މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ކެންސަރު ސްކްރީނިން އެޕްލިކޭޝަނަކާއި ޑޭޓާބޭސް އެއް އުފެއްދުމަށް އެހީތެރިވުމުގެ ގޮތުން ކެންސާ ސޮސައިޓީ އޮފް މޯލްޑިވްސް (ސީއެސްއެމް) އަށް, އެއް ލައްކަ ރުފިޔާގެ އެހީއެއް ދީފިއެވެ.

އެމްއޭސީއެލް ކޯޕަރޭޓް އޮފީހުގައި ބޭއްވި ރަސްމިއްޔާތެއްގައި، ކެންސާ ސޮސައިޓީ އޮފް މޯލްޑިވްސްގެ ނީނާ މަންސޫރަށް މި އެހީގެ ޗެކް ހަވާލުކޮށް ދެއްވީ އެމްއޭސީއެލްގެ މެނޭޖިންގ ޑިރެކްޓަރު އަދި ސީއީއޯ މަހުޖޫބް ޝުޖާއުއެވެ.

އެމްއޭސީއެލް އިން ބުނީ މި ހަދިޔާއަކީ މުޖުތަމައަށް އެހީތެރިކަން ފޯރުކޮށްދިނުމަށް އެ ކުންފުނިން ކުރަމުން އަންނަ މަސައްކަތުގެ ތެރެއިން ރާއްޖޭގެ ސިއްހީ ދާއިރާ ކުރިއެރުވުމަށް ކުރާ މަސައްކަތެއް ކަމަށެވެ.

Advertisement

މިގޮތުން މިހާރު ކެންސަރުގެ ހުރިހައި ސްކްރީނިން ހަދަނީ ފިޒިކަލް ފޯމްތައް ބޭނުން ކޮށްގެން ކަމަށާއި ޑޭޓާ މެނޭޖް ކުރަނީ މެނުއަލްކޮށް ކަމަށާއި އެހެންވެ އެކަމަށް ހައްލެއް ގެނެސް ލުއިފަސޭހަ ގޮތަކަށް އެކަން ކުރުމަށް ދީފައިވާ އެހީއެއް ކަމަށް އެމްއޭސީއެލް އިން ބުނެފައިވެއެވެ.

މި އެހީ އާއެކު މި މަސައްކަތަށް އިންގިލާބީ ބަދަލެއް އަންނާނެކަން ފާހަގަކޮށް އެމްއޭސީއެލުން ބުނީ މިކަމުގެ ސަބަބުން ހަރުދަނާ އަދި ސިއްރު ސްކްރީނިންތަކަށް މަގުފަހިވެގެންދާނެ ކަމަށެވެ.