ދީނީ ޢިލްމު ދަސްކުރަން ޖެހޭނީ ބޮޑެތި ޢިލްމުވެރިންގެ ފޮތްތަކާ ދަރުސްތަކުން ކަމަށް އަދާލަތު ޕާޓީގެ ރައީސް އަދި ހޯމް މިނިސްޓަރު ޢިމްރާން އަބްދުالله ވިދާޅުވެއްޖެ އެވެ.
ރިޔާސީ އިންތިޚާބުގެ ވޯޓާއި ޖެހެންދެން ނުނިދާ ހޭލާ ތިބެގެން ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހުގެ ކެމްޕޭނުގައި މަސައްކަތްކުރުމަށް ހިތްވަރުދެއްވާ އިމްރާނު، ކީރިތި ރަސޫލާ ޞައްލަالله ޢަލައިހި ވަސައްލަމަގެ ހަދީސް ބަސްފުޅެއްކަމަށް ވިދާޅުވެ ބޭނުންކުރެއްވީ އެކަލޭގެފާނުގެ ސައްހަ ހަދީސެއް ނޫންކަމަށް ޝެއިޚް ނިޝާން ވަނީ ދާދިފަހުން ހާމަކޮށްދެއްވާފައެވެ.
އެކަމާއި ގުޅިގެން ޢިމްރާން ކުރެއްވި ޓްވީޓެއްގައި ވިދާޅުވީ އޭނާ އަކީ ރަސޫލާ صلى الله عليه وسلم ގެ ޙަދީސްފުޅުތަކުގެ ދަރަޖަ ކަނޑައަޅަން އެނގޭވަރުގެ ޢިލްމުވެރިއެއް ނޫން ކަމަށެވެ. އަދި ޝައިޚް އާދަމް ނިޝާނަކީ ވެސް އެވަރުގެ ބޮޑު އިލްމުވެރިއެއް ހެން ހީނުވާކަމަށް އިމްރާން ވިދާޅުވި އެވެ.
"އަޅުގަނޑުމެން ދަސްކުރަން ޖެހެނީ ބޮޑެތި ޢިލްމުވެރިންގެ ފޮތްތަކާ ދަރުސްތަކުން." އިމްރާން ވިދާޅުވި އެވެ.
އިމްރާން އިތުރަށް ވިދާޅުވީ ޝައިޚް ނިޝާންގެ ކުށްތަކާއި، ހައްދަވާ ގޯސްތަކަށް ރައްދު ދިނުމަކީ އިމްރާނަށް ކުރެވޭ މާ މޮޅުކަމަކާ، ހެޔޮ ކަމެއް ކަމަކަށް ދެކި އެކަން ކުރާކަށް ނެތިން ކަމަށެވެ.
"މާތް الله އަޅުގަނޑުމެން އެންމެނަށް އެ އިލާހު ރުހިވޮޑިގަންނަވާ މަގަށް މަގު ދައްކަވާ ހެޔޮ ރަހުމަތް ލައްވާށި." ޢިމްރާން ގެ ޓުވީޓުގައި އޭނާ ދުޢާކުރައްވާފައިވެއެވެ.
ރައީސް ޞާލިހުގެ ރިޔާސީ ކެމްޕޭނަށް ށ އަތޮޅަށް ކުރެއްވި ދަތުރުފުޅުގައި އެ އަތޮޅުގެ ފޯކައިދޫގައި ބޭއްވި ޖަލްސާއެއްގައި ވާހަކަދައްކަވަމުން އިމްރާނު ވިދާޅުވީ ރަސޫލާ ޞައްލަالله ޢަލައިހި ވަސައްލަމައަށް ފާޅުގައި އިސްލާމްދީނަށް ދައުވަތު ދެއްވަން މާތް الله ސުބްޙާނަހޫ ވަތަޢާލާ އެންގެވުމުން އެކަލޭގެފާނުގެ އަނބިކަނބަލުން، މާތް الله އެކަމަނާއަށް ރުއްސުންލެއްވި ޚަދީޖަތުގެފާނުގެ އަރިހަށް ވަޑައިގެން، ނިދުމާއި އަރާމުކުރުމުގެ ޒަމާން ފާއިތުވެއްޖެކަމަށް ހަދީސްކުރެއްވި ކަމަށެވެ.
އިމްރާނު އެ މިސާލު ނެންގެވީ ރިޔާސީ އިންތިޚާބަށް ވަގުތު ކުޑަތަންވެފައިވާއިރު، ރައީސް ޞާލިހަށް ދެވަނަ ދައުރެއް ހޯއްދަވާދެއްވުމަށް ކެމްޕޭނު ޓީމުތަކުން ނިދުމާއި އަރާމާއި ދޫކޮށް މަސައްކަތްޕުޅު ކުރެއްވުމަށް ހިތްވެރުދެއްވުމަށެވެ. އަދި އޭނާ ވަނީ އިންތިޚާބާއި ޖެހެންދެން މި އޮތް ދުވަސްތަކުގައި ހުއްޓުމެއްނެތި އެ މަސައްކަތް ކުރުމަށް ގޮވާލައްވާފަ އެވެ.
އެހެން ނަމަވެސް ރަސޫލާ ޞައްލައްالله ޢަލައިހި ވަސައްލަމް ގެ ހަދީސް ބަސްފުޅެއްކަމަށް އިމްރާނު ވިދާޅުވި އިބާރާތަކީ އެކަލޭގެފާނުގެ ހަދީސް ބަސްފުޅުތައް ލިޔުއްވާފައިވާ އެއްވެސް ހަދީސް ފޮތެއްގައި އޮތް އިބާރާތެއް ނޫން ކަމަށް ނިޝާން ވަނީ ވިދާޅުވެފަ އެވެ.
Advertisement
This content is created and paid for by advertisers and does not involve Voice Journalists
