މަނާ ބޭހާއި ބަންގުރާ ގެންގުޅުނު ބިދޭސީންތަކެއްގެ ބަންދަށް 15 ދުވަސް ޖަހައިފި އެވެ.
މަސްތުވާތަކެތި އަދި މަނާ ބޭސް ބޭނުންކޮށް ގެންގުޅެ އެތަކެތީގެ ވިޔަފާރިކުރުމާއި ގަވާއިދާ ހިލާފަށް ބަނގުރާ ގެންގުޅެ އެތަކެތީގެ ވިޔަފާރިކުރާކަމުގެ ތުހުމަތުގައި ހައްޔަރުކުރި 6 ބިދޭސީންގެ ބަންދަށް އިއްޔެ ކްރިމިނަލް ކޯޓުން 15 ދުވަސް ދީފައިވާކަމަށް ފުލުހުން ވަނީ ހާމަކޮށްފަ އެވެ.
އެ މީހުންގެ ބަންދާއި މެދު ގޮތެއް ނިންމުމަށް ބޭއްވި އަޑުއެހުމުގައި ފުލުހުން ވަނީ މި މައްސަލައިގައި ހިމެނޭ ބައެއް މީހުން ދިރިއުޅޭ ކޮޓަރިން ބަނގުރާ ކަމަށް ޝައްކުކުރެވޭ އެއްޗެއް ހުރި ފުޅިތަކެއް ފެނިފައިވާ ކަމަށް ބުނެފައެވެ.
އަދި ފުލުހުން ބަލާ ފާސްކުރި ކުރުމުން އޭގެ ތެރެއިން ބައެއް މީހުން ތިބި ކޮޓަރިން ގިނަ އަދަދެއްގެ ބޭސް ގުޅަތަކެއް ފެނިފައިވާ ކަމަށާއި މި ބޭސް ގުޅަތަކަކީ މަސްތުވާއެއްޗެއް އެކުލެވޭ ބޭސްގުޅަތަކެއް ކަމަށް ޝައްކުކުރެވޭ ކަމަށް އިންވެސްޓިގޭޓިވް އޮފިސަރު ވަނީ ކޯޓުގައި ބުނެފަ އެވެ.
އޭގެ އިތުރުން އިތުރުން މި މައްސަލައިގައި ހިމެނޭ މީހަކު ހުރީ މަސްތުވެގެން ކަމަށް ބެލެވޭ ކަމަށް ފުލުހުން ވަނީ ކޯޓުގައި ބުނެފަ އެވެ.
މައްސަލައިގައި ހިމެނޭ މީހުންނަށް ތުހުމަތެއް ވުޖޫދުވާވަރަށް ހެކި ލިބިފައިވާ ކަމަށް ކްރިމިނަލް ކޯޓުގެ ބަންދު އަމުރުގައި ބުނެފައިވެ އެވެ. އަދި މީހުން ބަންދުކުރަން ނިންމީ ކޯޓަށް ހާޒިރުނުވެ ފިލައިގެން ދިޔުމުގެ އިހްތިމާލު އޮތުމުންކަން ފާހަގަކޮށްލެވެ އެވެ.
މައްސަލައިގައި ހިމެނޭ ހަ މީހުންގެ ތެރެއިން ފަސް މީހަކު ރާއްޖޭގައި އުޅެނީ އިމިގްރޭޝަން ގާނޫނާއި ހިލާފަށެެވެ.
Advertisement
This content is created and paid for by advertisers and does not involve Voice Journalists
