ދިވެހިރާއްޖޭގެ ތާރީހުގައި ދުވަހަކުވެސް ނުދެކޭ ވަރުގެ ތަރައްގީއާއި ކުރިއެރުން މިއަދު ލިބިފައިވާ ކަމަށް އެމްޑީޕީގެ  ޗެއާޕާސަން ފައްޔާޒް އިސްމާއިލް ވިދާޅުވެއްޖެއެވެ.

ފައްޔާޒް މިހެން ވިދާޅުވެފައިވަނީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ރިޔާސީ ކެމްޕެއިންގެ ތެރެއިން ށ އަތޮޅު ފޯކައިދޫއަށް ކުރެއްވި ދަތުރުގައި، އެރަށުގައި މިރޭ ބޭއްވުނު ރަސްމިއްޔާތުގައި ވާހަކަ ދައްކަވަމުންނެވެ.

އެގޮތުން ފައްޔާޒް ވިދާޅުވީ އެމްޑީޕީއިން ދަތުރު ފަށާފައިވަނީ އެތައް ސިޔާސީ ބޭފުޅުންނާއި ރައްޔިތުން ބައިވެރިވެ ވަޑައިގަންނަވާގެންކަމަށެވެ.

އަދި ކާމިޔާބު ވާނެ ކަމާއިމެދު ހިތުގައި ކުޑަވެސް ޝައްކެއް ނުބާއްވާ މި ދަތުރުފައްޓާފައިވަނީ އެމްޑީޕީގެ މާލިމީ އަދި މިއަދު އެޕާޓީގެ ރިޔާސީ ކެނޑިޑޭޓް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހާއިއެކު ކަމަށް ފައްޔާޒް ވިދާޅުވިއެވެ.

"އެމަނިކުފާނު އަޅުގަނޑުމެން އަމާން ބަނދަރަކަށް ގެނެސްދެއްވި. މިއަދު އަޅުގަނޑުމެން އެތިބީ އެ އަމާން ބަނދަރު ހާސިލް ކޮށްގެން." ފައްޔާޒް ވިދާޅުވިއެވެ.

އެގޮތުން އެތައް ހުރަސްތަކަކާއި ގޮންޖެހުންތަކަކާއި އެކުގައި ވެސް ދިވެހިން ބޭނުންވާ ހެޔޮ ވެރިކަމުގެ ނިޒާމެއް ފައްކާ ކޮށްދެއްވާފައިވާ ކަމަށާއި ރައްޔިތުންގެ މިނިވަންކަން ކަށަވަރު ކޮށްދެއްވާފައިވާ ފައްޔާޒް ވިދާޅުވިއެވެ.

މިއާއިއެކު މުޅި ދުނިޔެއަށް ދިމާވި އާލަމީ ބޮޑު ވަބާ ކަމަށްވާ ކޮވިޑްގެ ބަލިމަޑުކަމުގެ ތެރޭގައި ދިވެހިރާއްޖޭގެ އިގްތިޞާދު ފުނޑުފުނޑު ވިޔަ ނުދީ އެއްްހަމައެއްގައި ހިފެހެއްޓެވި ކަމަށް ފައްޔާޒު ފާހަގަކުރެއްވިއެވެ.

އަދި ރައްޔިތުން އެތައް ޒަމާނެއް ވަންދެން އެދި އެދި ތިބި އަސާސީ ޚިދުމަތްތައް ގާއިމުކޮށް ގައުުމުގެ ތަރައްގީގެ ބިންގާތައް އަޅުއްވާދެއްވާފައިވާ ކަމަށް ވެސް ފައްޔާޒު ވިދާޅުވިއެވެ.

"ދުވަހަކުވެސް ދިވެހިރާއްޖޭގެ ތާރީހުގައި ނުދެކޭ ވަރުގެ ތަރައްގީއާއި ކުރިއެރުން މިއަދު މި ރާއްޖެއަށް މިވަނީ ލިބިފަ. ހުރިިހާ ރޮނގަކަށް ބަލައިލި ކަމުގައި ވިޔަސް." ފައްޔާޒު ވިދާޅުވިއެވެ.

އެގޮތުން އިގްތިޞާދީ ގޮތުން ބެލި ކަމުގައިވިޔަސް އިޖްތިމާއި ގޮތުން ބެލި ކަމުގައި ވިޔަސް ތަރައްޤީއާއި ކުރިއެރުން ދިވެހިރާއްޖެއަށް ލިބިފައިވާ ކަމަށް ފައްޔާޒް ފާހަގަކުރެއްވިއެވެ.

"ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ މި ދައުރުގައި އެ އެޅުނު ބިންގާތަކަކީ އަޅުގަނޑުމެންގެ މި ގައުމު އުދުހިގަންނަން ބޭނުންވެފައިވާ އެތައް ޒަމާނަކުން އެތައް ބަޔަކަށް ނުކުރެވި ހުރި ކަންތައްތައް." ފައްޔާޒް އިތުރަށް ވިދާޅުވިއެވެ.

އަދި މިކަމަކީ އެއްވެސް ޝައްކެތް އޮތް ކަމެއް ނޫން ކަމަށް ފައްޔާޒް ވަނީ ފާހަގަކުރައްވާފައެވެ.

ރައީސް ޞާލިހުގެ ރިޔާސީ ކެމްޕެއިން މިއަދު ރަސްމީކޮށް ފެށުމުގެ ގޮތުން އެމަނިކުފާނާއި އެމަނިކުފާނުގެ ކެމްޕެއިން ޓީމް ވަނީ ށ އަތޮޅުގެ ބައެއް ރަށްތަކަށް ޒިޔާރަތް ކުރައްވާފައެވެ. އެގޮތުން ކޮމަންޑޫ، މަރޮށި، ނޫމަރާ އަދި ފޯކައިދޫއަށް މިއަދު ވަނީ ދަތުރުކުރައްވާފައެވެ.