ދިވެހިރާއްޖެއިން ހަނގުރާމައަށް ފުރައިގެން ދިޔަ މީހުންގެ ތެރެއިން ޙާލުގައި ޖެހިފައި ތިބި އަންހެނުންނާއި ކުޑަކުދިން މިއަހަރުގެ އޮގަސްޓު މަސް ނިމުމުގެ ކުރިން އަނބުރާ ރާއްޖެ ގެނެސްދެއްވާނެކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވިދާޅުވެއްޖެ އެވެ. 

ރައީސް ޞާލިހު މިފަދައިން ވިދާޅުވެފައިވަނީ ށ. ކޮމަންޑޫގައި ބޭއްވި އެމަނިކުފާނުގެ ކެމްޕޭނު ޖަލްސާގައި ވާހަކަދައްކަވަމުން ނެވެ. 

ރައީސް ޞާލިހު ވިދާޅުވީ ދިވެހިރާއްޖޭގައި ދީނީ ހަރުކަށި ފިކުރުގެ މީހުން އުޅޭ ކަމަށާއި، އެމީހުން އާއިލާތަކާއެކު ބޭރުގެ ހަނގުރާމަމަތީ ގައުމުތަކަށް ފުރައިގެންދާ ވާހަކައަކީ މީގެ ކުރީ ސަރުކާރުތަކުން އެހާ ދައްކަން ބޭނުންވާ ވާހަކަތަކެއް ނޫން ކަމަށެވެ. 

އެމަނިކުފާނު ވެރިކަމަށް ވަޑައިގެން ބެލި ބެލުމުން ދިވެހިރާއްޖެއިން 100 އަށް ވުރެ ގިނަ މީހުން ހަނގުރާމައަށް ގޮސްފައިވާކަން މިހާތަނަށް ވެސް ދެނެގަނެވިފައިވާކަމަށާއި، އަދި ބެލި ބެލުމުން، ފުރައިގެން ދިޔަ މީހުންގެ ތެރެއިން ވަރަށް ގިނަ އަންހެނުންނާއި ކުޑަކުދިން ބިކަ ހާލުގައި އުޅެމުންދާކަން ވެސް ދެނެގަނިވިފައި ވާކަމަށް ރައީސް ޞާލިހު ވިދާޅުވި އެވެ. 

ރައީސް ޞާލިހު ވިދާޅުވީ ހަނގުރާމައަށް ދިޔަ މީހުންގެ ތެރެއިން އެކަނިވެރިވެފައި ތިބި މަންމައިންނާއި ކުޑަކުދިން އަނބުރާ ގެނައުމުގެ މަސައްކަތް ސަރުކާރުން ދަނީ ކުރަމުން ކަމަށެވެ.

އަދި އޮގަސްޓު މަސް ނިމުމުގެ ކުރިން އެފަދަ ފަރާތްތައް އަނބުރާ ރާއްޖެއަށް ގެނެސްދެއްވާނެކަމަށް ރައީސް ޞާލިހު ވިދާޅުވި އެވެ. 

ހަނގުރާމައަށް ގޮސް ބިކަވެފައި ތިވި ދިވެހިން އަނބުރާ ރާއްޖެ ގެނައުމަށް ސަރުކާރުން ކުރަމުންދާ މަސައްކަތުގެ ތަފްސީލުތައް ކުރިއަށް އޮތް ތަނުގައި ހާމަކުރައްވަމުން ގެންދަވާނެކަމަށް ވެސް ރައީސް ޞާލިހު ވަނީ ވިދާޅުވެފަ އެވެ. 

ރައީސް ޞާލިހު ރިޔާސީ އިންތިޚާބުގައި ބޭނުންކުރައްވާ ސްލޯގަންއަކީ އަމާން ރާއްޖެ އެވެ. 

އުފާވެރި އަމާން ރާއްޖެއެއް ކޮންމެ ރައްޔިތަކަށް ވެސް ބޭނުންވާ ކަމަށާއި، ހަމަޖެހޭ މުޖުތަމައެއް ބިނާކުރަން ޖެހޭކަމަށް ރައީސް ޞާލިހުވަނީ ކޮމަންޑޫގައި އޮތް ޖަލްސާގައި ވެސް ވިދާޅުވެފަ އެވެ. 

ރައީސް ވިދާޅުވީ އަމާން މުޖުތަމައުއެއް ޤާއިމުކުރަން މި ސަރުކާރުން ކުރި މަސައްކަތުގެ ފޮނި ނަތީޖާ މިހާރު ފެނަން ފަށައިފި ކަމަށެވެ. ވެރިކަމާ ހަވާލުވެވަޑައިގަތުމަށްފަހު އެމަނިކުފާނު ރާއްޖެއަށް ގެންނެވި ބަދަލު ކޮންމެ ރަށަކުން ކޮންމެ މީހަކަށް ފެނިގެންދާނެ ކަމަށް ވެސް ރައީސް ޞާލިހު ވިދާޅުވި އެވެ.