އިދިކޮޅު ރިޔާސީ ކެންޑިޑޭޓް ރައީސް ޢަބްދުالله ޔާމިން ޢަބްދުލްޤައްޔޫމް ކުރަން ދެއްކެވި ކޮންމެ ކަމެއް ކުރައްވާނެ ކަމަށް ތ ގުރައިދޫ ދާއިރާގެ މެމްބަރު މުޙައްމަދު ޣައްސާނު މައުމޫން ވިދާޅުވެއްޖެއެވެ.

ޣައްސާން މިހެން ވިދާޅުވީ ރައީސް ޔާމިންގެ ރަނިންގމޭޓަކަށް ޑރ މުޙައްމަދު ޖަމީލް އަޙްމަދު އައްޔަނުކުރެއްވުމާއި ގުޅިގެން އެމަނިކުފާނަށް މަރުޙަބާ ދަންނަވައި ކުރެއްވެވި ޓްވީޓެއްގައެވެ.

"ޕީޕީއެމްގެ ލީޑަރ ޝިޕާއި ސެނެޓާއި އަދި ހިތްވަރުގަދަ ލަޝްކަރު މިތިބީ ރައީސް ޔާމިންގެ ފަހަތްޕުޅުގައި، އެމަނިކުފާނު ވެރިކަމަށް ގެނައުމުގެ ވަރުގަދަ ޢަޒުމުގައި، ކުރަން ދެއްކެވި ކޮންމެ މަސައްކަތެއް ކުރާނެ ކަމުގެ ފުރިހަމަ ޔަޤީންކަން އަރުވަން" ޣައްސާން ވިދާޅުވެފައިވެއެވެ.

ރައީސް ޔާމިންގެ ރަނިންގމޭޓަކަށް ޑރ ޖަމީލް ހަމަޖައްސަވައި އެކަން އިއުލާނުކޮށްފައިވަނީ މިއަދުއެވެ. ރިޔާސީ އިންތިޚާބަށް ކުރިމަތިލައްވާ ކެނޑިޑޭޓުންގެ ތެރެއިން ރަނިންގމޭޓެއް ހަމަޖައްސަވައި އިޢުލާނު ކޮށްފައިވަނީ ޕީޕީއެމް ޕީއެންސީ ކޯލިޝަނުންނެވެ.

ދަ ޑިމޮކްރެޓްސްގެ ރަނިންގމޭޓަކަށް ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެމްބަރު އީވާ އަބްދުالله ހަމަޖައްސަން އުޅޭ ކަމަށް ސޯޝަލް މީޑީއާގައި ބައެއް މީހުން ދަނީ ބުނަމުންނެވެ. ރައީސް ޞާލިޙްވެސް އަދި ރަނިންގމޭޓެއް ހަމަޖައްސަވައިފައެއް ނުވެއެވެ.