ޕީޕީއެމްގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމުގެ ކެންޑިޑެސީ ފޯމު އިލެކްޝަންސް ކޮމިޝަނަށް ހުށައެޅި ނަމަވެސް، ސަރުކާރު ބަދަލުކުރުމަށް ސިޔާސީ ޕާޓީތަކާއެކު ކުރަމުންދާ މަޝްވަރާތައް ހުއްޓާނުލާނެކަމަށް ޕީޕީއެމުން ބުނެފި އެވެ. 

ރިޔާސީ އިންތިޚާބުގައި ވާދަކުރައްވާ ފަރާތްތަކުން ނަން ހުށައެޅުއްވުމަށް އިލެކްޝަންސް ކޮމިޝަނުން ހުޅުވާލާފައިވާއިރު، ސަރުކާރު ބަދަލުކުރަން ބޭނުންވާ ސިޔާސީ ޕާޓީތަކުން ދަނީ އެއްބަސް ވެވޭ އެއް ކެންޑިޑޭޓު ނެރުމުގެ މަޝްވަރާތައް ވެސް ކުރަމުން ނެވެ. 

އެގޮތުން ޖުމްހޫރީ ޕާޓީއާއި، ދަ ޑިމޮކްރެޓްސްގެ އިތުރުން އެމްއެންޕީން ވަނީ އެންމެންނަށް އެއްބަސް ވެވޭ އެއް ކެންޑިޑޭޓު ނެރުމަށް އެއްބަސްވެފައެވެ. އަދި އެ މަޝްވަރާތައް އިތުރަށް ކުރިއަށް ގެންދިއުމަށް ނިންމާފަ އެވެ. 

Advertisement

މިހާލަތުގައި ރައީސް ޔާމިނުގެ ކެންޑިޑެސީފޯމު އިލެކްޝަންސްއަށް ހުށައެޅުމަށްފަހު، އެ ޕާޓީތަކާއެކު އިތުރަށް މަޝްވަރާކުރާނެތޯ ޗެނަލް-13 ގެ ނިއުސްޓޯކް ޕްރޮގްރާމުގައި ޕީޕީއެމްގެ ސެކެޓްރީ ޖެނެރަލް އަދި ރައީސް ޔާމީނުގެ އިންތިޚާބީ އޭޖެންޓު މުޙައްމަދު ތަލާލާއި ވަނީ ސުވާލުކޮށްފަ އެވެ. 

އެ ސުވާލަށް ޖަވާބުދެއްވަމުން ތަލާލު ވިދާޅުވީ ޕީޕީއެމާއި ގުޅިގެން މަސައްކަތް ކުރުމުގެ ފުރުސަތު ޕާޓީތަކަށް އޮންނާނެ ކަމަށެވެ. އަދި އެ ދޮރު ބަންދު ނުކުރާނެ ކަމަށެވެ. 

އެހެން ނަމަވެސް ޕީޕީއެމާއި އެކު މަސައްކަތް ކުރެވޭނީ، ޕީޕީއެމް ޤަބޫލުކުރާ އުސޫލުތަކެއްގެ ތެރެއިން ކަމަށާއި، އެ އުސޫލުތަކަށް ޕާޓީތަކުން އިޚްތިރާމު ކުރަންވާނެކަމަށް ޠަލާލު ވިދާޅުވި އެވެ. 

ޠަލާލު ވިދާޅުވީ ރައީސް ޔާމީނުގެ ކެންޑިޑެސީ ފޯމު ފުރުމުގެ މަސައްކަތް އިދިކޮޅުން ވަރަށް ފޯރިއާއެކު ކުރަމުންދާ ގެންދާ ކަމަށެވެ. އަދި މި ހަފްތާގެ ތެރޭގައި އެ ފޯމު އިލެކްޝަންސްއަށް ވެއްދޭނެކަމުގެ ޔަގީންކަން ވެސް އޮތްކަމަށް ޠަލާލު ވިދާޅުވި އެވެ.