އދ ގެ އިންސާނީ ހައްގުތަކާއި ބެހޭ ކޮމިޝަނުގައި ޤުރުއާން އެންދުމާއި ގުޅިގެން ނެގި ވޯޓުގައި އެކަމަށް ތާއީދުކޮށް ނުވަ ގައުމަކުން ވޯޓް ދީފިއެވެ.

ސްވިޑެން ގައި ގުރުއާން އެންދި މައްސަލަ އާއި ދެކޮޅަށް ނެގި މި ވޯޓުގައި، ސްވިޑެން ގެ އަމަލަށް ތާއީދުކޮށް، ވޯޓް ދިނީ އެމެރިކާ އާއި އިނގިރޭސިވިލާތުގެ އިތުރުން ބެލްޖިއަމް، ކޮސްޓަރިކާ، ޗެކްރިޕަބްލިކް، ފިންލޭންޑް، ފްރާންސް، ޖަރިމަން، ލިތުއޭނިއާ، ލަގްޒަމްބާގް، މޮންޓެނީގްރޯ އަދި ރޯމޭނިއާއެވެ.

މި މައްސަލައިގައި އެއްވެސް ކޮޅަކަށް ވޯޓު ނުދިނީ 7 ގައުމަކުންނެވެ. އޭގ ތެރޭގައި ހިމެނެނީ، ބެނިން، ޗިލީ، ޖޯޖިއާ، ހޮންޑްރަސް، މެކްސިކޯ، ނޭޕާލް އަދި ޕެރެގުއޭ އިން ނެވެ. ވޯޓުގައި ބައިވެރިވި އަނެއް 28 ގައުމުން ވޯޓު ލާފައި ވަނީ ގުރުއާން އެންދުމާއި ދެކޮޅަށެވެ. އޭގެ ތެރޭގައި ރާއްޖެވެސް ހިމެނެއެވެ. 

Advertisement

ގުރުއާން އެންދުމާއި ދެކޮޅަށް ނެގި ވޯޓުގައި ގައުމުތަކުން ވޯޓު ދިން ގޮތް-- 

އަޟްޙާ ޢީދު ދުވަހާ ދިމާކޮށް ސްވިޑެންގެ މިސްކިތެއްގެ ކައިރީގައި، ފުލުހުންގެ ހިމާޔަތާއި، ސްވިޑެންގެ ކޯޓުގެ ހުއްދައާއިވެސް އެކުގައި މުޞްޙަފް އެންދުމާއި ގުޅިގެން ގިނަ ގައުމުތަކެއްގެ ނުރުހުން އެ ގައުމަށް ވަނީ އަމާޒުވެފައެވެ. 

އެގޮތުން ޢިރާޤުން ސްވިޑެން އަށް ހިޖުރަ ކޮށް ސްވިޑެންގައި ދިރިއުޅެމުންދާ ސަލްވާން މޮމިކާ ނަމަކަށް ކިޔާ މީހަކު ވަނީ ސްޓޮކްހަމްގެ އެންމެ ބޮޑު މިސްކިތުގެ ކުރިމަތީގައި ކީރިތި ޤުރުއާން މުސްޙަފެއްގެ ތެރެއަށް އޫރުމަސް އަޅައި, ގުރުއާންއަށް އިހްތިރާމް ކުޑަކޮށް މުސްހަފުގައި އަލިފާން ރޯކޮށްލައިފައެވެ.

އެކަން އޭނާ ކުރި އިރު، ސްވިޑެން ގެ ސަރުކާރުގެ ފުލުހުން ތިބީ އޭނާ އަށް ހިމާޔަތް ދިނުމަށް އޭނާ ހުރި ސަރަހައްދު ބަންދު ކޮށްގެން، އެތަނުގެ ސެކިޔުރިޓީންގެ ގޮތުގައެވެ. އަދި މުސްހަފު ރޯކުރުން ހުއްޓުވަން ދިޔަ މީހުންނަށް ހުރަސް އަޅައި އެކަކު ފުލުހުން ހައްޔަރުވެސް ކުރިއެވެ.

ކީރިތި ޤުރުއާން އަންދާލައި ސްވިޑެން އިން ހިންގި ހައްދުފަހަނައަޅައިފައިވާ ނުބައި ޢަމަލާއިމެދު އަޅާނެ ފިޔަވަޅަކާއި މެދުގައި މަޝްވަރާކޮށް އެކަން އިތުރަށް ތަކުރާރު ވިޔަނުދިނުމަށްޓަކައި އެޅިދާނެ ފިޔަވަޅުތަކާ ގުޅޭގޮތުން މަޝްވަރާކުރުމަށްޓަކައި އޯގަނައިޒޭޝަން އޮފް އިސްލާމިކް ކޯޕަރޭޝަން (އޯ.އައި.ސީ.)ގެ އެގްޒެކެޓިވް ކޮމިޓީން ވަނީ އޯޕަން-އެންޑެޑް ކުއްލި ބައްދަލުވުމެއް ވެސް ބާއްވާފައެވެ. 

ސްވިޑެން ގައި ގުރުއާން އެންދުމުގެ ހަރުކަށި އަމަލު ކުށްވެރިކޮށް އެ ގައުމަށް ދަތި ކުރުމުގެ ފިޔަވަޅު އަޅާފާނެ ކަމުގެ ބިރު ހީވުމާއި އެކު، ސްވިޑެން ގެ ފޮރިން މިނިސްޓްރީން ފަހުން ނެރުނު ބަޔާނެއްގައި ވަނީ، އެ ގައުމުގައި ގުރުއާން އެންދި މައްސަލާގައި ސަރުކާރުގެ ބައިވެރިވުމެއް ނެތް ކަން ހާމަކުރަން މަސައްކަތް ކޮށް، އެކަން ކުށްވެރިކޮށްފައެވެ.