ސެޕްޓެމްބަރު މަހު ބޭއްވުމަށް ހަމަޖެހިފައިވާ ރިޔާސީ އިންތިހާބުގައި ވާދަކުރެއްވުމަށް، ކެންޑިޑެސީ ފޯމު އިލެކްޝަންސް ކޮމިޝަނަށް ލާ މުއްދަތު ހަމަވާއިރުވެސް އިދިކޮޅު ޕީޕީއެމް/ ޕީއެންސީ ކޯލިޝަންގެ ކެންޑިޑޭޓް ރައީސް އަބްދުالله ޔާމީން އަބްދުލްގައްޔޫމްގެ ފަރާތްޕުޅުން ހައިކޯޓަށް ހުށަހަޅާފައިވާ އިސްތިއުނާފީ މައްސަލަ ނިމޭނެކަމެއް ނޭނގޭ ކަމަށް އިދިކޮޅުުން ބުނެފިއެވެ. 

ރައީސް ޔާމީން މިވަގުތު ހުންނެވީ ވ. އާރަށް ކުއްޔަށް ދިނުމުގެ މައްސަލާގައި، އެމަނިކުފާނުގެ މައްޗަށް ކޮށްފައިވާ ދައުވާތައް ސާބިތުވާ ކަމަށް ކްރިމިނަލް ކޯޓުން ކޮށްފައިވާ 11 އަހަރުގެ ޖަލު ހުކުމް ތަންފީޒް ކުރައްވަން ޖަލުގައެވެ. 

އެ މައްސަލަ ރައީސް ޔާމީންގެ ފަރާތްޕުޅުން ހައިކޯޓުގައި އިސްތިއުނާފު ކުރައްވާފައިވާއިރު، މައްސަލަ ނިމުމަކާއި ގާތްވެފައި ވަނިކޮށް، ފަނޑިޔާރުން ޗުއްޓީއަށް ވަޑައިގެންނެވުމުން އެ މައްސަލަ މިހާރު ވަނީ ހުއްޓުމަކަށް އައިސްފައެވެ. 

Advertisement

އެކަމާއި ގުޅިގެން މައްސަލަ އަވަސް ކޮށްދިނުމަށް އެދި އިދިކޮޅު ލީޑަރޝިޕުން މިއަދު ވަނީ ހައިކޯޓަށް ވަޑައިގެންފައެވެ. އެހެންނަމަވެސް، މިއަދުވެސް މައްސަލައިގެ ދެން އަޑުއެހުމެއް އޮންނާނެ އިރެއް ނުވަތަ މައްސަލަ އާއި ގުޅޭ އެއްވެސް އަދާހަމައެއް އެ ކޯޓުގެ ފަރާތުން ލިބިފައި ނުވާ ކަމަށް އިދިކޮޅުު ހިންގެވުމާއި ހަވާލުވެ ހުންނެވި، ޕީއެންސީގެ ރައީސް އަބްދުއްރަހީމް އަބްދުالله (އަދުރޭ) ވަނީ ނޫސްވެރިންނަށް މައުލޫމާތު ދެއްވާފައެވެ. 

މީގެ އިތުރުން، އިންތިޚާބުގައި ވާދަކުރުމަށް ކެންޑިޑެސީ ފޯމް ހުށަހެޅުމުގެ މުއްދަތު އޮގަސްޓު 7 ވަނަ ދުވަހު ހަމަވާއިރު، އެ ދުވަހާއި ހަމައަށްވެސް ރައީސް ޔާމީން ގެ މައްސަލަ ނިމޭނެކަން މިހާރު ޔަގީން ނުވާކަމަށް ވިދާޅުވެ އަބްދުއްރަހީމް ވަނީ ކަންބޮޑުވުން ފާޅުކުރައްވާފަ އެވެ. 

އަބްދުއްރަހީމް އިތުރަށް ވިދާޅުވީ، ރައީސް ޔާމީން ގެ އިސްތިއުނާފީ މައްސަލަ އަވަހަށް ނިންމުމަކީ ހަމައެކަނި އިދިކޮޅުު ލީޑަރޝިޕް ގެ އެދުމެއް ނޫން ކަމަށެވެ. އެހެނެއް ކަމަކު، އެ މައްސަލަ މަޑުޖެހިފައި އޮތް އޮތުމަކީ ރާއްޖޭގެ އެތައްބައެއްގެ ކަންބޮޑުވުމެއް ކަމަށެވެ. އަދި ރާއްޖޭގެ ރައްޔިތުން ތިބީ އެ މީހުންގެ ރިޔާސީ ކެންޑިޑޭޓަށް ކެމްޕެއިން ކުރުމުގައި ބައިވެރިވެ ވަޑައިނުގެންނެވޭތީ ކަންބޮޑުވެފައި ކަމަށްވެސް އަދުރޭ ވިދާޅުވިއެެވެ. 

ރިޔާސީ އިންތިހާބުގައި ވާދަކުރެއްވުމަށް ރައީސް ޔާމީންގެ ފަރާތްޕުޅުން އިލެކްޝަންސް ކޮމިޝަނަށް ހުށަހަޅުއްވަންޖެހޭ ލިޔެކިޔުންތަކުގައި އެމަނިކުފާނު މިހާރު ވަނީ ސޮއި ކުރައްވާފައެވެ. އަދި އެ ލިޔެކިޔުންތައް ކަރެކްޝަންސް މެދުވެރިކޮށް އަނބުރާ ޕީޕީއެމް އޮފީހަށް ލިބިފައިވާ ކަމަށްވެސް އެ ޕާޓީން ވަނީ ބުނެފަ އެވެ. އެހެންނަމަވެސް، ޖަލުގައި ހުންނެވުމުން ކެންޕެއިންގައި އަމަލީ ގޮތުން ބައިވެރިވުމުގެ ފުރުސަތު އެމަނިކުފާނަށް ވަނީ ގެއްލިފައެވެ.