އާރުޑީސީއިން ކުރިއަށް ގެންދާ މަޝްރޫޢުތަކުގައި މަސައްކަތްތެރިންގެ ސަލާމަތާއި ރައްކާތެރިކަމަށް ފިޔަވަޅުތައް ނާޅާ ހުންނަކަން ފާހަގަ ކުރެވޭ ކަމަށް އިދިކޮޅު ޕްރޮގްރެސިވް ކޮންގްރެސް ކޯލިޝަން އިން ބުނެފިއެވެ.

އެ ކޯލިޝަނުން މިފަދައިނަ ބުނެފައިވަނީ ނ. ހޮޅުދޫ މަގު ހެދުމުގެ މަސައްކަތުގެ ތެރެއިން ފާރެއް ވެއްޓި ހިނގި ހިތާމަވެރި ހާދިސާގައި އަނިޔާ ލިބުނު ފަރާތްތަކާށާއި އެފަރާތްތަކުގެ ޢާއިލާތަކަށް ހަމްދަރުދީ ފޮނުވާ ނެރުނު ބަޔާނުގައެވެ.

އެގޮތުން މި ހާދިސާގައި އަނިޔާ ލިބުނު ފަރާތްތަކަށް އަވަސް ޝިފާއެއް މިންވަރު ކުރެއްވުން އެދި ދުޢާ ކުރާ ކަމަށާއި އަނިޔާ ލިބުނު ފަރާތްތަކަށާއި އެ ފަރާތްތަކުގެ ޢާއިލާތަކަށް ކޯލިޝަންގެ ލީޑަރު ރައީސް ޢަބްދުالله ޔާމީން ޢަބްދުލްޤައްޔޫމާއި، ލީޑަރޝިޕާއި، ސެނެޓަރުން އަދި ޢާންމު މެންބަރުންގެ ހަމްދަރުދީ ފާޅުކުރާ ކަމަށް ބަޔާނުގައި ވަނީ ބުނެފައެވެ.

Advertisement

މިއާއިއެކު އާރުޑީސީގެ ފަރާތުން މާލެ އާއި ރަށްރަށުގައި ކުރިއަށް ގެންދާ މަޝްރޫޢުތަކުގައި މަސައްކަތް ކުރައްވާ ބޭފުޅުންގެ ސަލާމަތާއި ރައްކާތެރިކަމަށް އަޅަން ޖެހޭ ފިޔަވަޅުތައް ނާޅުއްވާ ހުންނަކަން ވަރަށް ގިނަ ފަހަރަށް ފާހަގަ ކުރެވޭ ކަަމަށް އެ ކޯލިޝަނުން ވަނީ ބުނެފައެވެ.

އެގޮތުން ހޮޅުދޫގައި ހިނގި މި ހާދިސާގައިވެސް ފާރު ބުޑު ކޮންނަމުން ދިޔައިރު ފާރު ވެއްޓުނަ ނުދިނުމަށް އަޅަންޖެހޭ ރައްކާތެރިކަމުގެ ފިޔަވަޅުތައް އަޅާފައި ނުވާކަމަށް އިދިކޮޅުން ވަނީ ފާހަގަކޮށްފައެވެ.

އަދި މިފަދަ ހާދިސާތަކުން ގެއްލުން ލިބެމުން ދަނީ ނިކަމެތި ދިވެހި ރައްޔިތުންނަށް ކަމަށް ވެސް ވަނީ ފާހަގަކޮށްފައެވެ.

މީގެ އިތުރުން ސަރުކާރުން ހިންގާ މަޝްރޫޢުތަކުގައި މަސައްކަތް ކުރައްވާ އެންމެންގެ ރައްކާތެރިކަމަށް އިސްކަން ދިނުމަށާއި، މަސައްކަތް ކުރައްވާ ބޭފުޅުންގެ ސަލާމަތާއި ރައްކާތެރިކަން ކަށަވަރު ކުރުމުގެ އަޅަންޖެހޭ އެންމެހައި ފިޔަވަޅުތައް އަބަދުމެ އެޅުމަށް އެ ކޯލިޝަނުން ވަނީ ގޮވާލާފައެވެ.

އަދި މި ހާދިސާގައި އަނިޔާވި ފަރާތްތަކަށް ފުރިހަމަ ފަރުވާއެއް ދިނުން އަވަސް ކުރުމަށްވެސް ވަނީ ގޮވާލާފައެވެ.