ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ވެރިކަމުގެ 5 އަހަރުން ރާއްޖެއަށް ލިބުނު ހަމަޖެހުމާއި ށ. ކޮމަންޑޫއަށް ގެނެވޭ ތަރައްޤީގެ މައްޗަށް 'އުފާވެރި އަމާން ރާއްޖެ' އެއް ބިނާ ކުރުމަކީ އެމްޑީޕީގެ ސަރުކާރުގެ ވަޢުދެއް ކަމަށް އެމަނިކުފާނު ވިދާޅުވެއްޖެއެވެ.

އެމަކިނުފާނު މިފަދައިން ވިދާޅުވެފައިވަނީ އެމަނިކުފާނުގެ ކެމްޕެއިން ފެއްޓުމަށް ށ އަތޮޅުގެ ރަށްްތަކަށް މިއަދު ކުރައްވާ ދަތުރުފުޅުތަކުގެ ތެރެއިން އެ އަތޮޅު ކޮމަންޑޫއަށް ވަޑައިގެން ކުރައްވާފައިވާ ޓްވީޓެއްގައެވެ.

އެގޮތުން ރައީސް ޞާލިހު ވަނީ އެރަށަކީ މަސައްކަތްތެރި ރަށެއް ކަމަށް ފާހަގަކުރައްވާ، އެމަނިކުފާނުގެ ސަރުކާރުގެ 5 އަހަރުން ރާއްޖެއަށް ލިބުނު ހަމަޖެހުމާއި، އެ ރަށަށް ގެނެވޭ ތަރައްޤީގެ މައްޗަށް 'އުފާވެރި އަމާން ރާއްޖެ' އެއް ބިނާ ކުރުމަކީ އެމްޑީޕީގެ ވައުދެއް ކަމަށް ވިދާޅުވެފައެވެ.

'އުފާވެރި އަމާން ރާއްޖެ' އަކީ އެމަނިކުފާނުގެ ކެންޕެއިނަށް މިފަހަރު ކަނޑައަޅާފައިވާ ޝިއާރެވެ.

މިއާއިއެކު މި ޓްވީޓުގައި އެމަނިކުފަނު ވަނީ ކޮމަންޑޫ ރައްޔިތުން އެމަނިކުފާނުގެ ސަރުކާރަށް ކުރެއްވި އިތުބާރާ ދެއްވި ޔަޤީންކަމަށް ޝުކުރު ދަންނަވާފައެވެ.

ކޮމަންޑޫއަށް ވަޑައިގެން އެރަށުގައި ބޭއްވުނު ރަސްމިއްޔާތުގައި ވާހަކަފުޅު ދައްކަވަމުން ރައީސް ޞާލިހު ވަނީ ކޮމަންޑޫ ރައްޔިތުން އެދޭގޮތަށް އެ ރަށް ކައިރީގައި އޮންނަ ކުޑަފަރުގައި އެއާޕޯޓު އަޅުއްވައިދެއްވާނެކަމަށް ވައުދުވެވަޑައިގެންފައެވެ.

މިއާއިއެކު އެ ރަށަށް އެންމެ ބޮޑަށް ބޭނުންޖެހިފައިވާ ބޯހިޔާވަހިކަމުގެ މައްސަލަ ޙައްލުކުރުމަށް ދެ ކޮމަންޑޫ ގުޅާލާ މަތިކޮމަންޑޫއިން 300 ހައުސިން ޔުނިޓު ކުރިއަށް އޮތް 5 އަހަރު ތެރޭ އަޅުއްވާދެއްވާނެ ކަމަށް ވެސް ރައީސް ޞާލިހު ވަނީ ވައުދުވެވަޑައިގެންފައެވެ.

ކޮމަންޑޫއަށް ފަހު ރައީސް ޞާލިހާއި އެމަނިކުފާނުގެ ކެންޕެއިން ޓީމް ދެން ދަތުރުފުޅު ކުރައްވާނީ އެ އަތޮޅުގެ މަރޮށި އަަށެވެ.

ރައީށް ޞާލިހުގެ ކެމްޕެއިން ޓީމްގައި ކެބިނެޓްގެ ވަޒީރުންނާއި މަޖިލިސް މެމްބަރުން ހިމެނިވަޑައިގަންނަވައެވެ.