ޕީޕީއެމްގެ ރިޔާސީ ކެންޑިޑޭޓް އަދި ކުރީގެ ރައީސް، ޢަބްދުالله ޔާމީން ޢަބްދުލްޤައްޔޫމްގެ މަންމާފުޅު އަވަހާރަވިއިރު، އެމަނިކުފާނު ޖަލުގައި ހުންނަވަން ޖެހުމުން މަންމާފުޅުގެ ޖަނާޒާގައި ބައިވެރިވެވަޑައިގަތުމުގެ ފުރުޞަތު ލިބިވަޑައިނުގަތުމަކީ ވަރަށް ބޮޑަށް ހިތާމަ ކުރާކަމެއް ކަމަށް ޕީޕީއެމުން ބުނެފި އެވެ. 

ރައީސް ޔާމީންގެ މަންމާފުޅު އަވަހާރަވުމުގެ ހިތާމައިގައި ބައިވެރިވެ ތަޢުޒިޔާ ދަންނަވައި, ޕީޕީއެމުން ނެރުނު ނޫސް ބަޔާނެއްގައި ބުނީ، އެމަނިކުފާނުގެ މަންމާފުޅު ފާޠިމަތު ޙަސަން އަވަހާރަވި ޚަބަރު ޕީޕީއެމް/ޕީއެންސީ ކޯލިޝަންގެ އެންމެހާ މެންބަރުން އެހީ ވަރަށްވެސް ފުން ހިތަމާއާއި އަސަރާއެކު ކަމަށެވެ. މިއާއެކު މާތްالله މަރްހޫމާގެ ފުރާނަފުޅަށް ރަޙުމަތް ލައްވާ ފާފަ ފުއްސަވާ ސުވަރުގޭގެ މަތިވެރި ނިޢުމަތް މިންވަރު ކުރެއް ވުމަށްއެދި ވަނީ  ދުޢާކޮށްފައެވެ. 

"ރައީސް ޔާމީން ޢަބްދުލްޤައްޔޫމްގެ މަންމާފުޅު އަވަހާރަވިއިރު، އެމަނިކުފާނު މިސަރުކާރުގެ އަނިޔާވެރިކަމުގައި ޙައްޤު ނޫން ޙުކުމެއްގައި ޖަލުގައި ހުންނަވަން ޖެހިވަޑައިގަތުމާއި އެމަނިކުފާނަށް އެމަނިކުފާނުގެ މަންމާފުޅުގެ ޖަނާޒާގައި ބައިވެރިވެވަޑައިގަތުމުގެ ފުރުޞަތު ލިބިވަޑައިނުގަތުމަކީ ވަރަށް ބޮޑަށް ހިތާމަ ކުރާކަމެކެވެ." ޕީޕީއެމްގެ ބަޔާނުގައި ބުނެފައިވެއެވެ. 

Advertisement

ޕީޕީއެމުން ބުނީ، ރައީސް ޔާމީންގެ މަންމާފުޅު އަވަހާރަވުމުގެ ހިތާމައިގައި އެ ކޯލިޝަންގެ އެންމެހައި މެންބަރުން ބައިވެރިވެ، އެމަނިކުފާނާއި، އެމަނިކުފާނުގެ ޢާއިލާއަށް، ޕީޕީއެމް، ޕީއެންސީ ކޯލިޝަންގެ ލީޑާރޝިޕާއި، ސެނެޓަރުންނާއި، ޕާލަމަންޓްރީ ގްރޫޕްގެ މެންބަރުންނާއި، ދާއިރާ ރައީސުންނާއި، ސްޓިއަރިންގ ކޮމިޓީތަކާއި އަދި މިކޯލިޝަނަށް ނިސްބަތްވާ ދެ ޕާޓީގެ އެންމެހާ މެންބަރުންގެ ނަމުގައި ތަޢުޒިޔާ ދަންނަވާ ކަމަށެވެ.

"އަދި މާތް الله އެމަރްޙޫމާގެ ޢާއިލާއަށާއި ރައީސް ޔާމީން ޢަބްދުލްޤައްޔޫމަށް ކެތްތެރިކަމާއި ސާބިތުކަން މިންވަރު ކުރެއްވުން އެދި ދުޢާ ކުރަމެވެ." ޕީޕީއެމްގެ ބަޔާނުގައި ވެއެވެ. 

ރައީސް ޔާމީން ގެ މަންމާފުޅު ފާތުމަތު ހަސަން ގިނަ ދުވަސްތަކެއް ވަންދެން އާލާސްކަންފުޅާއި އުޅުއްވުމަށްފަހު، މިއަދުގެ ވަގުތެއްގައި އަވަށްޓެރި ސްރީލަންކާގައި ވަނީ އަވަހާރަވެ ވެފައެވެ. 

އެއާއެކު ގިނަ ބައެއް އަންނަނީ ރައީސް ޔާމީން އަށާއި ޢާއިލާއަށް ތައުޒިޔާ ކިޔަމުންނެވެ.