ރައީސް މުޙައްމަދު ނަޝީދުގެ ސިޔާސީ ތަރި ދަނީ އޮއްސެމުން ކަމަށް ރައްޔިތުންގެ މަޖިލީހުގެ މަރަދޫ ދާއިރާގެ މެމްބަރު އިބްރާޙިމް ޝަރީފް (މަވޯޓާ) ވިދާޅުވެއްޖެއެވެ.
ޝަރީފް މިހެން ވިދާޅުވީ އޭނަ ކުރައްވާފައިވާ ޓްވީޓެއްގައެވެ.
ޝަރީފް ކުރެއްވެވި ޓްވީޓުތަކެއްގައި ވިދާޅުވެފައިވަނީ ކޮންމެ ސިޔާސީ ލީޑަރެއްގެ ވެސް ތަރި އަރާ އޮއްސޭ ބީދައިން ރައީސް ނަޝީދުގެ ތަރިވެސް ދަނީ އޮއްސެމުން، އެމްޑީޕީ ގެ ޕްރައިމަރީ ގެއްލުނު ހިސާބަކީ ރައީސް ނަޝީދުގެ ސިޔާސީ ޙަޔާތް ނިމުމުގެ ފެށުން ކަމަށެވެ.
ޝަރީފްގެ އެހެން ޓްވީޓޭއްގައި ވިދާޅުވެފައިވަނީ ތާރީޚްގައި ކަންކަން ހިނގާފައި އޮތް މަގަށް ބަލާއިރު ރައީސް ނަޝީދުގެ ޕާޓީ ވެގެންދާނީ ކުރިއަށް އޮތް މަޖިލިސް އިންތިޚާބަށް ފަހު އެމްއާރްއެމް ފަދަ ކުޑަ ޕާޓީއަކަށް ކަމަށެވެ.
"ޔަޤީނުންވެސް މަޖިލިސްގަ އެމްޑީޕީ ޓިކެޓްގަ ހޮވިގެން ޑިމޮކްރެޓްސްއޭ ކިޔާ ޕާޓީއަށް ދިޔަ ގިނަ މެމްބަރުންގެ ގޮނޑިގެއްލޭނެ"
ޝަރީފް ވިދާޅުވެފައިވެއެވެ.
ވޭތުވެދިޔަ ހަތަރު އަހަރު އިދިކޮޅު ފަރާތްތަކާއި ގުޅިގެން ރައީސް ނަޝީދު ކުރެއްވި މަސައްކަތަކީ ސަރުކާރު ކުޑަ ކަކޫ މައްޗަށް ތިރިކުރުމާއި އެމްޑީޕީ ފުނޑުފުނޑު ކޮށްލެވޭތޯ ކުރެއްވި މަސައްކަތް ކަމަށް ޝަރީފް ވިދާޅުވިއެވެ.
"މިހާރު މަޖިލިސް ރައީސް ކަންވެސް ގެއްލުމުގެ މަގުމަތީގައި އޮތް އިރު އެމްޑީޕީ ރޫޅާލަން ކުރެވޭނެ ކަމެއް ނެތް"
ޝަރީފް ވިދާޅުވިއެވެ.
ރައީސް ނަޝީދަށް އެމްޑީޕީ ރޫޅާލަން ކުރެވޭނެ ކަމެއް ނެތްކަމަށް ޝަރީފް ވިދާޅުވެފައިމިވަނީ ޖުލައި 12 ވަނަ ދުވަހުގެ ރޭ ދަ ޑިމޮކްރެޓްސް އިން ބޭއްވި ޖަލްސާގައި ވާހަކަ ދައްކަވަމުން ރައީސް ނަޝީދު ދެއްކެވި ވާހަކަފުޅަކާއި ގުޅިގެނެވެ.
އެރޭގެ ޖަލްސާގައި ވާހަކަ ދައްކަވަމުން ރައީސް ނަޝީދު ވިދާޅުވެފައިވަނީ އެމަނިކުފާނު އެޕާޓީ ރޫޅާލާނެ ކަމަށެވެ.
ރައީސް ނަޝީދަކީ އެމްޑީޕީ އުފެދުނިއްސުރެ 18 އަހަރުވަންދެން އެމްޑީޕީއަށް ޚިދްމަތްތަކެއް ކޮށްދެއްވި ބޭފުޅެވެ. އަދި ރައީސް ނަޝީދަކީ އޭރު އެމްޑީޕީގެ އެންމެ މަޤްބޫލް ސިޔާސީ ޝަހްސިއްޔަތެވެ. ނަމަވެސް ރައީސް ޞާލިޙް ވެރިކަމަށް ހޮވިވަޑައިގެން، އެމަނިކުފާނަށް ތާއީދު ކުރައްވާ ބޭފުޅުން ޕާޓީގެ އިސް މަގާމުތަކަށް އިންތިހާބު ވާން ފެށުމާއި އެކު ރައީސް ނަޝީދަށް އޮތް ތާއީދު އެމްޑީޕީގެ ތެރެއިން ދިޔައީ ކުޑަވަމުންނެވެ.
Advertisement
This content is created and paid for by advertisers and does not involve Voice Journalists
