އިންޑިއާގެ އިދިކޮޅު ޕާޓީތަކުގެ އިއްތިހާދުން އިންޑިއާގެ ބޮޑުވަޒީރު ނަރެންދުރަ މޯދީގެ ސަރުކާރާ ދެކޮޅަށް އިތުބާރު ނެތްކަމުގެ ވޯޓެއް ނެގުމުގެ ހުއްދަ އިންޑިއާގެ ގާނޫނު ހަދާ މަޖިލީހުން ދީފި އެވެ.

ލޯކް ސަބާއަށް އިތުބާރު ނެތްކަމުގެ މައްސަލަ ހުށަހެޅީ 50 މެންބަރުން ތާއީދާއި އެކުގައި އެވެ.

އިދިކޮޅު ގެ ގަރާރަށް ރުހުން ދެއްވަމުން ތިރިގޭގެ ރައީސް އޯމް ބިރްލާ ވިދާޅުވީ ބަހުސް ކޮށް ވޯޓަށް އަހާނެ ދުވަހެއް ވަރަށް އަވަހަށް ނިންމަވާނެ ކަމަށެވެ.

މޯދީގެ ސަރުކާރުގެ އިތުބާރު ނެތް ކަމުގެ ވޯޓެއް ނެގުމަށް އިދިކޮޅު އިއްތިހާދުން ހުށަހެޅީ އިންޑިޔާގެ އިރުއުތުރުގެ ސްޓޭޓެއް ކަމަށްވާ މަނިޕޫރުގައި ހިނގަމުންދާ ނަސްލީ ހަމަނުޖެހުންތަކާ ގުޅިގެން ހުރި ކަންބޮޑުވުންތަކަށް ތަފްސީލުކޮށް ހައްލު ހޯދުމަށް އެގައުމުގެ ސަރުކާރަށް މަޖުބޫރު ކުރުވުމުގެ ގޮތުން އެ އިއްތިހާދުން ބުނެއެވެ. 

542 ގޮނޑި ހިމެނޭ މަޖިލީހުގެ ތިރިގޭގައި މޯދީގެ ބާރަތިޔާ ޖަނަތާ ޕާޓީ (ބީޖޭޕީ) އަށް 301 މެމްބަރުންގެ ސާފު އަޣުލަބިއްޔަތެއް އެބަ އޮތެވެ. އެހެންކަމުން އިތުބާރު ނެތްކަމުގެ ވޯޓު ނެގި ނަމަވެސް އޭގެ ސަބަބުން މޯދީގެ ސަރުކާރަށް އެއްވެސް އަސަރެއް ކުރާނެ ކަމަށް ނުބެލެވެއެވެ. 

އެހެންކަމުން މިފަދަ މައްސަލައެއް ގާނޫނު ހަދާ މަޖިލީހަށް ހުށަހެޅުމުގައި އިދިކޮޅު އިއްތިހާދުގެ އެންމެ ބޮޑު އެއް ބޭނުމަކީ ބީޖޭޕީގެ ވެރިކަން ކުރާ މަނިޕޫރު ސްޓޭޓްގައި ހިނގި ހަމަނުޖެހުންތަކާ ބެހޭ ގޮތުން ބަހުސެއް ފަށާށެވެ.

"ބޮޑުވަޒީރު އެ ހުރީ މަނިޕޫރުގެ މި މައްސަލައާއި ގުޅިގެން ބަހެއް ބުނަން ތައްޔާރަކަށް ނޫން. އެކަމަކު، އެ މައްސަލާގައި ބަޔާނެއް ހުށަހަޅަން ބޮޑުވަޒީރު ޖެހޭނީ މަޖިލީހަށް އަންނަން. މަނިޕޫރު އެދަނީ އަނދަމުން" އިދިކޮޅު މެންބަރަކު ބުނެފައިވެއެވެ. 

މަނިޕޫރުގައި ހިނގަމުންދާ ހަމަނުޖެހުންތަކާއި ގުޅިގެން މެއި މަހުގެ ކުރީކޮޅު ފެށި ފަހުން މިހާތަނަށް 130 އަށް ވުރެ ގިނަ މީހުން މަރުވެ، 60،000 މީހުންގެ ގެދޮރު ގެއްލިފައިވާ މީޑިއާ ރިޕޯޓްތައް ބުނެއެވެ. 

3.2 މިލިއަން މީހުންގެ އާބާދީއެއް އޮންނަ މި ކުޑަ ސްޓޭޓުގައި އުފެދިފައިވާ ނަސްލީ ނުތަނަވަސްކަމަކީ 2024 ވަނަ އަހަރުގެ މެއި މަހުގެ ތެރޭގައި ގައުމީ އިންތިހާބަކާ ކުރިމަތިލާން ޖެހިދާނެ މޯދީގެ ސަރުކާރުން ސަލާމަތީ އަދި ސިޔާސީ ނާކާމިޔާބީއެއްގެ ގޮތުގައި އިދިކޮޅުން ދެކެ އެވެ.