މުއާސަލާތީ ވަސީލަތްތައް ބޭނުންކޮށްގެން ކުރާ ނޭދެވޭ އަމަލުތައް ގިނަވަމުންދާތީ އެކަން މަދުކުރުމަށް މޯބައިލް ފޯނުގެ ހިދުމަތް ހޯދުމަށް ބޭނުންކުރާ ސިމް ކާޑު ދޫކުރުމުގެ އުސޫލަށް ގެނެވުނު ބަދަލާއި އެކު ސިމް ކާޑު ބޭނުންކޮށްގެން ކުރާ ސައިބާ ކްރައިމްތައް މަދުވެގެންދާނެ ކަމަށް، އުރީދޫގެ މޯލްޑިވްސްގެ ޗީފް ކޮމާޝަލް އޮފިސަރު ޙުސައިން ނިޔާޒް ވިދާޅުވެއްޖެ އެވެ. 

"މޯބައިލް ފޯނުގެ ޚިދުމަތް ހޯދުމަށް ބޭނުންކުރާ ފޯނު ނަންބަރު ދޫކުރުމާއި ނަންބަރު ބޭނުންކުރުމާބެހޭ ގަވާއިދު" އަށް ގެނެވުނު ބަދަލާއި އެކު ދިވެހި ރައްޔިތެއްނަމަ އެންމެ ގިނަވެގެން ރަޖިސްޓްރީކޮށްގެން ގެންގުޅެވޭނީ ދިހަ ސިމްކާޑެވެ. އަދި ރާއްޖޭގައި ދިރިއުޅޭ ބިދޭސީއެއްނަމަ ނުވަތަ ޓޫރިސްޓެއްނަމަ ރަޖިސްޓްރީ ކުރެވޭނީ ތިން ސިމްކާޑެވެ. އަމިއްލަ ފަރުދެއްގެ ވިޔަފާރިއެއްނަމަ، ދިހައެއް ސިމްކާޑު ރަޖިސްޓްރީ ކުރެވޭނެކަމަށް އެ ޤަވާއިދުގައި ބުނެފައިވެއެވެ.

އަލަށް ގެޒެޓްކުރި ގަވާއިދުގައި ވާގޮތުން އަމިއްލަ ފަރުދެއްގެ ވިޔަފާރިތައް ފިޔަވައި ޤާނޫނީ އެހެން ޝަޚުޞުތަކަށާއި ދައުލަތުގެ އިދާރާތަކަށް ނަންބަރު ދޫކުރާއިރު ވަކި މިންގަނޑެއް ކަނޑައަޅާފައެއްނުވެއެވެ. ކަނޑައަޅައިފައިވާ އަދަދަށްވުރެ އިތުރަށް، އެއްވެސް ފަރާތަކަން ނަންބަރު ބޭނުންވާނަމަ، މަޤުބޫލު ސަބަބެއް ބަޔާންކޮށް އެ ފަރާތަކުން ޓެލެކޮމިއުނިކޭޝަން އޮތޯރިޓީއަށް ހުށަހެޅުމުން، ބަލަންޖެހޭ ކަންކަން ބެލުމަށްފަހު އެކަމަށް ހުއްދަ ދޭނީ އެ އޮތޯރޮޓީންނެވެ.

Advertisement

ސިމް ކާޑު ވިއްކުމަށް މި ގެނެވުނު ބަދަލާއި ގުޅިގެން، "ވޮއިސް" އަށް ދެއްވި ޚާއްސަ ބަސްދީގަތުމެއްގައި ނިޔާޒު ވިދާޅުވީ، އެ ބަދަލަކީ ވަރަށް މުހިންމު، ރަނގަޅު ބަދަލެއް ކަމަށެވެ. އެހެނީ، އާއްމުކޮށް ސައިބާ ކްރައިމްތައް ހިނގަނީ ސިމްކާޑު މެދުވެރިކޮށް ކުރެވޭ ކޯލްތަކުން ކަމަށް ނިޔާޒް ފާހަގަކުރެއްވިއެވެ. 

ނިޔާޒު އިތުރަށް ވިދާޅުވީ، މިހާރު 10 އަށްވުރެ ގިނަ ސިމްކާޑު ގެންގުޅޭ ފަރާތްތަކުން އެމީހުން ބޭނުން ކުރަން ބޭނުންވާ 10 ސިމް ކަނޑައެޅުމަށް 6 މަސް ދުވަހުގެ މުއްދަތު ދޭ ކަމަށާ، އެ މުއްދަތު ތެރޭގައި، ދެ ފޭސް އަކަށް ބަހާލައިގެން ބޭނުން ނުކުރާ ސިމްތައް ބޭނުން ނުކުރެވޭ ގޮތް ހެދިގެންދާނެ ކަމަށެވެ. 

އެގޮތުން، ފުރަތަަމަ ފޭސް އަކީ ކަސްޓަމަރުންނަށް އެމީހުން އާއްމުކޮށް ބޭނުން ނުކުރާ ސިމް އުވާލާކަން އެންގުން ކަމަށާ، ދެވަނަ ފޭސްގައި ކަސްޓަމަރުންނާއި ގުޅައިގެން އެ އުވާލާ ސިމް ބަދަލު ކުރުމުގެ ފުރުސަތު ކަސްޓަމަރުންނަށް ދެވޭނެ ކަމަށެވެ. ދެ ފޭސްގައިވެސް ކަސްޓަމަރާއި ނުގުޅިއްޖެ ނަމަ، އެ މީހަކު އާއްމުކޮށް ބޭނުންކުރާ 10 ސިމް ފިޔަވައި އެހެން ހުރިހާ ސިމް އެއް ބްލޮކް ކުރެވޭނެ ކަމަށް ނިޔާޒު ވިދާޅުވި އެވެ.