މިއަދު މާލެއަށްކުރި ވިއްސާރާގައި ފެމިލީ ކޯޓަށް ވާރޭ ވެހި އެތަނުގެ މުދަލާއި ތަކެއްޗަށް ގެއްލުންތަކެއް ވެއްޖެ އެވެ.
މައުލޫމާތު ލިބިފައިވާ ގޮތުގައި ފެމިލީ ކޯޓް އިމާރާތުގެ ތެރެއަށް ފެންފޭބުމުގެ ސަބަބުން އެ ކޯޓްގެ ރަޖިސްޓްރާގެ ސެކްޝަނުގައި ހިމެނޭ ލިޔުންތަކެއް ވަނީ ހަލާކުވެފައެވެ. އެގޮތުން އޭގެ ތެރޭގައި ކައިވެނީގެ ސެޓިފިކެޓްތަކާއި އެހެނިހެން މުހިންމު ލިޔުންތައް ހިމެނޭ ކަމަށްވެސް މައުލޫމާތު ލިބެއެވެ.
ފެމިލީ ކޯޓަށް ވިއްސާރާގައި މީގެ ކުރީންވެސް ގެއްލުންވެފައިވާ އިރު އެތަން މަރާމާތު ކުރުމުގެ މަސައްކަތް ވެސް މީގެ ކުރިން ވަނީ ކޮށްފައެވެ.
މިއަދު ހެނދުނު މާލެއަށް ބޯކޮށް ވެހުނު ވާރޭގައި މާފަންނު ބޮޑު ބައެއްގައިވެސް ވަނީ ފެންބޮޑުވެފަ އެވެ. އެގޮތުން ފެންބޮޑުވެ ބައެއް ގެތަކާއި އޮފީސް ތަކުގެ އެތެރެއަށްވެސް ވަނީ ފެން ވަދެ ގެއްލުން ވެފައެވެ.
މޫސުމާބެހޭ ގައުމީ އިދާރާއިން ލަފާކޮށްފައިވާ ގޮތުގައި ޅ. އަތޮޅުން ފެށިގެން ލ. އަތޮޅާ ދެމެދުގެ ރަށްތަކަށް މިއަދު ހެނދުނުން ފެށިގެން ބޯކޮށް ވާރޭ ވެހޭނެ އެވެ. ގުރުމާއެކު ވިލާގަނޑުގައި ގަޑިއަކު 40 މޭލަށް ވައިގަދަވޭނެ ކަމަށް ވެސް ލަފާކޮށްފައިވެ އެވެ
Advertisement
This content is created and paid for by advertisers and does not involve Voice Journalists
