ދިވެހިރާއްޖޭގެ 58 ވަނަ މިނިވަން ދުވަހުގެ މުނާޞަބަތުގައި މާލެ ސަރަހައްދުގައި ކުރިއަށް ގެންދިޔުމަށް ހަމަޖެހިފައިވާ ހަރަކާތް ތަކުގެ ތެރެއިން ހުޅުމާލޭގައި ބޭއްވުމަށް ހަމަޖެހިފައިވާ ހަވާ އެރުވުމުގެ ހަރަކާތް ފަސްކޮށްފި އެވެ. 

ހުޅުމާލޭ ސެންޓްރަލް ޕާކް ގައި މިރޭ ބޭއްވުމަށް ހަމަޖެހިފައި އޮތް ހަވާ އެރުވުމުގެ ހަރަކާތް ފާސްކޮށްފައި މިވަނީ މާލޭގައި ހޮޑާއި ބޭރަށް ހިންގުން އާދަޔާ ޚިލާފަށް ގިނަވެފައި ވުމުންނެވެ.

ހަވާ އެރުވުމުގެ ހަރަކާތުގެ އިތުރުން މިނިވަން ދުވަހާއި ގުޅުވައި މިރޭ ހުޅުވަން ހަމަޖެހިފައި އޮތް މިނިވަން އުފާ ކާނިވާ ހުޅުވުން ވެސް ވަނީ ފަސްކޮށްފައެވެ. މީގެ ކުރިން ކާނިވާ ހުޅުވުން އޮތީ މިރޭ 8:30 ގައެވެ. އަދި ކާނިވާ ހުޅުއްވައި ދެއްވާން ހަމަޖެހިފައި އޮތީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު އެވެ. 

Advertisement

އެހެން ކަމުން މިނިވަންދުވަހާއި ގުޅުވައި މިރޭ ބޭއްްވުމަށް ހަމަޖެހުނު ހަރަކާތް ތަކުގެ ތެރެއިން ކުރިއަށް ދާނީ ހަމަ އެކަނި ފުޅަނދުތައް އާންމުންނަށް ދައްކާލުމުގެ ހަރަކާތެވެ. ފުޅަނދުތައް އާންމުންނަށް ދައްކާލުން އޮތީ މިރޭ 8:30 އިން ފެށިގެން ހުޅުމާލެ ސެންޓްރަލް ޕާކުގައެވެ. މީގެ އިތުރުން 29 ޖުލައިގެ ހަވީރާއި ރޭނގަނޑުވެސް ފުޅަނދުތައް ދައްކާލުން އޮންނާނެ ކަމަށް ހޯމް މިނިސްޓްރީން މައުލޫމާތު ދެއެވެ. 

މާލެ ސަރަހައްދުގައި ފެތުރެމުންދާ ބަލި މަޑު ކަމާއި ގުޅިގެން ހޮސްޕިޓަލު ތަކަށް ބާރު ބޮޑުވެފައި ވާއިރު ޑޮކްޓަރުން އަންނަނީ ކަންބޮޑުވުން ފާޅުކުރަމުންނެވެ. އަދި ބަލިން ރައްކާތެރި ވުމުގެ ފިޔަވަޅުތައް އެޅުމަށް އެ ފަރާތްތަކުން އަންނަނީ ނަސޭހަތްތެރިވަމުން ނެވެ.