މިދިޔަ އަހަރު ގައުމީ އެއާލައިން، މޯލްޑިވިއަން ހިންގާ އައިލެންޑް އޭވިއޭޝަނަށް 164 މިލިއަން ރުފިޔާގެ ގެއްލުން ލިބިފައިވާކަން ހާމަވެއްޖެއެވެ.

ޕީބީސީއިން އާންމުކޮށްފައިވާ ކުއާޓާލީ ރިޕޯޓުތަކުގައިވާ ގޮތުން މިދިޔަ އަހަރު އެ ކުންފުންޏަށް ޖުމްލަ އާމްދަނީގެ ލިބުނީ 1.8 ބިލިއަން ރުފިޔާ އެވެ. ނަމަވެސް ފާއިތުވެދިޔަ އަހަރުގައިވެސް އެ ކުންފުނިން، ކުންފުނީގެ މުވައްޒަފުންގެ މުސާރަ އާއި އިނާޔަތްތަކަށް ބޮޑު ހޭދައެއް ކޮށްފައިވާ ކަމަށާ އޭގެ ސަބަބުން އެ ކުންފުންޏަށް ބޮޑު ގެއްލުމެއް ވެފައިވާ ކަމަށް ޕީސީބީގެ ރިޕޯޓްގައި ވެއެވެ. އެގޮތުން، މިދިޔަ އަހަރުގެ ފަހު ކުއާޓަރުގައި ވެސް މުވައްޒަފުންގެ މުސާރަ ދިނުމަށް ކުރި ހޭދައަށާ 11 މިލިއަން ރުފިޔާ ވަނީ އިތުރު ވެފަ އެވެ.

މިދިޔަ އަހަރުގެ ހަތަރު ކުއާޓަރުގައި ވެސް އެ ކުންފުންޏަށް ލިބުނީ ގެއްލުމެވެ. އެންމެ ބޮޑު ގެއްލުމެއް ލިބުނީ ދެވަނަ ކުއާޓަރުގަ އެވެ. އެ ކުއާޓަރުގައި 67 މިލިއަން ރުފިޔާގެ ގެއްލުން ލިބުނެވެ. އެ ކުއާޓަރުގައި އެހާ ބޮޑު ގެއްލުމެއް ލިބުނީ ލޯނާއި އިންޓްރެސްޓްގެ ގޮތުގައި 16 މިލިއަން ރުފިޔާ ދައްކަން ޖެހުމުގެ އިތުރުން ކުންފުނީގެ އާމްދަނީ ދަށްވުމުގެ ސަބަބުންނެވެ.

ކޮވިޑާ ގުޅިގެން ބޯޑަރު ބަންދުކޮށް، ދަތުރުފަތުރު ކުރުން ހުއްޓާލުމާ ގުޅިގެން 2020 ވަނަ އަހަރު ވެސް އެ ކުންފުންޏަށް ބޮޑު ގެއްލުމެއް ވި އެވެ. އެ އަހަރު 400 މިލިއަން ރުފިޔާގެ ގެއްލުން ލިބުނެވެ. އޭގެ ފަހުން އެ ކުންފުންޏަށް ފައިދާ ލިބިފައެއް ނުވެ އެވެ. އެގޮތުން، 2021 ވަނަ އަހަރުވެސް އައިލެންޑް އޭވިއޭޝަނަށް 159 މިލިއަން ރުފިޔާގެ ގެއްލުމެއް ލިބުނެވެ. 

ސަރުކާރުގެ 100 ޕަސެންޓް ހިއްސާ އޮންނަ އައިލޭންޑް އޭވިއޭޝަން އުފެއްދީ 2000 ގަ އެވެ. ދިވެހި ގައުމީ އެއާލައިންގެ ގޮތުގައި އައިލޭންޑް އޭވިއޭޝަންސް އިން ހިންގާ މޯލްޑިވިއަން އަކީ ރާއްޖޭގެ ވައިގެ ދަތުރުފަތުރުގައި ބޮޑު ދައުރެއް އަދާކުރަމުން އަންނަ އެއާލައިނެކެވެ.