ވާދަވެރި ސިޔާސީ ލީޑަރު އަދި ޕީޕީއެމްގެ ރިޔާސީ ކެންޑިޑޭޓު ރައީސް އަބްދުﷲ ޔާމީން އަބްދުލްގައްޔޫމުގެ އިންތިޚާބީ ހައްޤުތައް ކަށަވަކުރުކުރުމަށް އެމަނިކުފާނުގެ ފަރާތްޕުޅުން ސުޕްރިމް ކޯޓަށް މައްސަލައެއް ހުށައަޅައިފި އެވެ. 

ރައީސް ޔާމިނުގެ ފަރާތްޕުޅުން ދުސްތޫރީ މައްސަލައެއް ސުޕްރިމް ކޯޓަށް ހުށައަޅާފައިވާކަން އެމަނިކުފާނުގެ ޤާނޫނީ ވަކީލުންގެ ޓީމުގައި ހިމެނިވަޑައިގަންނަވާ އާދަމް ޝަމީމު ވަނީ ކަށަވަރުކޮށްދެއްވާފަ އެވެ. 

އެގޮތުން ޝަމީމު ކުރެއްވި ޓްވީޓެއްގައި ވިދާޅުވީ ރައީސް ޔާމިނުގެ ފަރާތްޕުޅުން ހައިކޯޓަށް ހުށައަޅާފައިވާ އިސްތިއުނާފު މައްސަލަ ދިގުލައިގެން ދިއުމުގެ ސަބަބުން ރައީސް ޔާމިނުގެ އެތައް އަސާސީ ހައްޤުތަކާއި، އިންތިޚާބީ ހައްޤުތަކަށް ހުރަސްއެޅިފައިވާތީ އެ ހައްޤުތައް ކަށަވަރުކޮށްދިނުމަށް ރައީސް ޔާމިނުގެ ފަރާތްޕުޅުން ދިވެހިރާއްޖޭގެ ސުޕްރިމް ކޯޓަށް ދުސްތޫރީ މައްސަލައެއް ހުށައަޅާފައިވާނެ ކަމަށެވެ. 

Advertisement

ރައީސް ޔާމިނަކީ ޕީޕީއެމްގެ ރިޔާސީ ކެންޑިޑޭޓަށް ވެފައި، އެމަނިކުފާނަކީ މިވަގުތު ސިޔާސީގޮތުން ސަރުކާރުގެ ވާދަވެރި ކެންޑިޑޭޓަށްވުމުން، ދަށުކޯޓުގައި އޮތް އިސްތިއުނާފުގެ މައްސަލަ ނުނިންމާ ދިގުދަންމާލުމަކީ ނުހަނު ބޮޑު ކަންބޮޑުވުމެއްގެ ގޮތުގައި އިދިކޮޅު ކޯލިޝަނުން ވެސް ދަނީ ފާހަގަކުރަމުން ނެވެ. 

މިހާރު ދަށު ކޯޓުގައި ރައީސް ޔާމިނުގެ ފަރާތްޕުޅުން އިސްތިއުނާފުކޮށްފައި އޮތް މައްސަލައަކީ ވ އާރަށް ކުއްޔަށް ދޫކުރުމުގެ މުއާމަލާތާއި ގުޅުވާ މިދިޔަ ޑިސެމްބަރު މަހުގެ 25 ގައި ކްރިމިނަލް ކޯޓުން އިއްވި ހުކުމުގެ މައްސަލަ އެވެ. 

އެ މައްސަލައިގެ އިސްތިއުނާފީ އަޑުއެހުންތައް މަޑުޖެހިފައިވަނީ ނުމުމަކާއި ހަމަޔަށް ގޮސްފައި ވަނިކޮށްކަން ފާހަގަކޮށްލެވެއެވެ. އެގޮތުން އެ މައްސަލައިގައި ރައީސް ޔާމިނުގެ ފަރާތްޕުޅުން ހުށައަޅާ އިސްތިއުނާފީ ނުކުތާތައް ހުށައަޅާ، އެ ނުކުތާތަކަށް ދައުލަތުން ވަނީ ޖަވާބު ވެސް ދީފައެވެ. 

ހައިކޯޓުގައޮ އޮތް މައްސަލަ މަޑުޖެހިފައި އޮތީ އެ މައްސަލަ ބައްލަވާ ފަނޑިޔާރުންގެ ބެންޗުގައި ހިމެނިވަޑައިގަންނަވާ ދެ ފަނޑިޔާރުން ޗުއްޓީ ނެންގެވުމާއި ގުޅިގެންނެވެ. 

އިންތިޚާބީ ހައްޤުތައް ކަށަވަރުކުރުމަށް ރައީސް ޔާމިނުގެ ފަރާތްޕުޅުން ދުސްތޫރީ މައްސަލައެއް ސުޕްރިމް ކޯޓަށް ހުށައަޅާފައިވާއިރު، މިއަހަރުގެ ސެޕްޓެމްބަރު މަހުގެ 9ގައި ބާއްވާ ރިޔާސީ އިންތިޚާބަށް ފޯމު ހުށައެޅުމުގެ މުއްދަތު މާދަމާއިން ފެށިގެން ހުޅުވިގެންދާނެ އެވެ. 

މި އިންތިޚާބުގައި ރައީސް ޔާމީން ވާދަކުރައްވާނެ ކަމަށާއި، އެމަނިކުފާނުގެ ކެންޑިޑެސީ އިލެކްޝަން ކޮމިޝަނަށް ހުށައެޅުމުގެ މަސައްކަތް މިހާރު ފަށާފައިވާކަމަށް ޕީޕީއެމުން ވަނީ ބުނެފައެވެ.