޕީ ކެޓް" ނުވަތަ ނަކަލެއް މެޓާއިން އުފައްދާފައިވާ ކަމަށެވެ.
އަދި އެކަން ކުރުން ހުއްޓާލުމަށް ގޮވާލަމުން ޓުވިޓާއިން ވަނީ ހުއްޓާ ނުލައިފިނަމަ ގާނޫނީ ގޮތުން އަޅަން ޖެހޭ ފިޔަވަޅު އަޅާނެ ކަމުގެ އިންޒާރު ދީފައި ކަމަށްވެސް މީޑިއާ ރިޕޯޓްތައް ބުނެއެވެ.
ޓުވިޓާގެ މި އިންޒާރުގެ ސިޓީއަށް ރައްދުދީ، މެޓާ ކުންފުނީގެ ތަރުޖަމާނު އެންޑީ ސްޓޯން ފޮނުވި ސިޓީއެއްގައި، އޭނާ ވަނީ، "ތްރެޑްސް ގެ އިންޖީނިއަރިން ޓީމުގައި ޓުވިޓާގެ ކުރީގެ މުވައްޒަފެއް ނެތް ކަމަށް" ބުނެފައި ކަމަށް ބޭރުގެ މީޑިއާ ތަކުން ރިޕޯޓް ކުރެއެވެ.
މިމައްސަލާގައި މެޓާގެ ސީއީއޯ، މާކް ޒުކަބާގް ވަކި އެއްޗެއް ހާމަކޮށްފައި ނުވާއިރު، މިކަމާއި ގުޅިގެން އީލޮން މަސްކު ކޮށްފައިވާ ޓުވީޓެއްގައި އޭނާ ބުނީ، "ވާދަ ކުރުމަކީ މައްސަލައެއް ނޫން" ކަމަށާ "އެކަމަކު މަކަރު ހެދުމަކީ މައްސަލައެއް" ކަމަށެވެ.
މެޓާއިން ތްރެޑްސް ލޯންޗް ކޮށްފައިވަނީ މިދިޔަ ބުދަ ދުވަހުގެ ވަގުތެއްގައެވެ. މި އެޕްލިކޭޝަން ލޯންޗް ކުރިތާ ހަތަރު ގަޑިއިރު ތެރޭ ފަސް މިލިއަނަށްވުރެ ގިނަ މީހުން މި އެޕްލިކޭޝަނާއި ގުޅިފައިވާއިރު، މިހާރު އެ އަދަދު 30 މިލިއަނަށްވުރެ ވަނީ ގިނަވެފައެވެ.
Advertisement
This content is created and paid for by advertisers and does not involve Voice Journalists
