މިނިސްޓްރީ އޮފް ޖެންޑަރ ގައި ރަޖިސްޓަރކޮށް، ޙާލަތު ބަލަމުންދާ މީހަކު އަޅާލާނެ މީހަކު ނެތި މަގުމަތީގައި އުޅޭ ވީޑިއޯއެއް އާންމުވެއްޖެ އެވެ.
މީސްމީޑިއާގައި އާއްމު ވެފައިވާ އެ ވީޑިއޯ އިން ފެންނަނީ، ނުކުޅެދުންތެރިކަން ހުންނަ އުމުރުން ގާތްގަޑަކަށް 40 އަހަރުން މައްޗަށްދާ ފިރިހެނެއް ބޮލުގައި ފޮތި ގަނޑެއް އައްސައިގެން، މާލޭގެ މަގުމަތީގައި ދަބަހެއް ދަމަމުން ޕޮލިސްޓޭޝަނަށް ވަންނަ ތަނެވެ.
އެ ވީޑިއޯ މީސްމީޑިއާގައި ވައިގައި ހިފުމާއިއެކު ގިނަ ބަޔަކު ވަނީ އެފަދަ ހާލަތެއްގައި ހުރި މީހަކު މަގުމަތީގައި އަޅާލާނެ މީހަކު ނެތި އުޅެމުންދާތީ ޖެންޑާ މިނިސްޓްރީއަށާއި ފުލުހުންނަށްވެސް ވަރަށް ބޮޑަށް ފާޑުކިޔާފައެވެ.
އެކަމާއި ގުޅިގެން ވޮއިސް އިން ކުރި ސުވާލަކަށް ޖަވާބު ދެއްވަމުން ޖެންޑަރ މިނިސްޓްރީގެ މީޑިއާ އޮފިޝަލް ވިދާޅުވީ، ވީޑިއޯ އިން ފެންނަ މީހާ އަކީ އެ މިނިސްޓްރީގައި ރަޖިސްޓަރކޮށް، ޙާލަތު ބަލަމުންދާ މީހެއް ކަމަށެވެ.
އަދި ޖެންޑަރ މިނިސްޓްރީން އަންނަނީ އެ މީހާގެ އާއިލާ އާއި ގުޅުންހުރި އިދާރާތަކާއި ގުޅިގެން އޭނާއަށް ބޭނުންވާ އެހީތެރިކަން ފޯރުކޮށްދެމުން ކަމަށެވެ.
މިއާއެކު ނުކުޅެދުންތެރިކަން ހުންނަ ފަރާތްތަކުގެ އެފަދަ ވީޑިއޯ ތައް މީސް މީޑިއާގައި ދައުރު ނުކުރުމަށް ވެސް މިނިސްޓްރީން ވަނީ އެދިފައެވެ.
Advertisement
This content is created and paid for by advertisers and does not involve Voice Journalists
