ކުރިޔަށް އޮތް ރިޔާސީ އިންތިޚާބުގައި ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އަށް ރަނގަޅުވާނެ ގޮތާއި މޮޅުވާނެ ގޮތްތަށް ޖުމްހޫރީ ޕާޓީން ކިޔައިދޭން ނޫޅުމަށް އިދިކޮޅުން ބުނެފި އެވެ. 

މި ސަރުކާރު ބަދަލުކުރަން ބޭނުންވާ ގިނަ ސިޔާސީ ޕާޓީތަކެއް ގުޅިގެން "ކޮމަން ކެންޑިޑޭޓެއް" ނެރުމަށް މަސައްކަތް ކުރަމުންދާ މި ދަނޑިވަޅުގައި ކުރީގެ ހެލްތު މިނިސްޓަރު އަދި ޖުމްހޫރީ ޕާޓީގެ ރިޔާސީ ކެންޑިޑޭޓު ޤާސިމް އިބްރާހިމްގެ ތަރުޖަމާނު އަބްދުﷲ އަމީނު ވިދާޅުވީ ރާއްޖޭގެ ސިޔާސީ މަޝްރަހު މިހާރު ތަރުތީބު ވެފައިވާ ގޮތުން ޕީޕީއެމަށް އެންމެ ރަނގަޅު ގޮތަކަށް ވާނީ ރިޔާސީ އިންތިޚާބުގައި ޤާސިމަށް ތާއީދުކުރުން ކަމަށެވެ. 

އަމީނުގެ މި ވާހަކަތަކަށް އިދިކޮޅު ލީޑަރުން ވަނީ ރައްދުދީފަ އެވެ. 

އެގޮތުން ޕީޕީއެމްގެ ނައިބު ރައީސް އަދި މަޖިލީހުގެ ނައިފަރު ދާއިރާގެ މެމްބަރު އަހުމަދު ޝިޔާމު ކުރެއްވި ޓްވީޓެއްގައި ވަނީ ޖުމްހޫރީ ޕާޓީން ޕީޕީއެމަށް ރަނގަޅުގޮތް ކިޔައިދޭން ނޫޅުއްވުމަށް ގޮވާލައްވާފަ އެވެ. 

ޕީޕީއެމްގެ ރިޔާސީ ކެންޑިޑޭޓަކީ ރައީސް އަބްދުﷲ ޔާމީން އަބްދުލްގައްޔޫމު ކަމަށާއި، ހުރިހާ ޕާޓީތައް ގުޅިގެން އެއް ކެންޑިޑޭޓަކު ނެރޭނަމަ ޕީޕީއެމުން ތާއީދުކުރާނެ ހަމައެކަނި ކެންޑިޑޭޓަކީ ރައީސް ޔާމިނުކަމަށް ވެސް އެ ޕާޓީން ވަނީ ބުނެފައެވެ. 

ސާފުކޮށް ޕީޕީއެމުން އެކަން އިއުލާނުކޮށްފައި އޮއްވާ ޕީޕީއެމުން ޤާސިމަށް ތާއީދުކުރުމަކީ އެންމެ ރަނގަޅުގޮތް ކަމަށް އަމީނު ވިދާޅުވުމުން، އެ ވާހަކައަށް ރައްދުދެއްވާ ޝިޔާމު ވިދާޅުވީ ސަރުކާރު ބަދަލުކުރަން ނިކުމެ ތިބިއިރު ޖުމްހޫރީ ޕާޓީ މިއަދުވެސް އޮތޫ ސަރުކާރު ކޯލިޝަންގެ ތެރޭގައި ކަމަށެވެ. އަދި ޕާޓީގެ ކޮންޓްރޯޅު ވެސް އޮތީ ރައީސް ޞާލިހުގެ އަތްޕުޅުގައި ކަމަށެވެ. 

އެހެންކަމުން އެފަދަ ހާލަތެއްގައި ޖުމްހޫރީ ޕާޓީ އޮއްވާ އެ ޕާޓީން، ޕީޕީއެމަށް ހެޔޮގޮތް ކިޔައިދޭން ނޫޅުނިއްޔާ މާ ރަނގަޅުވާނެކަމަށް ޝިޔާމު ވިދާޅުވި އެވެ. 

ޕީޕީއެމްގެ ރިޔާސީ ކެންޑިޑޭޓު ރައީސް އަބްދުﷲ ޔާމީން އަބްދުލްގައްޔޫމުގެ މިވަގުތު ޖަލު ހުކުމެއް ތަންފީޒު ކުރައްވަމުން ދާ ދިއުމާއި ގުޅިގެން އިދިކޮޅަށް އަމާޒުވަމުންދާ ސުވާލުތަކަށް އިދިކޮޅު ލީޑަރުން ގެންދަވަނީ ޖަވާބުދެއްވަމުން ނެވެ. 

އެގޮތުން ޕީޕީއެމްގެ ރިޔާސީ ކެންޑިޑޭޓަކީ ރައީސް ޔާމިނު ކަމަށާއި، އެމަނިކުފާނުގެ ނަންފުޅު ރިޔާސީ އިންތިޚާބުގެ ވޯޓު ކަރުދާސްކޮޅުގައި އޮންނާނެކަމަށް އިދިކޮޅުން ދަނީ ބުނަމުންނެވެ.