ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ބޮޑުވަޒީރުކަން ހޯދުމަށްޓަކައި ޤައުމުގެ ތަރައްޤީއަށް ކުރެވެމުންދާ ކަންކަން ހުއްޓައިލުމަށް ވަކާލާތުކުރުމަކީ ވަރަށް ހުތުރުކަމެއް ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާހިމް ޝަރީފް(މަވޯޓާ) ވިދާޅުވެއްޖެއެވެ.
ޝަރީފް މިހެން ވިދާޅުވެފައި ވަނީ އޭނާ ކުރެއްވެވި ޓްވީޓެއްގައެވެ.
ޝަރީފް ވިދާޅުވީ ރައީސް ނަޝީދަށް ބޮޑުވަޒީރުކަން ހޯދުމަށްޓަކައި ޤައުމުގެ ތަރައްޤީއަށާއި އިޖްތިމަޢީ ތަރައްޤީއަށް ކުރަމުން ގެންދާ ހުރިހާ މަސައްކަތް ހުއްޓާލުމަށް އެމަނިކުފާނު ވަކާލަތު ކުރެއްވުމަކީ ވަރަށް ހުތުރު ކަމެއް ކަމަށެވެ.
އަދި އެއީ ޤައުމުގެ މަސްލަޙަތަށްވުރެ ޒާތީ މަސްލަޙަތު އިސްކުރުމުގެ މިސާލެއް ކަމަށްވެސް ޝަރީފްވަނީ ވިދާޅުވެފައެވެ.
"އެއްވެސް ސިޔާސީ ލީޑާރެއްގެ "އީގޯ" އަށް "ކޭޓަރ" ކުރުމަށްޓަކައި ރައްޔިތުންގެ މަސްލަޙަތާ ޤައުމު ބިނާ ކުރުމަށް ކުރަންޖެހޭ ކަންކަން ޤުރުބާން ކޮށްގެންނުވާނެ" ޝަރީފްގެ ޓްވީޓުގައި ވެއެވެ.
ޝަރީފް މިހެން ވިދާޅުވެފައިމިވަނީ ދަ ޑިމޮކްރެޓްސްގެ މަޝްވަރާ ބައްދަލުވުމެއްގައި ވާހަކަދައްކަވަމުން ދެއްކެވި ވާހަކަފުޅާކައި ގުޅިގެންނެވެ. އެބައްދަލުވުމުގައި ރައީސް ނަޝީދު ވިދާޅުވެފައިވަނީ މިހާރު ކުރިއަށްދާ ކޮންކްރިޓް މަސައްކަތްތައް ހުއްޓާލާފައި ނިޒާމީ މަސައްކަތް ފަށަން ވެއްޖެކަމަށެވެ.
އެބައްދަލުވުމުގައި ވާހަކަދައްކަވަމުން ރައީސް ނަޝީދު އިތުރަށް ވިދާޅުވީ މަގުހެދުން ފަދަ ކަންކަމުގެ ވާހަކައިގެ ބަދަލުގައި ދައްކަންވީ ނިޒާމީ ވާހަކަތައް ކަމަށް އެމަނިކުފާނު ޤަބޫލް ކުރައްވާކަމަށެވެ.
Advertisement
This content is created and paid for by advertisers and does not involve Voice Journalists
