އިދިކޮޅު ކޯލިޝަންގެ ލީޑަރުން ޖުމްހޫރީ މައިދާނުގައި ތިއްބަވަނިކޮށް ފުލުހުން ހައްޔަރުކޮށްފި އެވެ. 

ޕީޕީއެމްގެ ރިޔާސީ ކެންޑިޑޭޓު ރައީސް އަބްދުﷲ ޔާމީން އަބްދުލްގައްޔޫމުގެ އިސްތިއުނާފު މައްސަލަ ދިގުލައިގެންދާތީ އިދިކޮޅުގެ އޮތް ކަންބޮޑުވުންތަކާއެކު އެ ކޯލިޝަންގެ ލީޑަރުން މިއަދު ހައިކޯޓަށް ވަޑައިގަތުމަށްފަހު، އެތަނުން ނިކުމެވަޑައިގެން ވަނީ ޖުމްހޫރީ މައިދާނަށް އެއްވެފަ އެވެ. 

އިދިކޮޅު ލީޑަރުން ޖުމްހޫރީ މައިދާނުގެ ބޮޑު ދިދަ ދަށުގައި އިށީނދެތިއްބަވާ ވަނީ ރައީސް ޔާމިނަށް މި ސަރުކާރުން ކުރަމުންދާ އަނިޔާތަކާއި ގުޅިގެން އެ ލީޑަރުންގެ ހުރި ކަންބޮޑުވުންތައް ހިއްސާކޮށްފައެވެ. އަދި އެމަނިކުފާނަށް ކުރަމުންދާ އަނިޔާތަކާއި ދެކޮޅަށް ޝުއޫރުތައް ހިއްސާކޮށްފަ އެވެ. 

Advertisement

އިދިކޮޅު ލީޑަރުން ޖުމްހޫރީ މައިދާނުގައި ތިއްބަވަނިކޮށް ފުލުހުން ވަނީ އެ ސަރަހައްދަށް އައިސް ލީޑަރުން ފަހަތަށް ޖައްސާފައެވެ. އަދި އެވަގުތު އެތަނުގައި ތިއްބެވި އިދިކޮޅު ލީޑަރުން ފުލުހުން ވަނީ ހައްޔަރުކޮށްފަ އެވެ. 

ހައްޔަރު ކުރި ލީޑަރުންގެ ތެރޭގައި ޕީޕީއެމްގެ ނައިބު ރައީސް އަހުމަދު ޝިޔާމާއި، ޕީއެންސީގެ ނައިބު ރައީސް އާދަމް ޝަރީފު އުމަރުގެ އިތުރުން، ޕީއެންސީގެ ނައިބުރައީސް އިބްރާހިމް ޝުޖާއު ހިމެނިވަޑައިގަންނަވަ އެވެ. 

އޭގެ އިތުރުން ރައްޔިތުންގެ މަޖިލީހުގެ މަހިބަދޫ ދާއިރާގެ މެމްބަރު އަހުމަދު ތާރިގާއި، މަޖިލީހުގެ މާވަށު ދާއިރާގެ މެމްބަރު އަދި ޕީއެންސީގެ ނއިބުރައީސް މުޙައްމަދު ސައީދު ވަނީ ހައްޔަރުކޮށްފަ އެވެ. 

ފުލުހުން އިދިކޮޅު ލީޑަރުން ހައްޔަރުކުރަމުން ދިޔައިރު، އެ މަންޒަރުތައް ކަވަރުކުރަމުން ދިޔަ ނޫސްވެރިންނަށް ވަނީ ހުރަސްއަޅާފަ އެވެ. އަދި ނޫސްވެރިން ފަހަތައް ޖައްސާ، ކޮއްޕާ ހުރަސްއަޅާފައިވާކަން ފާހަގަކޮށްލެވެއެވެ.