އިންޓަރނޭޝަނަލް އެއިޑް ކޭމްޕް (އައިއޭސީ) އިން ފަލަސްޠީނުގެ ޖެނީންގައި އެހީގެ ތަކެތި ބަހަން ފަށައިފިއެވެ.

އައިއޭސީ އިން ބުނެފައިވަނީ އެހީގެ ތަކެތި ބަހަން ފަށައިފައިވީ ނަމަވެސް ތަކެތި ބެހުމުގައި ވަރަށް ބޮޑެތި ދަތިތަކެއް ކުރިމަތިވެފައިވާ ކަމަށެވެ.

އެގޮތުން އިޒްރާއިލް ސިފައިން މިދިޔަ ހަފަތާގައި ހިންގި މިލިޓަރީ ރެއިޑުގައި ޝަހީދުވި މީހުންގެ ޖަނާޒާތައް ކުރިއަށްދިޔުމާއި، މަގުތައް ހަލާކުވެފައި ހުރުމުން އެހީގެ ތަކެތި ބެހުމުގައި ގިނަ ހުރަސްތަކެއް ވަނީ ދިމާވެފައި ކަމަށް އައިއޭސީ އިންވަނީ ބުނެފައެވެ.

އެގޮތުން އެހީގެ ސާމާނު ހިފައިގެން ޖެނީން ކޭމްޕް އަށް ވަންނަން މަސައްކަތް ކުރި ޓްރަކަށް ކޭމްޕްގެ ތެރެއަށް ވަދެވެން ނެތިގެން ވަނީ ކޭމްޕްގެ ގޭޓް ކުރިމަތީގައި އެތައްއިރަކު މަޑުކޮށްފައެވެ.

އައިއޭސީ އިން ހިންގާ ޖެނީން ރިލީފް ކޭމްޕްގެ ގައި އެހީގެ ތަކެތި ބެހުމަށް އެތަނުގައި މަސައްކަތް ކުރާ ވޮލެންޓިއަރަކު މައުލޫމާތު ދެމުން ބުނެފައިވަނީ 100 އަށްވުރެ ގިނަ ގެދޮރު ހަލާކުވެފައިވާކަމަށާއި، މިކަމުގެ ސަބަބުން ބޯހިޔާވަހިކަމެއް ނެތި އުޅެން ގިނަ ބަޔަކަށް މަޖުބޫރު ވެފައިވާކަމަށެވެ.

ޖެނީން ރިލީފް ކޭމްޕާއި ގުޅޭ ގޮތުން "ވޮއިސް" އަށް މައުލޫމާތު ދެއްވަމުން އައިއޭސީގެ އިންޓަރނޭޝަނަލް ރިލޭޝަންސް ޑިރެކްޓަރ މުޙައްމަދު ޢަލީ ވިދާޅުވީ އައިއޭސީ އިން މަސައްކަތް ކުރަމުން ދަނީ ކޮންމެ ކާރިސާއެއް ދިމާވީމަވެސް އާންމުކޮށް އެންމެ ފުރަތަމަ އެހީތެރިކަން ދެވޭ ކަންކަމަށް އަމާޒުކޮށްގެން ކަމަށާއި، އަދި އެއީ ކާބޯތަކެއްޗާއި، ފަސްޓްއެއިޑްގެ އެހީއާއި ފެން ފަދަ ތަކެތި ކަމަށެވެ.

މިދިޔަ ހަފްތާގެ ހޯމަ ދުވަހު އިޒްރާއިލް ސިފައިންގެ 1000 ހާ މީހުން ޖެނީންއަށް އަރައި ދިން ހަމަލާތަކުގެ ސަބަބުން ޖެނީން އިން 12 މީހުން ޝަހީދުވެ، 100 އަށްވުރެ ގިނަ މީހުން ވަނީ ޒަޚަމްވެފައެވެ.

ދެދުވަހަށް ކުރިއަށް ގެންދިޔަ މި ރެއިޑުގައި އެތައް ބަޔަކު ހައްޔަރުކޮށްފައިވެސް ވެއެވެ.