މި އަހަރުގެ ސެޕްޓެމްބަރު މަހުގެ 9 ވަނަ ދުވަހު ބޭއްވުމަށް ހަމަޖެހިފައިވާ ރިޔާސީ އިންތިޚާބާއި ގުޅިގެން ހުރި ކަންބޮޑުވުންތައް ހިއްސާ ކުރެއްވުމަށް އިދިކޮޅުު ޕީޕީއެމް/ ޕީއެންސީ ކޯލިޝަންގެ ލީޑާޝިޕްގެ ބައެއް ބޭފުޅުން އިނގިރޭސި ވިލާތުން ދިވެހިރާއްޖެއަށް ކަނޑައަޅުއްވާފައިވާ ސަފީރު، ކެރޮން ރޮސްލާއާއި ބައްދަލު ކުރައްވައިފި އެވެ. 

މި ބައްދަލުމާއި ގުޅިގެން ޕީއެންސީގެ ނާއިބު ރައީސް އަދި މާވަށު ދާއިރާގެ މެންބަރު މުހައްމަދު ސަޢީދު ކުރެއްވި ޓްވީޓެއްގައި ވިދާޅުވީ، ބައްދަލުވުމުގެ ތެރެއިން ރާއްޖޭގެ އަދުގެ ސިޔާސީ މަޝްރަހުގައި ކަންކަން ހިނގަމުންދާ ގުޅޭ މަޝްވަރާތައް ކުރެވުނު ކަމަށެވެ. 

އަދި ކުރިއަށް އޮތް ރިޔާސީ އިންތިޚާބަކީ ދެފުށް ފެންނަ، އިންސާފުވެރި އަދި މިނިވަން އިންތިހާބަކަށް ވުމަކީ އެންމެންގެވެސް އެދުމެއްކަން ދެފަރާތުންވެސް ފާހަގަކޮށްފައިވާ ކަމަށް ސައީދު ވިދާޅުވި އެވެ. 

މީގެ އިތުރުން، ރާއްޖޭގެ ޝަރުއީ ދާއިރާ އާއި މިނިވަން މުވައްސަސާ ތަކަށް ސަރުކާރުގެ ނުފޫޒު ފޯރުވަމުންދާތީ އެކަމުގެ ކަންބޮޑުވުން ވެސް ބައްދަލުވުމައި ފާހަގަކުރެއްވި ކަމަށް ސައީދު ވިދާޅުވި އެވެ. 

މިއާއެކު ސައީދުގެ ޓުވިޓުގައި ވަނީ، ރާއްޖޭގެ ސިޔާސީ ނިޒާމް ކިލަނބު ކޮށްލާ އެފަދަ ނުރަނގަޅު ކަންކަން ނިމުމަކަށް ގެނައުމަށް ގޮވާލާފައެވެ. 

ކުރިއަށް އޮތް ރިޔާސީ އިންތިހާބުގައި ޕީޕީއެމްގެ ފަރާތުން ވާދަކުރައްވާ ކެންޑިޑޭޓަކީ އެ ޕާޓީގެ ލީޑަރު ރައީސް ޔާމީން އަބްދުލްގައްޔޫމް ކަން ކަނޑައަޅައި، އެޕާޓީން ވަނީ ރިޔާސީ އިންތިޚާބަށް ތައްޔާރުވުމަށްޓަކައި ކެންޕެއިން ހަރަކާތްތައް ފަށާފައެވެ. މިއާއިއެކު "ދިވެހިންގެ ރާއްޖެ" އެޕާޓީގެ ސްލޯގަންގެ ގޮތުގައި ވަނީ ކަނޑައަޅާފައެވެ.

އެހެންނަމަވެސް އެމަނިކުފާނު މިވަގުތު ގެންދަވަނީ ވ އާރަށް ކުއްޔަށް ދިނުމުގެ މައްސަލައިގައި އެމަނިކުފާނުގެ މައްޗަށް އުފުލާފައިވާ ދައުވާތައް ސާބިތުވާ ކަމަށް ކަނޑައަޅައި ކްރިމިނަލް ކޯޓުން ކުރި 11 އަހަރުގެ ޖަލު ހުކުމް ތަންފީޒް ކުރައްވަމުންނެވެ. 

އެ މައްސަލަ މިހާރު އިސްތިއުނާފް ކޮށްފައިވާއިރު ފަނޑިޔާރުން ޗުއްޓީގައި ތިއްބެވުމުން މައްސަލަ ކުރިއަށް ނުގެންދެވޭގޮތް ވަނީ ވެފައެވެ.