އެފްއޭއެމްގެ މުވައްޒަފުންގެ ތެރެއިން މުސާރަ ނުދެވި ހުރި މުވައްޒަފުންނަށް ކުރިއަށް އޮތް ދެ ހަފުތާއެއްހާ ދުވަސް ތެރޭގައި މުސާރަ ދެވޭނެ ކަމަށް އެ އެސޯސިއޭޝަންގެ ރައީސް ބައްސާމް އަދީލް ޖަލީލް ވިދާޅުވެއްޖެއެވެ.
ބައްސާމް ވިދާޅުވީ، 2020 ވަނަ އަހަރު ކުރިމަތިވި ކޯވިޑް-19 ގެ ބަލިމަޑުކަމާއިއެކު މާލީގޮތުން ބޮޑު ދަތި ތަކަކާއި އެފްއޭއެމް ކުރިމަތިލާން ޖެހުނު ކަމަށެވެ. އެހެން ނަމަވެސް، އެ ދަތި ތަކާއި އެކުވެސް، 2019, 2020 އަދި 2021 ގެ ވެސް ވަކި ހިސާބަކަށް ކްލަބު ތަކަށް މާލީ ގޮތުން އެހީވަމުން ދިޔަ ކަމަށް އޭނާ ވިދާޅުވި އެވެ.
އޭރުގައި މުބާރާތްތައް ނުކުޅުނު ނަމަވެސް، ވަޒީފާއަށް، މަސައްކަތަށް ނުނުކުންނަ ކަމުގައި ވިޔަސް މުސާރަ ތަކާއި ކުލަބު ތަކަށް ފޯރުކޮށްދޭންޖެހޭ އެހީތެރިކަން އައީ ފޯރުކޮށްދެމުން. އޭރު އަޅުގަނޑު އެންމެ ބޮޑަށް މަސައްކަތް ކުރަމުންދިޔައީ މި ދަތި ހާލަތުގައި، ކުލަބުތަކަށް ވެވެން އޮތް އެހީތެރިކަމެއް ކޮށްދޭން ޖެހޭނެ ކަމަށް. އެދުވަހު އަޅުގަނޑުމެން އެއްވެސް މުވައްޒަފަކު ވެސް މަދެއް ނުކުރޭ. އެއްވެސް މުސާރައެއް ކުޑައެއް ނުކުރޭ. އެއްވެސް ކުލަބަކަށް ދެވެންވާ އެހީވެސް މަދެއް ނުކުރޭ. އަދި ދޭން ޖެހޭ ފައިސާތައްވެސް އިރާދަކުރެއްވީތީ ދެމުން ދިޔައީ.
އެފްއޭއެމްގެ ރައީސް ބައްސާމް އަދީލް ޖަލީލް
ބައްސާމް ވިދާޅުވީ ކޯވިޑުގެ އެ ދަތި ހާލަތުގައި އޭނާ މަސައްކަތް ކުރެއްވީ މުވައްޒަފުންނާއި ޓީމުތަކަށް ދަތި ނުވާނޭ ގޮތަށް މަސައްކަތް ކުރަން ކަމަށާ، އެހެންނަމަވެސް އެގޮތަށް އެކަން ކޮށް ނިމުނުއިރު، އެފްއޭއެމްއަށް އޮތީ މާލީގޮތުން ބޮޑު ދަތިތަކަކާއި ކުރިމަތިވެފައި ކަމަށެވެ.
އަދި އޭގެ ފަހުންވެސް ސްޕޮންސަރުން ނުލިބުމާއި ގުޅިގެން ގިނަ ދަތިތަކާއި ކުރިމަތިލާން ޖެހުނު ކަމަށާ، 2021 ވަނަ އަހަރުގެ ސާފުޗެންޕިޔައްޝިޕް ނިމުނުއިރު އެފްއޭއެމްގެ ދަރަނި 30,000 މިލިއަނަށް އެރި ކަމަށް އޭނާ ވިދާޅުވި އެވެ.
"އެހެންނަމަވެސް އެ ދަރަނި މިވަނީ 6 މިލިއަން ރުފިޔާއަށް ކުޑަ ކުރެވިފައި. އިރާދަކުރެއްވިޔާ ކުރިއަށްއޮތް ދެތިން މަހެއްގެ ތެރޭގައި މިވެސް ހަމަ ޚަލާސްކުރެވިދާނެ. އަދި ހަމައެއާ އެކީގައި އަޅުގަނޑުމެންގެ ކުލަބު ތަކަށާއި، އަދި މުވައްޒަފުންގެ ނުދެވި ހުރި މުސާރަ ވެއްޖެއްޔާ އެ މުސާރަ ވެސް އިރާދަކުރެއްވިޔާ ހަމަ ދެވިގެންދާނެ."
އެފްއޭއެމްގެ ރައީސް ބައްސާމް އަދީލް ޖަލީލް
މިއާއެކު ބައްސާމް ވިދާޅުވީ ކޮވިޑަށްފަހު ރާއްޖޭގެ ބޮޑެތި ދެތިން ކުންފުނި ފިޔަވައި އެހެން ކުންފުނިތަކުން ސްޕޮންސާޝިޕް ދިނުމަށް އަދިވެސް ދެކޮޅު ހަދަމުންދާ ކަމަށާ، އޭގެ ސަބަބުން ވެސް މާލީ ދަތިތަކާއި ކުރިމަތިލާން ޖެހޭ ކަމަށެވެ.
"އެހެން ނަމަވެސް މިވަގުތާއި ހަމައަށް ޖެހެންދެން އަޅުގަނޑުމެންގެ އެ ހުރި، އަޅުގަނޑުމެންގެ ކުލަބު ތަކަށް ދޭ ފައިސާ ތައްވެސް، ބުނެފަ އޮންނަ ދުވަހަށް އެބަހުރި ކްލަބް ތަކަށް ދެވިފައި. އިރާދަކުރެއްވިޔާ ކުރިއަށް އޮތް ތަނުގައި ވެސް އެއަށް ހުއްޓުމެއް ނެތި، ކުރިއަށް ދާނެ. އަދި ހަމައެއާއި އެކީގައި ކުރިއަށް އޮތް ދެ ހަފްތާ ތެރޭގައި، މިހާރު އަޅުގަނޑުމެންގެ ބައެއް މުވައްޒަފުންނަށް ނުދެވި ހުރި މުސާރަ ތައްވެސް އިރާދަކުރެއްވިޔާ ދެވިގެންދާނެ."
އެފްއޭއެމްގެ ރައީސް ބައްސާމް އަދީލް ޖަލީލް
މިއާއެކު ބައްސާމް ވިދާޅުވީ އޭނާގެ ފުރަތަމަ ދައުރު ދިޔައީ ވަރަށް ކާމިޔާބު ކަމާއި އެކު ކަމަށާ، އެހެންނަމަވެސް ދެވަނަ ދައުރުގައި ގިނަ ދަތިތަކާ ކުރިމަތިވި ކަމަށެވެ. އެ ދަތި ތަކުންވެސް އަރައިގަނެވޭނެ ކަމަށް ބައްސާމް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
