މި ސަރުކާރުން ވަނީ ދިވެހިރާއްޖޭގެ މިނިވަންކަން ނަގާލާފައި ކަމަށާއި، ދެން އަނބުރާ މިނިވަންކަން ހޯދޭނެ ހަމައެކަނި ފޯމިއުލާއަކީ ޕީޕީއެމްގެ ރިޔާސީ ކެންޑިޑޭޓު ރައީސް އަބްދުالله ޔާމީން އަބްދުލްގައްޔޫމު ވެރިކަމަށް ގެނައުންކަމަށް އިދިކޮޅު ކޯލިޝަން ވަގުތީގޮތުން ހިންގެވުމާއި ހަވާލުވެ ހުންނެވި ޕީއެންސީގެ ރައީސް އަބްދުއްރަހީމް އަބްދުالله ވިދާޅުވެއްޖެ އެވެ.
އަބްދުއްރަހީމް މިފަދައިން ވިދާޅުވެފައިވަނީ ރައީސް ޔާމިނު މިނިވަންކުރުމަށް ގޮވާލާ އިދިކޮޅުން ބުދަ ދުވަހުގެރޭ ކުރިއަށް ގެންދިޔަ އިހުތިޖާޖުގައި ބައިވެރިންނާއި މުޚާތަބުކޮށް ވާހަކަދައްކަވަމުން ނެވެ.
އަބްދުއްރަހީމްގެ ވާހަކަ ފެއްޓެވީ މިނިވަން ދުވަސް ބައްދަލުކުރި ނަމަވެސް، މިނިވަންކަމުގެ އިހުސާސް ނުކުރެވޭކަން ފާހަގަކުރައްވަމުން ނެވެ. އޭނާ ވިދާޅުވީ މި ސަރުކާރުން ރައްޔިތުންގެ ހަރުމުދާ ވިއްކަމުން ގޮސް ދިވެހިންގެ މިނިވަންކަން ވެސް އިންޑިއާއަށް ވިއްކާލާފައިވާ ކަމަށެވެ.
އެހެންކަމުން ރައީސް އިބްރާހިމް މުޙައްމަދު ޞާލިހު ވެރިކަމުގައި ބަހައްޓަން ޖެހޭ އެއްވެސް ސަބަބެއް ނެތް ކަމަށާއި، މިއަދު ދިވެހިން މަސައްކަތް ކުރަންވީ ދިވެހިންގެ މިނިވަންކަން އަނބުރާ ހޯދާ، މި ގައުމަކީ ދިވެހިން ބަސް ކިޔާ ގައުމަކަށް ހެދުމަށްކަމަށް އަބްދުއްރަހީމް ވިދާޅުވި އެވެ.
އެއާއެކު އޭނާ ވިދާޅުވީ ގެއްލިފައިވާ މިނިވަންކަން ހޯދޭނެ ހަމައެކަނި ގޮތަކީ ރައީސް ޔާމީން އަނބުރާ ވެރިކަމަށް ގެނައުން ކަމަށެވެ.
އެމަނިކުފާނަކީ މި ފަހުގެ ތާރީހެއްގައި ރާއްޖޭގެ މިނިވަންކަމަށްޓަކައި އެންމެ ބޮޑަށް ވަކާލާތު ކުރައްވަމުން ގެންދަވާ ލީޑަރު ކަމަށާއި، މިއަދުވެސް ހުރަގޭގައި އެ އޮންނަވަނީ ރައްޔިތުންގެ މިނިވަންކަން ހޯއްދެވުމަށް ކުރައްވާ މަސައްކަތްޕުޅުގެ ސަބަބުންކަމަށް އަބްދުއްރަހީމް ވިދާޅުވި އެވެ.
"މިއަދު އަޅުގަނޑުމެން އަޒުމު ކަނޑައަޅަންވީ މިނިވަންކަން އަނބުރާ ހޯދަން. މި މިނިވަންކަން ހޯދޭނެ ގޮތަކާއި ދޭތެރޭގައި ދިވެހިރައްޔިތުން ވިސްނަންވީ. ދިވެހި ރައްޔިތުން ފިކުރު ކުރަންވީ. އެކަމަށްޓަކައި ދިވެހި ރައްޔިތުން މަސައްކަތް ކުރަންވީ. ދިވެހިރާއްޖޭގައި ގެއްލިފައި މި އޮތް މިނިވަންކަން އަލުން އަނބުރާ ހޯދާ، ދިވެހިންނަށް މިނިވަންކަމުގެ އިހުސާސް ކޮށްދެވޭނެ ހަމައެކަނި ގޮތަކީ މި އަހަރު މި ބޭއްވޭ ރިޔާސީ އިންތިޚާބުގައި ރައީސް އަބްދުالله ޔާމިނަށް ދިވެހިރާއްޖޭގެ ވެރިކަން ލިބިގެން. އެ ނޫން އެއްވެސް ފޯމިއުލާއެއް ނެތް"
ޕީއެންސީގެ ރައީސް އަބްދުއްރަހީމް އަބްދުالله
މި އަހަރުގެ ރިޔާސީ އިންތިޚާބުގައި ޕީޕީއެމްގެ ސްލޯގަން އަކީ "ދިވެހީންގެ ރާއްޖެ" އެވެ. މި ސްލޯގަން އިޚްތިޔާކުރީ ގައުމުގެ މިހާރުގެ ހާލަތަށް ބަލާފައިކަމަށް ޕީޕީއެމުން ވަނީ ބުނެފައެވެ.
އެގޮތުން އެ ޕާޓީން ބުނީ މިއަދު ދިވެހި ފަސްގަނޑުގައި ދިވެހިން ދެވަނަ ދަރަޖައިގެ ރައްޔިތުންނަށް ހަދާފައިވާ ކަމަށެވެ. ޕީޕީއެމުން އަނބުރާ ވެރިކަމަށް އަންނަނީ އެކަން ބަދަލުކޮށް، މި ގައުމަކީ ދިވެހިންގެ ތަނަކަށް ހަދާ، ދިވެހިންނަށް ތަރައްގީއާއި ކުރިއެރުން ގެނެސްދިނުމަށްކަމަށް އެ ޕާޓީން ވަނީ ބުނެފައެވެ.
އަދި އެކަން ކުރެވޭނީ އެ ޕާޓީގެ ކެންޑީޑޭޓު ރައީސް ޔާމިނަށް ކަމަށް ވެސް ޕީޕީއެމުން ދަނީ ތަރުކާރުކޮށް ބުނަމުންނެވެ.
Advertisement
This content is created and paid for by advertisers and does not involve Voice Journalists
