އެފްއޭއެމްގެ މުވައްޒަފުންގެ ތެރެއިން މުސާރަ ނުދެވި ހުރި މުވައްޒަފުންނަށް ކުރިއަށް އޮތް ދެ ހަފުތާއެއްހާ ދުވަސް ތެރޭގައި މުސާރަ ދެވޭނެ ކަމަށް އެ އެސޯސިއޭޝަންގެ ރައީސް ބައްސާމް އަދީލް ޖަލީލް ވިދާޅުވެއްޖެއެވެ.

ބައްސާމް ވިދާޅުވީ، 2020 ވަނަ އަހަރު ކުރިމަތިވި ކޯވިޑް-19 ގެ ބަލިމަޑުކަމާއިއެކު މާލީގޮތުން ބޮޑު ދަތި ތަކަކާއި އެފްއޭއެމް ކުރިމަތިލާން ޖެހުނު ކަމަށެވެ. އެހެން ނަމަވެސް، އެ ދަތި ތަކާއި އެކުވެސް، 2019, 2020 އަދި 2021 ގެ ވެސް ވަކި ހިސާބަކަށް ކްލަބު ތަކަށް މާލީ ގޮތުން އެހީވަމުން ދިޔަ ކަމަށް އޭނާ ވިދާޅުވި އެވެ. 

ބައްސާމް ވިދާޅުވީ ކޯވިޑުގެ އެ ދަތި ހާލަތުގައި އޭނާ މަސައްކަތް ކުރެއްވީ މުވައްޒަފުންނާއި ޓީމުތަކަށް ދަތި ނުވާނޭ ގޮތަށް މަސައްކަތް ކުރަން ކަމަށާ، އެހެންނަމަވެސް އެގޮތަށް އެކަން ކޮށް ނިމުނުއިރު، އެފްއޭއެމްއަށް އޮތީ މާލީގޮތުން ބޮޑު ދަތިތަކަކާއި ކުރިމަތިވެފައި ކަމަށެވެ. 

އަދި އޭގެ ފަހުންވެސް ސްޕޮންސަރުން ނުލިބުމާއި ގުޅިގެން ގިނަ ދަތިތަކާއި ކުރިމަތިލާން ޖެހުނު ކަމަށާ، 2021 ވަނަ އަހަރުގެ ސާފުޗެންޕިޔައްޝިޕް ނިމުނުއިރު އެފްއޭއެމްގެ ދަރަނި 30,000 މިލިއަނަށް އެރި ކަމަށް އޭނާ ވިދާޅުވި އެވެ. 

މިއާއެކު ބައްސާމް ވިދާޅުވީ ކޮވިޑަށްފަހު ރާއްޖޭގެ ބޮޑެތި ދެތިން ކުންފުނި ފިޔަވައި އެހެން ކުންފުނިތަކުން ސްޕޮންސާޝިޕް ދިނުމަށް އަދިވެސް ދެކޮޅު ހަދަމުންދާ ކަމަށާ، އޭގެ ސަބަބުން ވެސް މާލީ ދަތިތަކާއި ކުރިމަތިލާން ޖެހޭ ކަމަށެވެ. 

މިއާއެކު ބައްސާމް ވިދާޅުވީ އޭނާގެ ފުރަތަމަ ދައުރު ދިޔައީ ވަރަށް ކާމިޔާބު ކަމާއި އެކު ކަމަށާ، އެހެންނަމަވެސް ދެވަނަ ދައުރުގައި ގިނަ ދަތިތަކާ ކުރިމަތިވި ކަމަށެވެ. އެ ދަތި ތަކުންވެސް އަރައިގަނެވޭނެ ކަމަށް ބައްސާމް ވިދާޅުވި އެވެ.