ރައީސުލްޖުމްހޫރިއްޔާ ކުރެއްވި ޚަރަދުތައް ފޮރުވުމަށް މުޅި ދައުލަތް ތެދުވާނީ ކަންކަން ވަރަށް ބޮޑަށް ގޯސްވެގެން ދިޔައިމަކަމަށް ކުރީގެ އިކޮނޮމިކް މިނިސްޓަރު އަދި މަޖިލީހުގެ މާވަށު ދާއިރާގެ މެމްބަރު މުޙައްމަދު ސައީދު ވިދާޅުވެއްޖެ އެވެ.
ސައީދު މިފަދައިން ވިދާޅުވެފައި ވަނީ އދ.ގެ އާންމު މަޖިލީހުގައި ތަގްރީރު ކުރެއްވުމަށް ރައީސް އިބްރާހީމް މުހައްމަދު ސޯލިހު އެމެރިކާއަށް ކުރެއްވި ދަތުރުފުޅުގެ ހަރަދުތައް ހާމަކުރަން އިންފޮމޭޝަން ކޮމިޝަނަރު އެންގި މައްސަލަ ދައުލަތުން ސުޕްރީމް ކޯޓުގައި އިސްތިއުފާނުކުރުމާއި ގުޅިގެން ކުރެއްވި ޓްވީޓެއްގަ އެވެ.
ސައީދުގެ އެ ޓްވީޓުގައި ވަނީ ހާމަކަން ބޮޑުކޮށް ވެރިކަން ކުރައްވާނެކަމަށް ވައުދުވެޑައިގެން ހުންނަވާ ރައީސް ޞާލިހު އެހާ ބޮޑަށް ފޮރުވަން މަސައްކަތްޕުޅު ކުރައްވަނީ ކޮން ޚަރަދުތަކެއްތޯ ހުރެތޯ ސުވާލު ކުރައްވާފަ އެވެ.
ސައީދު އިތުރަށް ވިދާޅުވީ ރައީސުލްޖުމްހޫރިއްޔާގެ އެ ދަތުރުފުޅުގައި ވަޑައިގަންނަވަން ނުޖެހޭ ދިމާލަކަށް ވަޑައިގަނެވުނީ ތޯ އެއީ މިހާލަތުގައި ދައުލަތުން ބަލާ ކަށަވަރުކުރަން ޖެހޭ ކަމެއްކަމަށް ދެކިވަޑައިގަންނަވާ ކަމަށެވެ.
"ރައީސް ކުރިޚަރަދެއް ފޮރުވަން ދައުލަތް ތެދުވާނީ ހާދަހާ ކަންތައްގޯސްވީމައޭ! ރައީސްޞާލިހު މިވަރަކަށް މިފޮރުވަނީ ކޮންހަރަދެއްތޯ؟ އަދި އެމެރިކާގަ ހުއްނެވިއިރު ކޮންމެހެން ވަޑައިގަންނަވަން ނުޖެހޭ ދިމާލަކަށް ވަޑައިގަތްތޯ ބެލުމަކީވެސް މިހާލަތުގައި ދައުލަތުގެ މައްޗަށް ވާޖިބުވާނެ ކަމެއް"
މާވަށު ދާއިރާގެ މެމްބަރު ސައީދު
ރައީސް އިބްރާހީމް 2021 ވަނަ އަހަރު އެމެރިކާއަށް ކުރެއްވި ދަތުރުފުޅުގައި ބައިވެރިވެވަޑައިގެންނެވި ބޭފުޅުންނާއި އެ ދަތުރުގެ ހަރަދުތަކުގެ ހިސާބުތަކުގެ ސައްހަކަން ކަށަވަރުކުރުމަށް ދަތުރުގެ ރަސީދުތައް ހޯދުމަށް ރާއްޖޭގެ އޮންލައިން ނޫހެއްކަމަށްވާ "ދިޔަރެސް" އިން އެދުނު ނަމަވެސް އެ މައުލޫމާތުތައް ހާމަކުރުމަށް ސަރުކާރުން ވަނީ އިންކާރުކޮށްފަ އެވެ.
ދިޔަރެސް އިން އެދުނު މައުލޫމާތު ހާމަކުރުމަށް އިންފޮމޭޝަން ކޮމިޝަނަރުގެ އޮފީހުން އެންގި ނަމަވެސް ސަރުކާރުން ވަނީ އެ މައުލޫމާތުތައް ހާމަކުރުމަށް ދެކޮޅު ހަދާފައެވެ. އެފަހުން އެ މައްސަލަ ހައިކޯޓުގައި ވެސް އިސްތިއުނާފު ކުރިއެވެ.
މިހާރު އެ މައްސަލަ ސުޕްރިމް ކޯޓަށް ހުށައަޅާފައި ވަނީ އިންފޮމޭޝަން ކޮމިޝަނަރުގެ އޮފީހުން ނިންމި ނިންމުން ހައިކޯޓުން ވެސް ދަމަހައްޓާ އެދިފައިވާ މައުލޫމާތު ހާމަކުރުމަށް އަމުރުކުރުމާއި ގުޅިގެންނެވެ.
Advertisement
This content is created and paid for by advertisers and does not involve Voice Journalists
