ރިޝްވަތު ދިނުމާއި ނުފޫޒު ފޯރުވުމުގައި މިހާވަރުގެ ސަރުކާރެއް ނުދެކޭ ކަމަށް ޕީއެންސީގެ ލީޑަރު ޢަބްދުއްރަޙީމް އަބްދުﷲ ވިދާޅުވެއްޖެއެވެ.
އޭނާ މިހެން ވިދާޅުވީ ކުރިއަށް އޮތް އިންތިޚާބާއި ގުޅިގެން ޕީޕީއެމް ޕީއެންސީ ކޯލޮޝަންގެ ކަންބޮޑުވުން ތަކެއް ހުރުމުން އެކަން ކަން އިލެކްޝަންސް ކޮމިޝަނާއި ޚިއްސާ ކުރުމަށް ބޭއްވި ބައްދަލު ވުމަށް ފަހު މީޑިއާ ތަކާއި ވާހަކަ ދައްކަވަމުންނެވެ.
ޢަބްދުއް ރަޙީމް ވިދާޅުވީ ކުރިއަށް އޮތް އިންތިޚާބަށް ސަރުކާރުގެ ނުފޫޒު އިންތިހާއަށް އެބައޮތް ކަމަށެވެ. އަދި އެކަމުގެ ފޯރި ދަނީ ބޮޑުވަމުން ކަަމަށެވެ.
"ރިޝްވަތު ދިނުމާއި ނުފޫޒު ފޯރުވުމުގައި އަޅުގަނޑުމެން ނުދެކެން މިހާވަރުގެ ޚުދު މުޚްތާރު ސަރުކާރެއް"
ޢަބްދުއްރަޙީމް ޢަބްދުﷲ
ޢަބްދުއް ރަޙީމް ވިދާޅުވީ އިންތިޚާބަށް މިއޮތީ ދެމަސް ދުވަސް ކަމަށާއި، ވެރިކަން މިއޮތް ނިމެނީ ކަމަށެވެ. މީގެއިތުރުން އޭނާ ވިދާޅުވީ އިންތިޚާބަށް ނުފޫޒު ފޯރުވުމުގެ ގޮތުން ބަޖެޓުގައި ޖަހައިފައި ނުވާ އެތައް މަޝްރޫޢު ތަކެއް ސަރުކާރުން އެބަހިންގާ ކަމަށެވެ.
ދެންއަންނަ ސަރުކާރަކުން ކަންކުރާނެ ގޮތެއް ނޭގޭނެ ކަމަށާއި، ބަޖެޓްގައި ނުޖަހާ ކަންކަން ކުރުމަކީ ޕީޕީއެމް ޕީއެންސީގެ ސިޔާސަތެއް ނޫން ކަމަށާއި، ރައީސް ޔާމިންގެ 5 އަހަރު ތެރޭގައި ބަޖެޓްގައި ނެތް މަޝްރޫޢަކަށް ޚަރަދު ނުކުރައްވާނެ ކަމަށެވެ.
އެންމެކުޑަމިނުން މަޝްރޫޢުގެ ފައިސާގެ ދެބައިކުޅަ އެއްބައި ބަޖެޓްގައި ނެތްނަމަ މަޝްރޫޢު ބަޔަކާއި ހަވާލު ނުކުރައްވާނެ ކަމަށް ވެސް ޢަބްދުއްރަޙީމްގެ ވާހަކައިގައި ވިދާޅުވިއެވެ.
"މި ސަރުކާރުން މިކުރާ ކަމަކީ، ރައްޔިތުންގެ ތާއީދެއް ނެތްކަން އެބަ އިނގޭ، ދެން މިޖެހެނީ ނުފޫޒު ފޯރުވަން، ދެން މިހަދާގޮތަކީ، މިކަހަލަ ތާކުންތާކު ނުޖެހޭ ބޮޑެތި ވަޢުދުތައް ވަނީ"
ޢަބްދުއްރަޙީމް ވިދާޅުވިއެވެ.
ޢަބްދުއްރަޙީމް ވިދާޅުވީ އެންސްޕާ އާއި އާސަންދަ އިންތިޚާބަށް ޚަރަދުކުރާ ބަޖެޓަކަށް ވެެއްޖެ ކަމަށާއި، ހަމައެކަނި ފޯމެއް ފުރާލީމަ ދެތިން ލައްކަ ރުފިޔާ އަމިއްލަ އެކައުންޓްތަކަށް ޖަމާކުރަމުން ދާކަމަށެވެ.
ރިޔާސީ އިންތިޚާބަށް ދެމަސް ދުވަހަށް ވެފައި ވާއިރު ރިޔާސީ ކެނޑިޑޭޓުން ދަނީ ކެމްޕޭނު ކުރުމަށް އެކި ހަރަކާތްތައް ހިންގަމުންނެވެ. ރައްޔިތުންނާއި ބައްދަލު ކުރެއްވުމަށް ރަށްރަށަށް ވަޑައިގަތުމާއި ދޮރުން ދޮރަށް ހަރަކާތްތައް ވެސް ދަނީ ކުރިއަށެވެ.
އިންތިޚާބަށް ދެމަހަށް ވީއިރުވެސް ޕީޕީއެމް ޕީއެންސީގެ ރިޔާސީ ކެނޑިޑޭޓު ރައީސް ޢަބްދުﷲ ޔާމިން ހުންނެވީ ޖަލުގައެވެ. އެމަނިކުފާނަށް ކެމްޕޭން ހަރަކާތް ތަކުގައި ބައިވެރިވުމުގެ ފުރުސަތު ނުލިބޭތީ އެކަމުގެ ކަންބޮޑުވުންތައް ހުރި ކަންވެސް މިއަދު އެ ކޯލިޝަނުން ވަނީ އީސީ އާއި ޚިއްސާ ކޮށްފައެވެ.
Advertisement
This content is created and paid for by advertisers and does not involve Voice Journalists
